ރޮނާލްޑޯގެ ފޭނުންނަށް ހިތާމަވެރި ޚަބަރެއް: މި ވޯލްޑް ކަޕަށް ފަހު ޕޯޗުގަލް ޖާޒީގަ ރޮނާލްޑޯ ދެން ނުފެންނާނެ!
އޭނާގެ މުސްތަގުބަލާ ގުޅޭގޮތުން ވާހަކަ ދައްކަމުން ރޮނާލްޑޯ ބުނީ، މިއީ އޭނާގެ އެންމެ ފަހުގެ ބައިނަލްއަގުވާމީ މުބާރާތް ކަމަށެވެ. އަދި މިއީ ކެރިއަރު ނިންމާލަން އެންމެ ރަނގަޅު ވަގުތުކަމަށް ދެކޭ ކަމަށް އޭނާ ބުނެފައިވާ ކަމަށް ރޮނާލްޑޯއާއި ހަވާލާދީ ރިޕޯޓުތައް ބުނެއެވެ.
ތާރީޚީ ވޯލްޑް ކަޕް ކެރިއަރެއް
ރޮނާލްޑޯގެ ވޯލްޑް ކަޕް ދަތުރު ފެށުނީ 2006 ވަނަ އަހަރު ޖަރުމަނުގައެވެ. އޭގެ ފަހުން އޭނާ ވަނީ ޕޯޗުގަލް ތަމްސީލުކޮށް ކޮންމެ ވޯލްޑް ކަޕެއްގައިވެސް ކުޅެފައެވެ. ވޭތުވެދިޔަ ވިހި އަހަރުގެ ތެރޭގައި އޭނާ ވަނީ ވޯލްޑް ކަޕްގެ ތާރީޚުގައި އެންމެ ފާހަގަކޮށްލެވޭ އެއް ޝަޚުސިއްޔަތަށް ވެފައެވެ. މި ފަހަރުގެ ވޯލްޑް ކަޕް މުބާރާތުގައިވެސް އޭނާ ދަނީ އާދަޔާ ހިލާފު މޮޅު ކުޅުމެއް ދައްކަމުންނެވެ. އެގޮތުން ކްރޮއޭޝިއާ އަތުން ޕޯޗުގަލް މޮޅުވި މެޗުގައި އޭނާ ވެގެން ގޮސްފައިވަނީ ވޯލްޑް ކަޕްގެ ނޮކްއައުޓް މެޗެއްގައި ލަނޑު ޖެހި އެންމެ ދުވަސްވީ ކުޅުންތެރިޔާއަށެވެ.
އެންމެ ބޮޑު ކާމިޔާބީއަށް އޮތް ފަހު ފުރުސަތު
އިނގިރޭސިވިލާތް، ސްޕެއިން އަދި އިޓަލީގެ ލީގު ތަށިތަކާއި، ފަސް ޗެމްޕިއަންސް ލީގާއި، ޔޫރޯ ފުޓްބޯޅަ މުބާރާތް ފަދަ ހުރިހާ ބޮޑެތި ކާމިޔާބީތަކެއް ރޮނާލްޑޯ ހޯދާފައިވީ ނަމަވެސް، ފީފާ ވޯލްޑް ކަޕަކީ އޭނާގެ ކާމިޔާބީގެ ލިސްޓުން މަދުވާ ހަމައެކަނި ތަށްޓެވެ. 2006 ވަނަ އަހަރު ޕޯޗުގަލް ސެމީ ފައިނަލަށް ދިޔަ ދިއުމަކީ ރޮނާލްޑޯގެ ކެރިއަރުގައި ވޯލްޑް ކަޕެއްގައި އެ ގައުމަށް ލިބުނު އެންމެ ބޮޑު ކާމިޔާބީއެވެ. މިފަހަރުގެ މުބާރާތަކީ ޕޯޗުގަލްއަށް ފުރަތަމަ ފަހަރަށް ވޯލްޑް ކަޕް ކާމިޔާބުކޮށްދީ، އޭނާގެ ފުޓްބޯޅަ ހަޔާތް ފުރިހަމަކުރުމަށް ލިބޭ ފަހު ފުރުސަތެވެ.
ޕޯޗުގަލްގެ ހެޑް ކޯޗު ރޮބާޓޯ މާޓިނޭޒް ވަނީ ރޮނާލްޑޯގެ ޕްރޮފެޝަނަލްކަމާއި ޓީމަށް ހުރި ނުފޫޒަށް ތައުރީފުކޮށްފައެވެ. އޭނާ ބުނީ ރޮނާލްޑޯ ޓީމުން ޖާގަ ހޯދަނީ އޭނާގެ ނަމުގެ ސަބަބުން ނޫން ކަމަށާއި، ދައްކަމުންދާ މޮޅު ކުޅުމުގެ ސަބަބުން ކަމަށެވެ.
2003 ވަނަ އަހަރު ގައުމީ ޓީމަށް ކުޅެން ފެށި ރޮނާލްޑޯއަކީ މިހާރު ބައިނަލްއަގުވާމީ ފުޓްބޯޅައިގައި އެންމެ ގިނަ ލަނޑު ޖަހައި، އެންމެ ގިނަ މެޗު ކުޅުމުގެ ރެކޯޑް އޮތް ކުޅުންތެރިޔާއެވެ.
ދުނިޔޭގެ އެކި ކަންކޮޅުތަކުގައި ތިބި ފުޓްބޯޅަ ސަޕޯޓަރުންނަށް މިފަހަރުގެ ވޯލްޑް ކަޕް ވެގެންދާނީ ހަމައެކަނި މުބާރާތަކަށް ނޫނެވެ. އެއީ ފުޓްބޯޅައިގެ އެންމެ ބޮޑު އެއް އައިކަން، ކްރިސްޓިއާނޯ ރޮނާލްޑޯއަށް އަލްވަދާއު ކިޔުމުގެ މުބާރާތެވެ.
Ads by MACL
