ވީއައިއޭގެ ފަޅުތެރެ ބެލެހެއްޓުން ހަރުދަނާކުރަން ހާއްސަ ޑިޖިޓަލް ޕްލެޓްފޯމެއް
މި ޕޯޓަލް މެދުވެރިކޮށް އުޅަނދުތައް ރަޖިސްޓްރީކުރުމާއި، ފަޅުތެރެ ބެލެހެއްޓުމާ ގުޅޭ ކަންކަން ދެފުށް ފެންނަ، ފަސޭހަ ނިޒާމެއްގެ ތެރެއިން ކުރިއަށް ގެންދެވޭނެ ކަމަށް އެމްއޭސީއެލް އިން މައުލޫމާތުދެއެވެ. މީގެ އިތުރުން، މި ޕޯޓަލްގެ ސަބަބުން ފަޅުތެރެ ބޭނުންކުރާ އުޅަނދުފަހަރުގެ ރެކޯޑުތައް ބެލެހެއްޓުމާއި، އޮޕަރޭޝަނަލް ކަންކަން މޮނިޓަރ ކުރުމުގައި އެމްއޭސީއެލްއަށް ބޮޑެތި ލުއިފަސޭހަތަކެއް ލިބިގެންދާނެއެވެ.
އެމްއޭސީއެލް އިން ބުނީ މި ޕޯޓަލް ބޭނުންކުރަން ފެށުމުގެ ކަންކަން ކުރިއަށް ގެންދިއުމަށް ހަމަޖެހިފައިވަނީ އެކި މަރުހަލާތަކަކަށް ބަހާލައިގެން ކަމަށެވެ. ފުރަތަމަ މަރުހަލާގައި އިސްކަންދެނީ އުޅަނދުތައް ރަޖިސްޓްރީކުރުމާއި، ޕޯޓަލް ބޭނުންކުރުމާ ގުޅޭގޮތުން ހޭލުންތެރިކަން އިތުރުކުރުމަށެވެ. މިގޮތުން، އުޅަނދުތަކުގެ ވެރިންނަށް މައުލޫމާތު ދިނުމުގެ ސެޝަންތަކެއް މިހާރު ވަނީ ބާއްވާފައެވެ.
މީގެ އިތުރުން، ރަޖިސްޓްރީކުރުމުގެ މަރުހަލާގައި އެހީތެރިކަން ފޯރުކޮށްދިނުމަށްޓަކައި ފަޅުވެރިންނާ ސީދާ މުޢާމަލާތްކުރުމުގެ މަސައްކަތްވެސް އެ ކުންފުނިން ދަނީ ކުރަމުންނެވެ. މިއީ ފަޅުތެރެ ބޭނުންކުރާ ފަރާތްތަކަށް ވީހާވެސް ލުއިފަސޭހަ ގޮތެއްގައި ޚިދުމަތް ފޯރުކޮށްދިނުމަށް ކުރެވޭ މަސައްކަތެއް ކަމަށް އެމްއޭސީއެލް އިން ފާހަގަކުރެއެވެ.
ހާބަރ ޕޯޓަލްގައި ރަޖިސްޓްރީ ކުރުމަށް އުޅަނދުތަކުގެ ވެރިންނާއި އޮޕަރޭޓަރުންނަށް އެކަށީގެންވާ ވަގުތު ދިނުމުގެ ގޮތުން، ރަޖިސްޓްރީކުރުމުގެ މަރުހަލާ ޖުލައި މަހުގެ ނިޔަލަށް ކުރިއަށް ގެންދިއުމަށް ވަނީ ހަމަޖެހިފައެވެ. މި މަރުހަލާ ނިމި، ޕޯޓަލް ފުރިހަމައަށް ބޭނުންކުރަން ފެށުމާއެކު، ފަޅުތެރޭގެ ޚިދުމަތްތައް ހޯދުމުގެ ކުރިން ޕޯޓަލް މެދުވެރިކޮށް ރަޖިސްޓްރީވެ، ހުއްދައަށް އެދި ހުށަހަޅަންޖެހޭނެއެވެ.
Ads by MACL
