ބުދަ، 18 ނޮވެމްބަރު 2026
ޚަބަރު

ވޯލްޑް ކަޕް 2026: މެޗު ފެށީ ރެކޯޑަކުން، ނަމަވެސް ރޮނާލްޑޯގެ ފައިގަ ބޯޅަ ޖެހުނީ 90 މިނެޓުން 25 ފަހަރު!

ވޯލްޑް ކަޕް 2026: މެޗު ފެށީ ރެކޯޑަކުން، ނަމަވެސް ރޮނާލްޑޯގެ ފައިގަ ބޯޅަ ޖެހުނީ 90 މިނެޓުން 25 ފަހަރު!
ވޯލްޑް ކަޕްގެ ގުރޫޕް ކޭ ގެ ފުރަތަމަ މެޗުގައި ކްރިސްޓިއާނޯ ރޮނާލްޑޯގެ ޕޯޗުގަލްއާ ދެކޮޅަށް ޑިމޮކްރެޓިކް ރިޕަބްލިކް އޮފް ކޮންގޯއިން ވަރުގަދަ ކުޅުމެއް ދައްކައި، މެޗު އެއްވަރުކޮށްފިއެވެ.
އެމެރިކާގެ ހިއުސްޓަންގެ އެންއާރްޖީ ސްޓޭޑިއަމްގައި ބުދަ ދުވަހުގެ ރޭ ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

މެޗު ފެށިގެން ހަވަނަ މިނެޓުގައި ޕޯޗުގަލްއިން ވަނީ ލަނޑެއް ޖަހައި ކުރިހޯދާފައެވެ. މި ލަނޑަކީ ޕެޑްރޯ ނެޓޯ ތަނަވަސްކޮށްދިން ފުރުސަތަކުން، ޖޮއާ ނެވޭސް ބޮލުން ފޮނުވާލައިގެން ކާމިޔާބުކުރި ލަނޑެކެވެ. ނަމަވެސް ފުރަތަމަ ހާފުގެ އިތުރުވަގުތުގެ ފަހު މިނެޓުގައި އާތަރ މަސުއާކޫ ހުރަސްކޮށްދިން ބޯޅައަކުން ޔޮއާން ވިއްސާ ވަނީ ބޮލުން ގޯލުގެ ތެރެއަށް ބޯޅަ ފޮނުވާލައި ކޮންގޯއަށް ނަތީޖާ ހަމަހަމަކޮށްދީފައެވެ.

މި މެޗުގައި އެންމެ ބޮޑު ސަމާލުކަމެއް ހުއްޓުނީ ހަވަނަ ވޯލްޑް ކަޕެއްގައި ކުޅެގެން ރެކޯޑް ހެދި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަށެވެ. ނަމަވެސް ކޮންގޯއިން ބޭނުންކުރި 5-3-2 ގެ ވަރުގަދަ ޑިފެންސިވް ފޯމޭޝަނުގެ ސަބަބުން ރޮނާލްޑޯ ހުރީ މުޅިން އެކަހެރިވެފައެވެ. ފުރަތަމަ ހާފުގައި އޭނާއަށް ބޯޅައިގައި ޖައްސާލެވުނީ އެންމެ 16 ފަހަރެވެ. ދެވަނަ ހާފުގައި އޭނާއަށް ލިބުނު މަދު ފުރުސަތުތަކުގެ ބޭނުންވެސް އެދެވޭ ގޮތެއްގައި ހިފޭގޮތެއް ނުވިއެވެ.

ދެވަނަ ހާފުގައި ޕޯޗުގަލްގެ ކޯޗު ރޮބާޓޯ މާޓިނޭޒް ވަނީ ބެނާޑޯ ސިލްވާގެ ބަދަލުގައި ފްރެންސިސްކޯ ކޮންސެއިސާއޯ ކުޅެން އަރުވައި އެޓޭކް ވަރުގަދަކުރަން މަސައްކަތްކޮށްފައެވެ. ނަމަވެސް ކޮންގޯގެ ޑިފެންޑަރުންނާއި ކީޕަރު ލިއޮނެލް އެމްޕާސީ ވަނީ ޕޯޗުގަލްގެ ހަމަލާތައް ހުއްޓުވުމުގައި ކާމިޔާބު ހޯދާފައެވެ. މެޗުގެ 56 ވަނަ މިނެޓުގައި ކޮންގޯގެ ސެޑްރިކް ބަކަމްބޫ ފޮނުވާލި ހަމަލާއެއް ގޯލުގެ އަރިމަތީ ދަނޑިއަށް އަމާޒުވެ، ޕޯޗުގަލް ސަލާމަތްވީ ހަނިގޮތަކަށެވެ.

