ބުދަ، 18 ނޮވެމްބަރު 2026
ޚަބަރު

ބޭރުގެ މުއާމަލާތްތަކަށް ބީއެމްއެލް އިން ދީފައިވާ ލިމިޓްތަކަށް ހެޔޮ ބަދަލުތަކެއް ގެންނަނީ

ބޭރުގެ މުއާމަލާތްތަކަށް ބީއެމްއެލް އިން ދީފައިވާ ލިމިޓްތަކަށް ހެޔޮ ބަދަލުތަކެއް ގެންނަނީ

ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ރާއްޖޭން ބޭރުގެ މުއާމަލާތްތައް ކުރުމަށް ކާޑުތަކަށް ކަނޑައަޅާފައިވާ ލިމިޓްތަކަށް މި މަސް ނިމުމުގެ ކުރިން ބޮޑެތި ލުއިތަކެއް ދިނުމަށް އެ ބޭންކުން ނިންމައިފިއެވެ.

ގައުމީ ބޭންކުން މިގޮތަށް ނިންމާފައިވަނީ ބޭސްފަރުވާއާއި ތައުލީމީ ކަންކަމަށް ރާއްޖޭން ބޭރަށް ފައިސާ ފޮނުވުމުގައި ކަސްޓަމަރުންނަށް ދިމާވަމުންދާ ދަތިތަކަށް ހައްލެއް ހޯދައިދިނުމުގެ މަގުސަދުގައެވެ.

މި ބަދަލު ގެނައުމަށް ބީއެމްއެލް އިން ނިންމާފައި މިވަނީ، ބޭންކަށް ލިބޭ ޑޮލަރަށްވުރެ ބޭރު ފައިސާގެ ޑިމާންޑް ބޮޑުވުމާ ގުޅިގެން ރުފިޔާ ކާޑުތަކުން ކުރާ އޮންލައިން އަދި އީ-ކޮމާސް މުއާމަލާތްތަކަށް މިދިޔަ މަހުން ފެށިގެން ހިފެހެއްޓުންތަކެއް ގެންގުޅެން ފެށުމަށްފަހުއެވެ. އެ ބޭންކުގެ އޮފިޝަލަކު ވިދާޅުވި ގޮތުގައި މިހާރު ހުރި ހުރަސްތައް ނައްތާލައި، ކަސްޓަމަރުންނަށް ފަސޭހަވާނެ ފަދަ ހެޔޮ ބަދަލުތަކެއް ކަނޑައެޅުމުގެ ފަހުގެ މަސައްކަތްތައް ބޭންކުން ދަނީ ކުރަމުންނެވެ.

މިހާރު އަމަލުކުރަމުންދާ އުސޫލުތަކަށް ބަލާއިރު، ރާއްޖޭން ބޭރަށް ދަތުރުކުރާ ފަރާތްތަކަށް ޕީއޯއެސް މެދުވެރިކޮށް މަހަކު 1,000 ޑޮލަރާ ހަމައަށް މުއާމަލާތް ކުރެވޭއިރު، އެއަރލައިން ޓިކެޓާއި ހޮޓެލް ބުކިންގްސް ފަދަ ޒަރޫރީ ބޭނުންތަކަށް މަހެއްގެ މައްޗަށް 3,000 ޑޮލަރުގެ ލިމިޓެއް ލިބެއެވެ. ބޭންކުން ބުނާ ގޮތުގައި މި އަދަދުތަކަށް ބަދަލެއް ނުގެނައި ނަމަވެސް، ބޭސްފަރުވާއާއި ކިޔެވުމުގެ ކަންކަމަށް ހާއްސަ އެހީތެރިކަމެއް ފޯރުކޮށްދެވޭނެ އިންތިޒާމުތައް ދަނީ ރޭވެމުންނެވެ.

ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ފަސް މަސްދުވަހުގެ ތެރޭގައި އެ ބޭންކުން ވަނީ ރެކޯޑް އަދަދަކަށް ބޭރު ފައިސާ ވިއްކާފައެވެ. އެގޮތުން ޖުމްލަ 345 މިލިއަން ޑޮލަރު ވިއްކާފައިވާއިރު، މީގެ ތެރެއިން ބޮޑުބައެއް ހިއްސާކުރަނީ ކާޑު މުއާމަލާތްތަކެވެ. މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 47 އިންސައްތައިގެ ބޮޑު އިތުރުވުމެކެވެ.

މި ދަނޑިވަޅުގައި ކަސްޓަމަރުންގެ ބޭނުންތައް ފުއްދައިދިނުމަށްޓަކައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެއްބާރުލުން ލިބެމުންދާނެ ކަމުގެ ޔަގީންކަން ބީއެމްއެލް އަށް ވަނީ ލިބިފައެވެ. އަދި ރާއްޖޭގެ އެހެން މާލީ އިދާރާތަކާ އަޅާބަލާއިރު، ދިވެހި ރުފިޔާ ކާޑުތަކުން ބޭރުގެ މުއާމަލާތްތައް ކުރުމަށް އެންމެ ފުޅާ ދާއިރާއެއްގައި ފުރުސަތު ހުޅުވާލާފައިވަނީ ވެސް ގައުމީ ބޭންކުންނެވެ.