މާލޭ ސަރަޙައްދުގެ 84 ފުލުހަކަށް ކޮމިޝަނާ އޮފް ޕޮލިސް ޝަރަފުގެ ނިޝާން އަރުވައިފި
ދިވެހި ފުލުހުންގެ މުއައްސަސާގައި އިހުލާސްތެރިކަމާއެކު ފާހަގަކޮށްލެވޭ ފަދަ ބޮޑެތި ކާމިޔާބީތައް ހޯދާފައިވާ މާލެ ސަރަހައްދުގެ 84 މުވައްޒަފެއްގެ އަގުވަޒަންކޮށް، އެ ފަރާތްތަކަށް ހާއްސަ ޝަރަފުގެ ނިޝާން މިއަދު ހަވާލުކޮށްފިއެވެ.
އިސްކަންދަރު ބިލްޑިންގުގައި ބޭއްވި ހާއްސަ ރަސްމިއްޔާތެއްގައި މި ނިޝާންތައް ފުލުހުންނާ ހަވާލުކޮށްދެއްވީ ކޮމިޝަނާ އޮފް ޕޮލިސް އަޙްމަދު މުޙައްމަދުއެވެ.
މި ފަހަރު ޝަރަފުގެ ނިޝާން ހާސިލްކުރި ފުލުހުންގެ ތެރޭގައި ތަފާތު އެކި ރޭންކުތަކުގެ އޮފިސަރުން ހިމެނެއެވެ. އޭގެ ތެރޭގައި ކޮމިޝަންޑް އޮފިސަރުންގެ ރޭންކުގެ 32 ބޭފުޅަކާއި، ސަބް އިނިސްޕެކްޓާ އޮފް ޕޮލިސް ރޭންކުގެ 18 މުވައްޒަފެއްގެ އިތުރުން، ސީނިއާ ސާޖަންޓުން ފެށިގެން ކޮންސްޓަބަލް ރޭންކާ ހަމައަށް ހިމެނޭ އެކި މަގާމުތަކުގެ 34 ފުލުހަކު ހިމެނެއެވެ.
މި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ކޮމިޝަނާ އޮފް ޕޮލިސް އަޙްމަދު މުޙައްމަދު ވަނީ ނިޝާން ލިބުނު ހުރިހާ ފަރާތްތަކަށް މަރުހަބާ ވިދާޅުވެ، ފުލުހުންގެ ހިދުމަތުގައި ދެމިތިބުމަށް ކުރާ ބުރަ މަސައްކަތާއި ދައްކާ ކެތްތެރިކަމަށް ޝުކުރު އަދާކުރައްވާފައެވެ. އަދި މުއައްސަސާގެ އެތެރޭގައި އޮންނަ އެއްބައިވަންތަކަން ހިފެހެއްޓުމަށް ހުރިހާ ފުލުހުންވެސް އަބަދުމެ މަސައްކަތް ކުރުމަށް ސީޕީ އިލްތިމާސް ކުރެއްވިއެވެ.
މީގެ އިތުރުން ފުލުހުން ކުރާ ހިދުމަތްތަކުގެ އަގުވަޒަން ކުރުމަށާއި، މުއައްސަސާގެ މަސައްކަތްތައް ދުވަހުން ދުވަހަށް އިތުރަށް ހަރުދަނާ ކުރުމަށްޓަކައި މުއައްސަސާގެ ފަރާތުން އަބަދުވެސް ހާއްސަ ސަމާލުކަމެއް ދީގެން މަސައްކަތް ކުރަމުންދާނެ ކަމުގެ ޔަގީންކަންވެސް ކޮމިޝަނާ ވަނީ ދެއްވާފައެވެ.
މި ހާއްސަ ރަސްމިއްޔާތުގައި ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީގެ އިތުރުން ފުލުހުންގެ ހިދުމަތުގެ އެގްޒެކެޓިވް ރޭންކުގެ ބައެއް އިސް އޮފިސަރުންވެސް ބައިވެރިވެވަޑައިގެންނެވިއެވެ.
މިއީ ފުލުހުން ކުރާ ހިތްވަރުގަދަ މަސައްކަތްތަކުގެ އަގުވަޒަން ކުރުމުގެ ގޮތުން ސިލްސިލާކޮށް ކުރިއަށްގެންދާ ހަރަކާތްތަކުގެ ބައެކެވެ.
Ads by MACL
