ގއ. އަތޮޅު ތައުލީމީ މަރުކަޒުގެ އިންޓަ ހައުސް ފުޓުސަލް އަދި ނެޓްބޯޅަ މުބާރާތް ފެށުމަށް ތައްޔާރުވެއްޖެ
ގއ. އަތޮޅު ތައުލީމީ މަރުކަޒާއި މޭރީ ސްޕޯޓްސް ގުޅިގެން ބާއްވާ އެ ސްކޫލުގެ އިންޓަ ހައުސް ފުޓުސަލް އަދި ނެޓްބޯޅަ މުބާރާތް މިއަދު ފެށުމަށް ތައްޔާރުވެއްޖެއެވެ. މި މުބާރާތަކީ ދަރިވަރުންގެ މެދުގައި ކުޅިވަރުގެ ރޫހު އާލާކޮށް، ހުނަރުވެރި ދަރިވަރުން ބިނާކުރުމުގެ މަގްސަދުގައި ކުރިއަށްގެންދާ ހަރަކާތެކެވެ.
މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެ އޭޖް ކެޓެގަރީއަކަށް ބަހާލައިގެންނެވެ. އެއީ ގްރޭޑް 7 އަދި 8 ގެ ކެޓެގަރީގެ އިތުރުން ގްރޭޑް 9، 10، 11 އަދި 12 އެކުލެވޭ ކެޓެގަރީއެވެ. ފުޓުސަލް މުބާރާތެކޭ އެއްގޮތަށް ނެޓްބޯޅަ މުބާރާތް ވެސް ކުރިއަށްދާނީ މި ދެ އޭޖް ކެޓެގަރީއަށް ބަހާލައިގެންނެވެ.
މި ދެ މުބާރާތުގައި އެ ސްކޫލުގެ ޖުމުލަ 200 އަށްވުރެ ގިނަ ދަރިވަރުން ބައިވެރިވާނެ ކަމަށް މައުލޫމާތު ލިބެއެވެ. މިއީ ސްކޫލުގެ ގިނަ އަދަދެއްގެ ދަރިވަރުންނަށް އެކި ކުޅިވަރުތަކުން ފުރުސަތު ހޯދައިދިނުމަށް ކުރެވޭ މުހިންމު މަސައްކަތެކެވެ.
Ads by BMLމުބާރާތުގެ ހުރިހާ މެޗުތަކެއް ވެސް ކުރިއަށް ގެންދިއުމަށް ނިންމާފައިވަނީ ގއ. ވިލިނގިލީ ފިޓްނަސް އެންޑް ރިކްރިއޭޝަން ސެންޓަރުގައެވެ. މި ދެ މުބާރާތުގައި ޖުމުލަ 32 މެޗު ކުޅުމަށް ވަނީ ތާވަލުކުރެވިފައެވެ.
މޭރީ ސްޕޯޓްސް އާއި ގއ. އަތޮޅު ތައުލީމީ މަރުކަޒު ގުޅިގެން މި މުބާރާތް ފެށުމަށް މިހާރު ދަނީ އެންމެ ފަހުގެ ތައްޔާރީތައް ވަމުންނެވެ.
Ads by MACL
