ވޯލްޑް ކަޕް 2026: ޕޯޗުގަލް އަށް ފަސްތަރީގެ މޮޅެއް؛ ރޮނާލްޑޯ ދެ ގޯލް ޖެހި!
މެޗުގެ ހަވަނަ މިނެޓުގައި ޖޮއާ ކެންސެލޯ ދިން ބޯޅައަކުން ރޮނާލްޑޯ ވަނީ ޕޯޗުގަލަށް ލީޑު ހޯދައިދީފައެވެ. މި ގޯލާއެކު އޭނާ ވެފައިވަނީ ތަފާތު ހަ ވޯލްޑް ކަޕެއްގައި ގޯލު ޖެހި ފުރަތަމަ ކުޅުންތެރިޔާ އަށެވެ.
ޕޯޗުގަލްގެ ދެވަނަ ގޯލު 17 ވަނަ މިނެޓުގައި ހިލޭ ޖެހުމަކުން ކާމިޔާބުކޮށްދިނީ ނޫނޯ މެންޑޭޒްއެވެ. އަދި 39 ވަނަ މިނެޓުގައި ބްރޫނޯ ފެނާންޑޭޒްގެ އެހީތެރިކަމާއެކު ރޮނާލްޑޯ ވަނީ އޭނާގެ ދެވަނަ ގޯލު ޖަހައި، ވޯލްޑް ކަޕްގައި ޕޯޗުގަލަށް އެންމެ ގިނަ ގޯލު ޖަހައިދިން އުސޭބިއޯގެ ރެކޯޑު (10 ގޯލު) މުގުރާލާފައެވެ.
ފުރަތަމަ ހާފު ތިން ގޯލުގެ ލީޑަކާއެކު ނިންމާލުމަށްފަހު، ދެވަނަ ހާފުގައި ވެސް ޕޯޗުގަލުން ވަނީ އެޓޭކްތައް ވަރުގަދަކޮށްފައެވެ. މެޗުގެ 60 ވަނަ މިނެޓުގައި ލިބުނު ކޯނަރަކުން ޖޮއާ ފެލިކްސް ފޮނުވާލި ހަމަލާއެއް އުޒްބެކިސްތާން ކީޕަރު އަތުން ބައިކޮޅަށް ވަދެ ޕޯޗުގަލްގެ ހަތަރުވަނަ ގޯލު ލިބުނެވެ. މެޗު ނިމެން ދެ މިނެޓަށް ވެފައިވަނިކޮށް ފަސްވަނަ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ނުކުތް ރަފައެލް ލެއާއޯއެވެ.
އުޒްބެކިސްތާނުން މެޗުގެ ތެރެއިން ބައެއް ނުރައްކާތެރި ހަމަލާތައް އުފެއްދި ނަމަވެސް، ޕޯޗުގަލްގެ ކީޕަރު ޑިއޮގޯ ކޮސްޓާ ވަނީ ހުށިޔާރުކަމާއެކު އެ ހަމަލާތައް ދިފާއުކޮށްފައެވެ.
މިއީ އުޒްބެކިސްތާނުން ވޯލްޑް ކަޕްގައި ވާދަކުރާ ފުރަތަމަ ފަހަރުކަން ފާހަގަކޮށްލެވެއެވެ. އެޓީމު ވަނީ ފުރަތަމަ މެޗުގައި ކޮލަމްބިއާ އަތުން 3-1 އިން ބަލިވެފައެވެ.
މި މޮޅާއެކު ޕޯޗުގަލަށް ވަނީ ކުޅުނު ދެ މެޗުން ހަތަރު ޕޮއިންޓު ލިބިފައެވެ. މި ގްރޫޕުގައި ދެން ހިމެނޭ ކޮލަމްބިއާއަށް ތިން ޕޮއިންޓު ލިބިފައިވާއިރު، ކޮންގޯއަށް ލިބިފައިވަނީ އެއް ޕޮއިންޓެވެ. އުޒްބެކިސްތާނަށް އަދި ޕޮއިންޓެއް ނުލިބެއެވެ. 2016 ގެ ޔޫރޯ ޗެމްޕިއަން ޕޯޗުގަލް މިފަހަރުގެ ވޯލްޑް ކަޕަށް ނުކުތީ މުބާރާތުގެ ފޭވަރިޓުންގެ ތެރޭގައި ހިމެނިގެންނެވެ.
Ads by MACL
