ނުކުޅެދުންތެރިކަން ހުންނަ މީހުންނަށް ވަޒީފާ ދޭންޖެހޭ ދާއިރާތައް އިސްލާހުކޮށް، އަމިއްލަ ސެކްޓަރަށް ވެސް ހުޅުވާލައިފި
ނުކުޅެދުންތެރިކަން ހުންނަ ފަރާތްތަކަށް ވަޒީފާގެ މާހައުލުން ހަމަހަމަ ފުރުސަތުތަކެއް ހޯދައިދިނުމަށް ހެދި "ނުކުޅެދުންތެރިކަން ހުންނަ ފަރާތްތަކަށް ވަޒީފާ ހަމަޖެއްސުމުގެ އާންމު މިންގަނޑު" އަށް ސަރުކާރުން މުހިންމު ބަދަލުތަކެއް ގެނެސް، އަމިއްލަ ކުންފުނިތަކާއި ދައުލަތުގެ އިދާރާތައް ހިމެނޭހެން މި އުސޫލު ހިނގާނެ ދާއިރާތައް އިއްޔެ ތަފްސީލުކޮށްދީފިއެވެ.
މި ގެނެވުނު އިސްލާހުތަކުގެ ސަބަބުން ވަޒީފާ ފަހިކޮށްދިނުމުގައި އަމަލުކުރަންވީ ގޮތް ކުރިއަށްވުރެ ބޮޑަށް ސާފުވެގެންދާނެއެވެ.
އަލަށް ގެނައި ބަދަލުތަކަށް ބަލާއިރު، ސިވިލް ސަރވިސްގެ ދާއިރާގައި ނުކުޅެދުންތެރިކަން ހުންނަ މީހުންނަށް ވަކި މަޤާމުތަކެއް ޚާއްޞަކުރާނީ ސިވިލް ސަރވިސް ކޮމިޝަނުންނެވެ. ދައުލަތުގެ ވަޒީފާތަކުގައި އެފަދަ ފަރާތްތަކުގެ ހިއްސާ އިތުރުކުރުމަށްޓަކައި މަޤާމުތައް ކަނޑައެޅުން މިހާރު ވަނީ އެ ކޮމިޝަނަށް މަތިކޮށްފައެވެ.
Ads by BMLމީގެ އިތުރުން، ސަރުކާރު ހިއްސާވާ ކުންފުނިތަކުގައި ނުކުޅެދުންތެރިކަން ހުންނަ ފަރާތްތަކަށް ޚާއްޞަ ކުރާނެ ވަޒީފާތައް ކަނޑައެޅުމުގެ އިޚްތިޔާރު ދީފައިވަނީ އެ ކުންފުންޏެއްގެ ބޯޑަށް ނުވަތަ ކުންފުނިން ކަނޑައަޅާ ވަކި އުސޫލެއްގެ ދަށުންނެވެ.
ހަމައެއާއެކު، މިފަދަ ވަޒީފާތަކަށް މީހުން ހޯދަން ކުރާ އިޢުލާނުތައް، ނުކުޅެދުންތެރިކަން ހުންނަ މީހުންގެ ޙައްޤުތަކަށް ވަކާލާތުކުރާ ޖަމުޢިއްޔާތަކާ ހިއްސާކުރުން މި އިސްލާހުން ވަނީ މަޖުބޫރުކޮށްފައެވެ. އަދި މި އިޢުލާނުތައް ވީހާވެސް ގިނަ ބަޔަކަށް ފޯރުކޮށްދިނުމަށްޓަކައި، ކަމާބެހޭ މިނިސްޓްރީއާއި ވަޒީފާދޭ އިދާރާތައް ގުޅިގެން ހަރުދަނާ މަސައްކަތްތަކެއް ކުރަންޖެހޭނެ ކަމަށް ވެސް މި ބަދަލުގައި ބަޔާންކޮށްފައިވެއެވެ.
Ads by MACL
