ބުދަ، 18 ނޮވެމްބަރު 2026
ޚަބަރު

ޕޭޕަލްގެ ޚިދުމަތާއެކު 3،000 އަށްވުރެ ގިނަ އެކައުންޓް ލިންކުކޮށްފި: ރައީސް

ޕޭޕަލްގެ ޚިދުމަތާއެކު 3،000 އަށްވުރެ ގިނަ އެކައުންޓް ލިންކުކޮށްފި: ރައީސް

ރާއްޖޭގައި ޕޭޕަލް (PayPal) ގެ ޚިދުމަތް ރަސްމީކޮށް ފެށުމާއެކު، މިހާތަނަށް 3،000 އަށްވުރެ ގިނަ މީހުން އެކައުންޓް ލިންކުކޮށްފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ.

ރައީސް މުޢިއްޒު ވިދާޅުވި ގޮތުގައި، މީގެ ތެރެއިން 2،159 އަށްވުރެ ގިނަ މީހުން ވަނީ މިހާރު ޕޭޕަލް ވޮލެޓު އެކްޓިވޭޓުވެސް ކޮށްފައެވެ.

މި ޚިދުމަތް ރާއްޖެއަށް ތަޢާރަފުކޮށްފައިވަނީ އުރީދޫގެ ޑިޖިޓަލް ވޮލެޓު ކަމަށްވާ "އެމްފައިސާ" (m-faisaa) މެދުވެރިކޮށެވެ. އާ ނިޒާމުގެ ދަށުން، ޕޭޕަލް މެދުވެރިކޮށް ފަސޭހަކަމާއެކު އެމްފައިސާ އެކައުންޓުތަކަށް ފައިސާ ޓްރާންސްފަރ ކުރެވޭނެ އިންތިޒާމު މިހާރު ވަނީ ޤާއިމުކޮށްފައެވެ.

މިއީ ދިވެހި ކުދި އަދި މެދު ފަންތީގެ ވިޔަފާރިތަކަށާއި އަމިއްލަ މަސައްކަތްކުރާ ފަރާތްތަކަށް ބައިނަލްއަޤުވާމީ ބާޒާރުގައި މުދަލާއި ޚިދުމަތް ވިއްކައި، ފަސޭހަކަމާއެކު ފައިސާ ލިބިގަތުމަށް ހުޅުވިގެންދިޔަ ވަރަށް މުހިންމު ފުރުޞަތެކެވެ.

މި ޚިދުމަތުގެ ބައެއް ފީޗާތައް އަދި ފުރިހަމައަށް ނުލިބޭތީ އާންމުންގެ މެދުގައި ހުރި ޝަކުވާތަކަށް އަލިއަޅުއްވާލައްވަމުން ރައީސް ވިދާޅުވީ، މިއީ މި ޚިދުމަތް ފުޅާކުރުމުގެ ފުރަތަމަ މަރުޙަލާ ކަމަށެވެ. އަދި ކުރިއަށް އޮތް ތަނުގައި މި ނިޒާމުގެ ތެރެއިން ރައްޔިތުންނަށް އިތުރު ފަސޭހަތަކާއި ފުރުޞަތުތައް ލިބިގެންދާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.