ބުދަ، 18 ނޮވެމްބަރު 2026
ޚަބަރު

ޔޫތު ޗެމްޕިއަންޝިޕް: ކެޔޮދޫ ކޮޅަށް 7 ލަނޑު ޖަހައި ނިއުގެ ފުރަތަމަ މޮޅު ހޯދައިފި

ޔޫތު ޗެމްޕިއަންޝިޕް: ކެޔޮދޫ ކޮޅަށް 7 ލަނޑު ޖަހައި ނިއުގެ ފުރަތަމަ މޮޅު ހޯދައިފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރިއަށްގެންދާ 19 އަހަރުން ދަށުގެ ޔޫތު ޗެމްޕިއަންޝިޕްގައި ވާދަކުރަމުން އަންނަ ނިއު ރޭޑިއަންޓް ސްޕޯޓްސް ކްލަބުން، ވ. ކެޔޮދޫގެ މައްޗަށް 7-1 ގެ ބޮޑު ތަފާތަކުން ކުރި ހޯދައި މުބާރާތުގައި އެ ޓީމުގެ ފުރަތަމަ މޮޅު މިރޭ ހޯދައިފިއެވެ.

ގަލޮޅު ދަނޑުގައި ކުޅުނު މި މެޗުން ލިބުނު މޮޅާއެކު ނިއު އިން ވަނީ މުބާރާތުގެ ފޯރިގަދަކޮށް، ތާވަލުގެ ކުރީބަޔަށް ޖެހިލުމުގެ އުންމީދު އާކޮށްފައެވެ.

މި މުބާރާތުގައި ނިއު އިން ކުޅުނު ފުރަތަމަ ދެ މެޗު ވެސް ނިމުނީ އެއްވަރުވެގެންނެވެ. އެގޮތުން އޮޑި ސްޕޯޓްސް ކްލަބާ ދެކޮޅަށް ކުޅުނު މެޗު 1-1 އިން އެއްވަރުވިއިރު، މާޒިޔާ ސްޕޯޓްސް އެންޑް ރެކްރިއޭޝަނާ ބައްދަލުކުރި މެޗު ނިމުނީ 3-3 އިންނެވެ. ނަމަވެސް މިރޭގެ މެޗުގައި ނިއުގެ ފަރާތުން ފެނިގެންދިޔައީ މޮޅު ކުޅުމެކެވެ.

މެޗުގެ ފުރަތަމަ ހާފުގައި ނިއު އިން ވަނީ ތިން ލަނޑުގެ ލީޑެއް ނަގައިފައެވެ. މެޗުގެ 15 ވަނަ މިނިޓުގައި އަޔާން ހަސަން ޝަރީފް ފުރަތަމަ ލަނޑު ޖަހައިދިންއިރު، އޭގެ ހަތް މިނިޓު ފަހުން އަހުމަދު މާއިން މުހައްމަދު ވަނީ ދެވަނަ ލަނޑު ކާމިޔާބުކޮށްދީފައެވެ. ފުރަތަމަ ހާފުގެ އިތުރު ވަގުތުގައި މުހައްމަދު އިޒާން އަލީ ވަނީ ނިއުއަށް ތިންވަނަ ލަނޑު ހޯދައިދީފައެވެ.

ދެވަނަ ހާފު ފެށިތާ ހަތަރުވަނަ މިނިޓުގައި ޒާކީ މުޖުތަބާ ޒާހިރު ހަތަރުވަނަ ލަނޑު ޖެހިތާ ތިން މިނިޓު ފަހުން، ކެޔޮދޫން އެ ޓީމުގެ ހަމައެކަނި ލަނޑު ޕެނަލްޓީއަކުން ޖެހީ މުހައްމަދު ޝައްމާހު ސަލާހުއެވެ. މެޗުގެ 69 ވަނަ މިނިޓުގައި އަބްދުﷲ އާއިޝް އަލީ، އަދި އޭގެ ހަ މިނިޓު ފަހުން އަހުމަދު ހަމްދާން އަޒްލީން ނިއުއަށް ލަނޑުތައް ކާމިޔާބުކޮށްދިންއިރު، މެޗުގެ ފަހު ލަނޑު އިތުރު ވަގުތުގައި ޖަހައިދިނީ ޒާކީއެވެ.

ލީގު އުސޫލުން ކުރިއަށްދާ މި މުބާރާތުގައި ކޮންމެ ޓީމަކުން ވެސް މިހާރު ތިން މެޗު ކުޅެފައިވެއެވެ. ލަނޑުގެ ތަފާތުން ހަތް ޕޮއިންޓާއެކު ތާވަލުގެ އެއްވަނައިގައި މާޒިޔާ އޮތްއިރު، ހަމަ އެ އަދަދަށް ޕޮއިންޓް ހޯދައިގެން ދެވަނައިގައި އޮތީ އޮޑި ސްޕޯޓްސް ކްލަބެވެ. ފަސް ޕޮއިންޓާއެކު ނިއު ތިންވަނައިގައި އޮތްއިރު، ބުރު އާއި ކެޔޮދޫއަށް ލިބިފައިވަނީ ތިން ޕޮއިންޓެވެ.

މުބާރާތުގެ މެޗުތައް ދެން އޮންނާނީ ބުރާސްފަތި ދުވަހުއެވެ. ބުރާސްފަތި ދުވަހު ބުރު އާއި އޮޑި ބައްދަލުކުރާއިރު، އެ ރޭ ނިއު ނުކުންނާނީ ޓީސީއާ ދެކޮޅަށެވެ. އަދި ހުކުރު ދުވަހުގެ ރޭ މާޒިޔާ އާއި ކެޔޮދޫ ވާދަކުރާނެއެވެ. ލީގު ބުރު ނިމުމުން އެންމެ ގިނަ ޕޮއިންޓް ހޯދާ ދެ ޓީމު މި މަހުގެ 17 ވަނަ ދުވަހު ފައިނަލުގައި ބައްދަލުކުރާނެއެވެ.