ބުދަ، 18 ނޮވެމްބަރު 2026
ޚަބަރު

ފެނަކައިން މުވައްޒަފުން މަދުކޮށްގެން މަހަކު 22 މިލިއަން ރުފިޔާ ސަލާމަތްކުރެވޭނެ: އެމްޑީ އަފީފް

ފެނަކައިން މުވައްޒަފުން މަދުކޮށްގެން މަހަކު 22 މިލިއަން ރުފިޔާ ސަލާމަތްކުރެވޭނެ: އެމްޑީ އަފީފް

ފެނަކަ ކޯޕަރޭޝަނުން މިހާރު ކުރިއަށްގެންދާ މުވައްޒަފުން މަދުކުރުމުގެ ޕްރޮގްރާމް ފުރިހަމައަށް ތަންފީޒުކޮށް ނިމުމުން، ކުންފުނީގެ ހިންގުމުގެ ޚަރަދުތަކުން ކޮންމެ މަހަކު ގާތްގަނޑަކަށް 22 މިލިއަން ރުފިޔާ ސަލާމަތްކުރެވޭނެ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހުސައިން ވިދާޅުވެއްޖެ އެވެ.

ޕީއެސްއެމް ނިއުސްއަށް ދެއްވި ބަސްދީގަތުމެއްގައި މެނޭޖިން ޑިރެކްޓަރު ވިދާޅުވީ، ފެނަކައިގެ ބައެއް ޑިޕާޓްމަންޓްތަކަށް ބަލާއިރު މިހާރުވެސް މަސައްކަތުގެ އަމަލީ ދާއިރާއަށް ބޭނުންވާ ވަރަށްވުރެ އިތުރަށް މުވައްޒަފުން އެބަތިބި ކަމަށެވެ.

ގާތްގަނޑަކަށް 8,000 އެއްހާ މުވައްޒަފުން ވަޒީފާ އަދާކުރަމުންދާ ފެނަކައިން ކޮންމެ މަހަކު މުވައްޒަފުންގެ މުސާރަ އާއި އިނާޔަތްތަކަށް އެކަނިވެސް 90 މިލިއަން ރުފިޔާ ހޭދަކުރަންޖެހޭ ކަމަށް އަފީފް ފާހަގަކުރެއްވި އެވެ. އެހެންކަމުން ކުންފުންޏަކީ މާލީގޮތުން ދެމެހެއްޓެނިވި ވިޔަފާރިއަކަށް ހެދުމަށްޓަކައި، މުވައްޒަފުންގެ އަދަދު އެކަށީގެންވާ ބެލެންސްޑް މިންވަރަކަށް މަދުކުރުމަކީ ކޮންމެހެން ކުރަންޖެހިފައިވާ ކަމެއް ކަމަށް އޭނާ ވިދާޅުވި އެވެ.

އަތޮޅުތެރޭގެ ރަށްރަށަށް ކުރައްވާ ދަތުރުތަކުން ފާހަގަކުރެވުނު ކަންކަމަށް އަލިއަޅުވާލައްވަމުން އަފީފް ވިދާޅުވީ، ކުންފުނީގެ މުވައްޒަފުންނާއި އާންމު ރައްޔިތުންވެސް އެދެނީ މި އިސްލާހީ ފިޔަވަޅުތައް ވީހާވެސް އަވަހަށް ކުރިއަށް ގެންދިއުމަށް ކަމަށެވެ. އަދި މި މަސައްކަތް ނިމުމުން ކުންފުނީގެ ވަސީލަތްތައް އެންމެ އެދެވޭ ގޮތުގައި ބޭނުންކުރެވި، މުޅި ކުންފުނީގެ ހިންގުން މިހާރަށްވުރެ ބޮޑަށް ހަރުدަނާވެގެންދާނެ ކަމަށްވެސް ވިދާޅުވި އެވެ.

މި ޕްރޮގްރާމް ކުރިއަށްގެންދަނީ ގައުމީ ނަޒަރަކުން ވިސްނައިގެންކަން ފާހަގަކުރައްވަމުން އެމްޑީ ވިދާޅުވީ، ބޭނުންވާ ވަރަށްވުރެ އިތުރަށް މުވައްޒަފުން ތިބުމުގެ ސަބަބުން ހިންގުމުގެ ޚަރަދު އިންތިހާއަށް ބޮޑުވެ، މަސައްކަތްތަކުގެ ފެންވަރު ދަށްވެ، އަވަހަށް ނިންމަންޖެހޭ ކަންކަން ލަސްވަމުންދާ ކަމަށެވެ.

ކުންފުނި ރީސްޓްރަކްޗާ ކުރުމުގެ މަސައްކަތުގެ ދަށުން، އަމިއްލައަށް އެދިގެން ވަޒީފާއިން ވަކިވާން ބޭނުންވާ މުވައްޒަފުންނަށް ޚާއްސަ މާލީ އިނާޔަތްތަކަކާއެކު ސްކީމެއް ހުޅުވާލާފައިވާ ކަމަށް ފެނަކައިން ހާމަކުރެ އެވެ.

އެގޮތުން މިހާތަނަށް އެ ސްކީމްގެ ދަށުން އަމިއްލައަށް ވަޒީފާއިން ވަކިވުމަށް 97 މުވައްޒަފަކު ފޯމު ހުށަހަޅާފައިވާ އިރު، އެ މީހުން ވަޒީފާއިން ވަކިކުރުމަށްޓަކައި ފުރިހަމަކުރަންޖެހޭ އިދާރީ އެންމެހާ މަސައްކަތްތައް ކުންފުނިން މިހާރު ކުރަމުންދާ ކަމަށް މެނޭޖިން ޑިރެކްޓަރު އަފީފް ވިދާޅުވި އެވެ.