ވޯލްޑް ޓްރެވަލް އެވޯޑްސްގެ ޕާޓްނަރުންނަށް އިވެންޓް މޯލްޑިވްސް އާއި ޕްރިންޓް ލެބް
މިއަހަރު ރާއްޖޭގައި ބޭއްވުމަށް ތައްޔާރުވަމުންދާ ފަތުރުވެރިކަމުގެ ދާއިރާގެ އެންމެ ޝަރަފުވެރި އެއް ހަފްލާ ކަމަށްވާ "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން 2026" ގެ ރަސްމީ އިވެންޓް އަދި ޕްރިންޓިންގ ޕާޓްނަރުން ހޮވައި، އެ ފަރާތްތަކާއެކު ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން މިއަދު އެއްބަސްވުމުގައި ސޮއިކޮށްފިއެވެ.
ބައިނަލްއަގުވާމީ މި ބޮޑު ހަރަކާތް ކުރިއަށްގެންދިއުމަށްޓަކައި ވީއެމްސީއިން ބައިވެރިކޮށްފައިވަނީ ރާއްޖޭގެ މަގުބޫލު ދެ ކުންފުންޏެއް ކަމަށްވާ އިވެންޓް މޯލްޑިވްސް އާއި ޕްރިންޓް ލެބް އެވެ.
މި އެއްބަސްވުންތަކުގައި ވިޒިޓް މޯލްޑިވްސް ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ ޗީފް އޮޕަރޭޓިންގ އޮފިސަރ ސަބީހާ އަހުމަދެވެ. އަދި އިވެންޓް މޯލްޑިވްސްގެ ފަރާތުން ސީއީއޯ އަދި މެނޭޖިން ޑިރެކްޓަރ އަހުމަދު މިދްހަތް ސޮއިކުރެއްވިއިރު، ޕްރިންޓް ލެބްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ މަދީހް ޖަމާލްއެވެ.
މިއަހަރުގެ އެވޯޑް ހަފްލާއަކީ އޭޝިއާ، ޕެސިފިކް، އޮސްޓްރޭލޭޝިއާ އަދި އިންޑިއާ ކަނޑުގެ ސަރަހައްދުގެ ފަތުރުވެރިކަމުގެ ސިނާއަތުގެ އިސްވެރިންނާއި ފަންނީ މާހިރުން އެއްތަންވާނެ ވަރަށް މުހިންމު ހަރަކާތެކެވެ. މިއީ ދުނިޔޭގެ ކުރިއަރާފައިވާ ފަތުރުވެރި މަންޒިލެއްގެ ގޮތުގައި ރާއްޖޭގެ پێގަން ހަރުދަނާކޮށް، ބައިނަލްއަގުވާމީ ފެންވަރުގެ ބޮޑެތި އިވެންޓްތައް ބޭއްވުމުގެ ގާބިލުކަން ދައްކާލުމަށް ލިބޭ ރަނގަޅު ފުރުސަތެކެވެ.
އޮފިޝަލް އިވެންޓް ޕާޓްނަރުގެ ހައިސިއްޔަތުން އިވެންޓް މޯލްޑިވްސްއިން މި ހަފްލާ ރޭވުމާއި އިންތިޒާމުތައް ބެލެހެއްޓުމުގައި އަމަލީގޮތުން ބައިވެރިވާނެއެވެ. އަދި އޮފިޝަލް ޕްރިންޓް ޕާޓްނަރުގެ ގޮތުގައި ހަމަޖެއްސި ޕްރިންޓް ލެބުން މި ހަރަކާތަށް ބޭނުންވާ ބްރޭންޑިންގ އަދި ޕްރިންޓިންގގެ ހުރިހާ މަސައްކަތެއް ފުރިހަމަކޮށްދޭނެއެވެ.
މިކަމާ ގުޅޭގޮތުން ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވީ، ރާއްޖޭގައި މިފަދަ ޝަރަފުވެރި އެވޯޑް ހަފްލާއެއް ބޭއްވުމަކީ ރާއްޖޭގެ ފަތުރުވެރިކަމުގެ ފެންވަރު ދުނިޔެއަށް ރަމްޒުކޮށްދޭ ކަމެއް ކަމަށެވެ. އަދި މި މަސައްކަތުގައި އިވެންޓް މޯލްޑިވްސް އާއި ޕްރިންޓް ލެބް ފަދަ ތަޖުރިބާކާރު ބައިވެރިން ލިބުމަކީ ބޮޑު އުފަލެއް ކަމަށްވެސް އޭނާ ފާހަގަކުރެއްވިއެވެ.
Ads by MACL
