ވޯލްޑް ކަޕް 2026: ތުރުކީން މުބާރާތް ނިންމާލީ އެމެރިކާ ބަލިކޮށް، ތިން ޕޮއިންޓާއި އެކު
ވޯލްޑް ކަޕްގެ ގްރޫޕް ޑީގެ ފަހު މެޗުގައި، މުބާރާތުން ކަޓާފައި އޮތް ތުރުކީން ވަރުގަދަ އެމެރިކާ ބަލިކޮށް ބޮޑު ހައިރާންކަމެއް ގެނުވައިފިއެވެ. ލޮސް އެންޖަލަސް ސްޓޭޑިއަމްގައި ކުޅުނު މި ފޯރިގަދަ މެޗު ތުރުކީން ކާމިޔާބުކުރީ 3-2 ގެ ނަތީޖާއަކުންނެވެ. މި މެޗަށް ނުކުތްއިރުވެސް އެމެރިކާއަށް ވަނީ ގްރޫޕްގެ އެއްވަނަ ޔަގީންވެ، ގަދަ 32 އިން ޖާގަ ލިބިފައެވެ.
މެޗުގެ ކުރީކޮޅު އެމެރިކާއިން ވަނީ ލީޑު ނަގާފައެވެ. ތިންވަނަ މިނެޓުގައި ސެބަސްޓިއަން ބާހޯލްޓާ ނަގައިދިން ބޯޅައަކުން މި ލަނޑު ކާމިޔާބުކޮށްދިނީ އޮސްޓަން ޓްރަސްޓީއެވެ. ނަމަވެސް، މާގިނަ އިރުތަކެއް ނުވެ ތުރުކީގެ ޒުވާން ތަރި އާދާ ގުލާ ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. މިއީ މިފަހަރުގެ ވޯލްޑް ކަޕްގައި ތުރުކީން ޖެހި ފުރަތަމަ ލަނޑެވެ. ފުރަތަމަ ހާފު ނިމުމުގެ ކުރިން އޮރްކުން ކޮޗޫ ވަނީ އިތުރު ލަނޑެއް ޖަހައި ތުރުކީއަށް ލީޑު ހޯދައިދީފައެވެ.
ދެވަނަ ހާފު ފަށައިގެން ހަތަރުވަނަ މިނެޓުގައި އެމެރިކާގެ ބާހޯލްޓާ ވަނީ ލަނޑެއް ޖަހައި އަލުން ނަތީޖާ އެއްވަރުކޮށްފައެވެ. މެޗުގެ ފަހުކޮޅު އެމެރިކާގެ ތަރި ކްރިސްޓިއަން ޕުލިސިޗް ކުޅެން ނުކުމެ ނުރައްކާތެރި ހަމަލާތަކެއް އުފެއްދި ނަމަވެސް، ތުރުކީގެ ކީޕަރު އުގުރްކާން ސާކިރު ވަނީ ހުށިޔާރުކަމާއެކު އެ ހަމަލާތައް ދިފާއުކޮށްފައެވެ.
Ads by BMLމެޗުން ތުރުކީ މޮޅުވި ލަނޑު ފެނިގެންދިޔައީ އިތުރު ވަގުތުގެ އެންމެ ފަހު ސިކުންތުކޮޅުގައެވެ. 98 ވަނަ މިނެޓުގައި އާދާ ގުލާ ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ނުކުތް ކާން އަހްޔާނެވެ. މި މޮޅާއެކު ތުރުކީން މުބާރާތް ނިންމާލީ ތިން ޕޮއިންޓާއެކު ގްރޫޕްގެ ފުލުގައި އޮވެގެންނެވެ.
ގްރޫޕް ޑީގެ ތާވަލަށް ބަލާއިރު، އެމެރިކާ އެއްވަނައިގައި އޮތީ 6 ޕޮއިންޓާއެކުގައެވެ. ދެވަނަ ހޯދައިގެން ގަދަ 32 އަށް ދަތުރުކުރީ އޮސްޓްރޭލިއާއެވެ. އެޓީމަށް 4 ޕޮއިންޓް ލިބިފައިވާއިރު، ތިންވަނައިގައި އޮތް ޕަރަގުއާއީއަށްވެސް ލިބުނީ 4 ޕޮއިންޓެވެ. ނަމަވެސް އޮސްޓްރޭލިއާއަށް ކުރިލިބުނީ ގޯލުގެ ތަފާތުންނެވެ.
މި މެޗުގައި އެމެރިކާގެ ކޯޗު މައުރީޝިއޯ ޕޮޗެޓީނޯ ވަނީ މުހިއްމު ބައެއް ކުޅުންތެރިންނަށް ރެސްޓް ދީފައެވެ. އޭގެ ތެރޭގައި ފޮލާރިން ބަލޮގުން، މަލިކް ޓިލްމަން އަދި ކެޕްޓަން ޓިމް ރީމް ހިމެނެއެވެ. މުބާރާތުން ކަޓާފައި އޮތް ނަމަވެސް، އެންމެ ފަހު މެޗުގައި ދެއްކި ކުޅުމާއި ލިބުނު މޮޅަކީ ތުރުކީ ޓީމަށް ލިބުނު ބޮޑު ހިތްހަމަޖެހުމެކެވެ.
Ads by MACL
