ޒުވާނުން ވަޒީފާގެ މާހައުލަށް ތަމްރީނުކުރަން އެޗްޑީސީން ފުރުސަތު ހުޅުވާލައިފި
ޒުވާނުންނަށް ބޭނުންވާ ހުނަރުތައް ދަސްކޮށްދީ، މަސައްކަތުގެ އަމަލީ މާހައުލަށް އެމީހުން އަހުލުވެރިކުރުވުމަށްޓަކައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށްގެންދާ އެޕްރެންޓިސްޝިޕް ޕްރޮގްރާމުގައި ބައިވެރިވުމުގެ ފުރުސަތު މިއަދު ހުޅުވާލައިފިއެވެ.
ޒުވާނުންގެ މިނިސްޓްރީއާ ގުޅިގެން ކޮންމެ އަހަރަކުވެސް ސިލްސިލާކޮށް ކުރިއަށްގެންދާ މި ޕްރޮގްރާމަކީ އެޗްޑީސީގެ އިޖުތިމާއީ ޒިންމާގެ ދަށުން ގާބިލު މަސައްކަތްތެރި ޖީލެއް ބިނާކުރުމަށް ހިންގާ ހަރަކާތެކެވެ.
މި އަހަރުގެ ޕްރޮގްރާމުގައި ބައިވެރިވުމުގެ ފުރުސަތު އުމުރުން 18 އަހަރާއި 35 އަހަރާ ދެމެދުގެ ދިވެހިންނަށް ހުޅުވާލާފައިވާއިރު، ޝައުގުވެރިވާ ފަރާތްތަކަށް އޮންލައިންކޮށް ފޯމު ހuށަހެޅުމުގެ ސުންގަޑިއަކީ މި ހިނގާ ޖޫން މަހުގެ 30 ވަނަ ދުވަހެވެ.
މި ފަހަރުގެ ތަމްރީނުތައް ބޭއްވުމަށް ހަމަޖެހިފައިވަނީ މައިގަނޑު ތިން ދާއިރާއަކުންނެވެ. އެއީ ހެލްތު އެންޑް ސޭފްޓީ އިން ކޮންސްޓްރަކްޝަނާއި، ކޮމްޕިއުޓާ ހާޑްވެއާ އެންޑް ނެޓްވޯކިންގެ އިތުރުން ސާވޭއިން ޓެކްނީޝަން ދާއިރާއެވެ. މި ޕްރޮގްރާމް ކާމިޔާބުކަމާއެކު ނިންމާލާ ބައިވެރިންނަށް އެ ދާއިރާތަކުން ގައުމީ ސަނަދުގެ ލެވެލް 3 ގެ ސެޓުފިކެޓެއް ލިބިގެންދާނެއެވެ.
އަންނަ އޮގަސްޓް މަހު ފެށުމަށް ތައްޔާރުވަމުންދާ މި ޕްރޮގްރާމުގެ މުއްދަތަކީ ހަ މަސް ދުވަހެވެ. އަދި ބައިވެރިވާ ކޮންމެ މީހަކަށް ހިތްވަރު ދިނުމުގެ ގޮތުން މަހަކު 6,000 ރުފިޔާގެ އެލަވަންސެއް ދިނުމަށް ވަނީ ހަމަޖެހިފައެވެ. އެޗްޑީސީން ބުނި ގޮތުގައި ތަފާތު ދާއިރާތަކުން ހުނަރުވެރި ދިވެހިން އުފައްދައި، ވަޒީފާގެ ބާޒާރަށް ޒުވާނުން ނެރުމަށް އެ ކުންފުނިން އަބަދުވެސް ހާއްސަ އިސްކަމެއް ދޭނެއެވެ.
Ads by MACL
