ބުދަ، 18 ނޮވެމްބަރު 2026
ޚަބަރު

ވޯލްޑް ކަޕް 2026: އެމްބާޕޭގެ ރެކޯޑު ލަނޑުތަކާއި އެކު މޮޅުވެ، ފްރާންސް ގަދަ 16 އަށް

ވޯލްޑް ކަޕް 2026: އެމްބާޕޭގެ ރެކޯޑު ލަނޑުތަކާއި އެކު މޮޅުވެ، ފްރާންސް ގަދަ 16 އަށް

ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ގެ ބުރުން ފްރާންސް ޖާގަ ހޯދީ، ކީލިއަން އެމްބާޕޭގެ ރެކޯޑު ލަނޑުތަކާއެކު ނިއު ޖާޒީގެ ގަދަ ހޫނުގައި ކުޅުނު މެޗުން 3-0 ގެ ނަތީޖާއަކުން ސްވިޑަން ބަލިކޮށްގެންނެވެ.

މި މެޗުގައި ފްރާންސްގެ ތަރި އެމްބާޕޭ ދެ ލަނޑު ޖަހައި ތާރީޚުގެ ތެރެއިން ޖާގަ ހޯދާފައިވާއިރު، އޭނާ މިހާރު ވަނީ ޖުމްލަ ހަ ލަނޑާއެކު ރަން ބޫޓުގެ ރޭހުގައި ލިއޮނަލް މެސީއާ އެއްވަރުކޮށްފައެވެ.

ފްރާންސްގެ ފަރާތުން ވަރުގަދަ ހަމަލާތަކެއް ފެނިގެންދިޔަ މި މެޗުގެ ފުރަތަމަ ހާފު ނިމެން އުޅެނިކޮށް، އޮސްމާން ޑެމްބެލޭ ދިން މޮޅު ޕާހަކުން އެމްބާޕޭ ވަނީ ފްރާންސަށް ލީޑު ނަގައިދީފައެވެ. އޭގެ ކުރިން އޭނާ ޖެހި ލަނޑެއް އޮފްސައިޑްވިއިރު، މައިކަލް އޮލީސޭއާއި ޑެމްބެލޭ ފޮނުވާލި ނުރައްކާތެރި ހަމަލާތައް ސްވިޑަންގެ ކީޕަރު ޔާކޮބް ވިޑެލް ޒެޓަސްޓްރޮމް ވަނީ ހުޝިޔާރުކަމާއެކު ދިފާއުކޮށްފައެވެ.

ދެވަނަ ހާފު ފެށިގެން އަށްވަނަ މިނެޓުގައި އޮލީސޭ ތަނަވަސްކޮށްދިން ފުރުސަތަކުން ބްރެޑްލީ ބާކޯލާ ވަނީ ފްރާންސްގެ ދެވަނަ ލަނޑު ޖަހައިދީފައެވެ. މި ލަނޑާއެކު ސްވިޑަންގެ އުންމީދުތައް ފަނޑުވެގެން ދިޔައިރު، މެޗުގެ 74 ވަނަ މިނެޓުގައި އެމްބާޕޭ ވަނީ އޭނާގެ ދެވަނަ ލަނޑު ކާމިޔާބުކޮށް ފްރާންސްގެ މޮޅު މުޅިން ކަށަވަރުކޮށްދީފައެވެ.

މެޗުގެ ފަހުކޮޅު ސްވިޑަންގެ އާސެނަލް ފޯވާޑް ވިކްޓަ ގްޔޮކެރެސްއަށް ލަނޑެއް ޖަހަން ލިބުނު ފުރުސަތު ފްރާންސްގެ ކީޕަރު މައިކް މައިންގްނާން ވަނީ ހުއްޓުވާފައެވެ. މި މޮޅާއެކު ފްރާންސް ދެން ބައްދަލުކުރާނީ ޕެނަލްޓީ ޖަހައިގެން ޖަރުމަނު ބަލިކުރި ޕެރަގުއޭއާއެވެ. މި މެޗު އޮންނާނީ އަންނަ ހޮނިހިރު ދުވަހު ފިލަޑެލްފިއާގައެވެ.