ވޯލްޑް ކަޕް 2026: އައިވަރީ ކޯސްޓުގެ ތާރީހީ ދަތުރަށް ނިމުމެއް، ނޯވޭ ގަދަ 16 އަށް
މެޗުގެ ފުރަތަމަ ހާފުގައި ނޯވޭ އިން ވަނީ މޮޅު ކުޅުމެއް ދައްކައި 39 ވަނަ މިނެޓުގައި ލީޑު ނަގާފައެވެ. މި ގޯލު އެޓީމަށް ކާމިޔާބުކޮށްދިނީ ޕެނަލްޓީ އޭރިއާ ތެރެއަށް ވަދެ ގޯލުގެ ދުރު ކަނަށް ބޯޅަ އަމާޒުކޮށްލި އެންޓޯނިއޯ ނޫސާ އެވެ.
ފުރަތަމަ ހާފު ނިމުނީ 1-0 އިން ނޯވޭ ކުރީގައި އޮވެގެންނެވެ.
ދެވަނަ ހާފުގައި އައިވަރީ ކޯސްޓުން ކުޅުން ރަނގަޅުކޮށް، މެޗުގެ 74 ވަނަ މިނެޓުގައި ނަތީޖާ ހަމަހަމަކުރިއެވެ. މި ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ނުކުތް އަމަދް ޑިއާލޯ އެވެ. ނަމަވެސް މެޗު ނިމެން ހަތަރު މިނެޓަށް ވެފައި ވަނިކޮށް، 86 ވަނަ މިނެޓުގައި އާލިން ހާލަންޑް ވަނީ ނޯވޭއަށް އަލުން ލީޑު ހޯދައިދީ މެޗުން އެޓީމު މޮޅުކޮށްދީފައެވެ.
މިއީ 1998 ވަނަ އަހަރުގެ ފަހުން ނޯވޭ އިން ވޯލްޑް ކަޕެއްގެ ނޮކްއައުޓް ބުރެއްގައި ވާދަކުރި ފުރަތަމަ ފަހަރެވެ. އަދި މިއީ އައިވަރީ ކޯސްޓުގެ ތާރީހުގައި ވޯލްޑް ކަޕްގެ ނޮކްއައުޓް ބުރަކަށް ދަތުރުކުރި ފުރަތަމަ ފަހަރުވެސް މެއެވެ. އައިވަރީ ކޯސްޓަކީ އެފްރިކާގެ ތިން ފަހަރުގެ ޗެމްޕިއަނުންނެވެ.
ނޯވޭ އަކީ ފުޓުބޯޅައިގެ ވަރުގަދަ ބާރެއް ކަމަށްވާ ބްރެޒިލް އަތުން ދުވަހަކުވެސް ބަލިވެފައިނުވާ މަދު ޓީމުތަކުގެ ތެރެއިން އެއް ޓީމެވެ. މީގެ ކުރިން 1938 އަދި 1998 ވަނަ އަހަރުގެ ވޯލްޑް ކަޕްގައި ނޯވޭ އިން ގަދަ 16 އާ ހަމައަށް ދަތުރުކޮށްފައިވާއިރު، މިފަހަރުގެ މޮޅާއެކު އެޓީމަށް ވަނީ އިތުރު ކުރިއެރުމެއް ލިބިފައެވެ.
އައިވަރީ ކޯސްޓު ބަލިކޮށް ނޯވޭ ގަދަ 16 އިން ޖާގަހޯދިއިރު، އެޓީމު ގަދަ 16 ގައި ބައްދަލުކުރާނީ ބްރެޒިލް އާއެވެ.
Ads by MACL
