ވޯލްޑް ކަޕް 2026: ބަލިވުމުގެ ސަބަބުން އިނގިރޭސި މިޑްފީލްޑަރު ޑެކްލަން ރައިސް ޓީމުން އެކަހެރިކޮށްފި
ފީފާ ވޯލްޑް ކަޕް 2026 ގެ ކުއާޓާ ފައިނަލްގައި ނޯވޭއާ ދެކޮޅަށް ކުޅޭ މެޗަށް އިނގިރޭސި ޓީމުން ތައްޔާރުވަމުންދަނިކޮށް، އެ ޓީމުގެ މުހިންމު މިޑްފީލްޑަރު ޑެކްލަން ރައިސް ބަލިވުމާ ގުޅިގެން އެކަހެރިކޮށްފިއެވެ.
އާސެނަލްއަށް ކުޅެމުން އަންނަ ރައިސް ބަލިވުމުގެ ސަބަބުން ޖެހިޖެހިގެން ދެ ފަރިތަކުރުން މަތިން ވަނީ މަދުވެފައެވެ. އިނގިރޭސި މެޑިކަލް ޓީމުން އޭނާ އެކަހެރިކުރަން ނިންމީ، މުބާރާތުގެ މުހިންމު މެޗެއް ކުރިއަށް އޮއްވާ ޓީމުގެ އެހެން ކުޅުންތެރިންގެ މެދުގައި ބަލި ފެތުރުނަ ނުދިނުމަށް އަޅާ ރައްކާތެރިކަމުގެ ފިޔަވަޅެއްގެ ގޮތުންނެވެ.
ރިޕޯޓްތައް ބުނާގޮތުން ރައިސް ބަލިވެފައިވަނީ މިއާމީގައި ނޯވޭއާ ދެކޮޅަށް ކުޅޭ މެޗަށް ތައްޔާރުވަމުން ދަނިކޮށް ފެތުރެން ފެށި ރޯގާއެއްގެ ސަބަބުންނެވެ. މެޑިކަލް ޓީމުން އުމުރުން 27 އަހަރުގެ ރައިސްގެ ހާލަތު ވަރަށް ގާތުން ބަލަމުންދާއިރު، މެޗުގެ ކުރިން އޭނާ ފަރިތަކުރުންތަކުގައި ބައިވެރިވެވޭ ވަރަށް ރަނގަޅުވާނެ ކަމަށް އުންމީދު ކުރެވެއެވެ.
Ads by BMLމިއީ ހަމައެކަނި ސިއްހީ ސަބަބުތަކަށްޓަކައި އެޅި ފިޔަވަޅެއް ކަމަށާއި، މީގެ ފަހަތުގައި އެއްވެސް ޑިސިޕްލިނަރީ މައްސަލައެއް ނެތްކަން ވަނީ ކަށަވަރުކޮށްދީފައެވެ. އިނގިރޭސި ކޯޗިން ޓީމުގެ ބޭނުމަކީ ނޮކްއައުޓް މަރުހަލާގެ މެޗުގެ ކުރިން މުޅި ޓީމަށް ބަލި ފެތުރުން ހުއްޓުވުމެވެ.
އިނގިރޭސި ކޯޗު ތޯމަސް ޓުޗެލް މިހާރު ހުރީ ރައިސްގެ ހާލަތާމެދު ވަރަށް ބޮޑު ކަންބޮޑުވުމެއްގައެވެ. ރައިސްއަކީ މި މުބާރާތުގައި އިނގިރޭސި މިޑްފީލްޑްގައި އެންމެ މުހިންމު ދައުރެއް އަދާކުރާ، ޓީމަށް ހަމަޖެހުން ގެނެސްދޭ ކުޅުންތެރިޔާއެވެ.
ރައިސްގެ އިތުރުން އިނގިރޭސި ޓީމަށް ވަނީ އަނިޔާގެ އެހެން މައްސަލަތަކެއްވެސް ކުރިމަތިވެފައެވެ. އެގޮތުން ޑިފެންޑަރު މާކް ގުއޭހީގެ ފައިގެ ފަހަތު މަސްގަނޑަށް އަނިޔާވެފައިވާއިރު، ޖަރެލް ކުއާންސާ ހުރީ ސަސްޕެންޝަނުގައެވެ. ނަމަވެސް އަނިޔާގައި ހުރި ރީސް ޖޭމްސް ވަނީ އަލުން ފަރިތަކުރުންތަކަށް ނުކުމެފައެވެ.
ރައިސްއަކީ މި މުބާރާތުގައި ބުރަކަށީގެ މައްސަލަތަކަކާއެކުވެސް ކުޅެމުން އައި ކުޅުންތެރިއެކެވެ. އެހެންކަމުން މި ފަހަރު ދިމާވި ބަލިމަޑުކަމަކީ ކޯޗިން ޓީމަށް އިތުރުވި ބޮޑު ތަކުލީފެކެވެ. އެހެންނަމަވެސް، މެޑިކަލް ޓީމުން ގަބޫލުކުރާ ގޮތުގައި މިއީ ކުރު މުއްދަތެއްގެ ބައްޔެކެވެ.
"ރައިސް ނެތްނަމަ އިނގިރޭސި ޓީމަށް ވަރަށް ބޮޑު އުނިކަމެއް ލިބޭނެ. އޭނާއަކީ ޓީމުގެ ޑިފެންސް ރައްކާތެރިކޮށްދީ، ކުޅުން ކޮންޓްރޯލް ކުރުމުގައި އެންމެ މުހިންމު ކުޅުންތެރިޔާ،" ރިޕޯޓްތައް ބުނެއެވެ.
ރައިސްއަށް ނުކުޅެވޭ ހާލަތެއްގައި ކޯބީ މައިނޫ ނުވަތަ ކޯނޯ ގަލަގާ ފަދަ ކުޅުންތެރިއަކު ފެނުމުގެ ފުރުސަތު އެބައޮތެވެ.
އާލިން ހާލަންޑް ފަދަ ނުރައްކާތެރި ކުޅުންތެރިން ހިމެނޭ ނޯވޭ ޓީމާ ދެކޮޅަށް ކުޅޭ މެޗުގެ ކުރިން ރައިސްގެ ހާލަތަށް ބަލައި ގޮތެއް ނިންމާނީ މެޗު ފެށުމާ ކައިރިކޮށެވެ.
Ads by MACL