ރޮނާލްޑޯއަށް މެޗުގައި ލިބުނު ފުރަތަމަ ފުރުސަތު ފެނިގެންދިޔައީ މެޗުގެ 68 ވަނަ މިނެޓުގައެވެ. ކޮންސެސާއޯ ދިން ބޯޅައަކުން ޕެނަލްޓީ އޭރިއާ ތެރެއިން ރޮނާލްޑޯ ފޮނުވާލި ހަމަލާ ދިޔައީ ކޮންގޯ ގޯލުގެ އަރިމަތީ ދަނޑިކައިރިން ބޭރަށެވެ. އެ ބޯޅަ ރޮނާލްޑޯއަށް ރަނގަޅަށް ފޮނުވާލެވިފައެއް ނުވެއެވެ.

މެޗުގެ 73 ވަނަ މިނެޓުގައި ވެސް ރޮނާލްޑޯއަށް ރަނގަޅު ފުރުސަތެއް ލިބިގެންދިޔައެވެ. ކޮންސެސާއޯ ދިން ބޯޅައަކުން ޕެނަލްޓީ އޭރިއާ ތެރެއިން ރޮނާލްޑޯ ފޮނުވާލި ހަމަލާ، ކޮންގޯގެ ގޯލާ އަމާޒުވެފައެއް ނުވެއެވެ. އޭނާ ކައިރީގައި ކޮންގޯގެ ދެ ޑިފެންޑަރަކު ތިބުމުން، އުނދަގޫތަކާ ކުރިމަތިލާން ޖެހުނެވެ.

މެޗުގެ ފަހުކޮޅުގައި ޕޯޗުގަލުން ބަދަލުތަކެއް ގެނައި ނަމަވެސް، އެންމެ އެދެވޭ ފުރުސަތުތަކެއް ތަނަވަސްކުރެވިފައެއް ނުވެއެވެ. މެޗު ނިމެނިކޮށް ބްރޫނޯ ފެނާންޑޭޒްގެ ހަމަލާއެއް ފެނިގެންދިޔަ ނަމަވެސް، އޭނާ ފޮނުވާލި ހަމަލާ ވެސް ކޮންގޯގެ ގޯލާ އަމާޒުވެފައެއް ނުވެއެވެ.

މިއީ 52 އަހަރުގެ މެދުކެނޑުމަކަށްފަހު ވޯލްޑް ކަޕްގައި ވާދަކުރާ ކޮންގޯއަށް ލިބުނު ވަރަށް މުހިންމު ޕޮއިންޓެކެވެ. ކުރިން ޒައިރްގެ ނަމުގައި 1974 ގައި ވާދަކުރި ކޮންގޯއިން މިފަހަރު ނުކުތީ ޔޫރަޕްގެ ބޮޑެތި ކްލަބުތަކަށް ކުޅޭ އާރޮން ވެން ބިސާކާ ފަދަ ހުނަރުވެރި ކުޅުންތެރިންނާއެކުގައެވެ. ޕޯޗުގަލްއަށް މި ނަތީޖާއާއެކު ގްރޫޕްގެ ކުރިއަށް އޮތް މެޗުތަކަށް އިތުރަށް މަސައްކަތް ކުރަން ޖެހޭނެއެވެ.

މި ގްރޫޕުގައި ދެން ހިމެނެނީ އުޒްބެކިސްތާނާއި ކޮލަމްބިއާ އެވެ. އުޒްބެކިސްތާނާއި ކޮލަމްބިއާ ބައްދަލުކުރާ މެޗު ކުޅުމަށް ހަމަޖެހިފައިވަނީ ހެނދުނު 7:00 ގައެވެ.n