ބުދަ، 18 ނޮވެމްބަރު 2026
ޚަބަރު

އެމެރިކާއަށް އެތެރެވިޔަނުދިން ސޯމާލިއާގެ ރެފްރީއަށް ފީފާއިން ފުރިހަމަ މުސާރަ ދެނީ

އެމެރިކާއަށް އެތެރެވުމުގެ ހުއްދަ ނުލިބުނު ސޯމާލިއާގެ ރެފްރީ އޮމާރު އަރްތާން ---
އެމެރިކާއަށް އެތެރެވުމުގެ ހުއްދަ ނުލިބުނު ސޯމާލިއާގެ ރެފްރީ އޮމާރު އަރްތާން ---

ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ވޯލްޑް ކަޕްގައި އިންސާފު ކުރުމަށް އެމެރިކާއަށް އެތެރެވުމުގެ ހުއްދަ ނުލިބުނު ސޯމާލިއާގެ ރެފްރީ އޮމާރު އަރްތާންއަށް، މުބާރާތުގެ ތެރޭގައި އޭނާއަށް ލިބެންޖެހޭ ފުރިހަމަ މުސާރަ ދިނުމަށް ބައިނަލްއަގުވާމީ ފުޓްބޯޅަ ފެޑެރޭޝަން (ފީފާ) އިން ނިންމައިފިއެވެ.

މި މުބާރާތުގައި އިންސާފު ކުރުމަށް ހޮވުނު ނަމަވެސް، އެމެރިކާގެ ވިސާ ނުވަތަ އެތެރެވުމުގެ ހުއްދަ ނުލިބުމުގެ ސަބަބުން އޮމާރު އަރްތާންއަށް ވަނީ މުބާރާތަށް ދެވޭގޮތް ނުވެފައެވެ. ނަމަވެސް ފީފާއިން މިހާރު ވަނީ އޭނާ މުބާރާތުގައި ރެފްރީކަން ކުރިނަމަ ލިބޭނެ ހުރިހާ ފައިސާއެއް އެއްވެސް އުނިކަމެއް ނެތްގޮތަށް ދިނުމަށް ކަނޑައަޅާފައެވެ.

މި ނިންމުމާ ގުޅިގެން ގިނަ ބައެއްގެ މެދުގައި ތަފާތު ޚިޔާލުތައް ދަނީ ފާޅުކުރެވެމުންނެވެ. ބައެއް ފަރާތްތަކުން ގަބޫލުކުރާ ގޮތުގައި ފީފާއިން މިގޮތަށް ނިންމީ އާންމުންގެ ފަރާތުން ކުރިމަތިވި ފާޑުކިއުންތަކާއި ޕްރެޝަރުގެ ސަބަބުންނެވެ. އަދި ބައެއް މީހުން ބުނަމުންދަނީ މިއީ އިދާރީ މައްސަލަތަކެއްގެ ސަބަބުން މުބާރާތުން ފުރުސަތު ގެއްލުނު ރެފްރީއަކަށް ލިބުނު ބޮޑު އިންސާފެއް ކަމަށެވެ.

https://twitter.com/centregoals/status/2066101336329134460

އަނެއްކޮޅުން، މުސާރަ ފުރިހަމައަށް ލިބުނު ނަމަވެސް، ވޯލްޑް ކަޕް ފަދަ ބޮޑު މުބާރާތެއްގައި ރެފްރީކަން ކުރުމުގެ ސަބަބުން ލިބޭނެ ތަޖުރިބާ އާއި ޝަރަފާ މި ފައިސާ އަޅާނުކިޔޭނެ ކަމަށްވެސް ފުޓްބޯޅަ ސަޕޯޓަރުން ފާހަގަކުރެއެވެ. އެހެންނަމަވެސް، މި ހާދިސާގެ ސަބަބުން އޮމާރު އަރްތާންގެ ނަން މުޅި ދުނިޔެއަށް މަޝްހޫރުވެގެން ގޮސްފައިވާކަން ގިނަ ބަޔަކު ގަބޫލުކުރެއެވެ.