ރޮނާލްޑޯ ވިޔަސް ރަނގަޅު ކުޅުމެއް ނުދެއްކޭ ނަމަ ފުރުސަތު ނުދޭނަން: ޖޯޖް ޖީސަސް
ޕޯޗުގަލްގެ ގައުމީ ޓީމުގެ އާ ހެޑް ކޯޗު ޖޯޖް ޖީސަސް، ކްރިސްޓިއާނޯ ރޮނާލްޑޯއާ މެދު ގެންގުޅޭނެ އުސޫލު ހާމަކޮށްފިއެވެ. ޖީސަސް ބުނި ގޮތުގައި ރޮނާލްޑޯއަށް ފުރަތަމަ އެގާރައިން ޖާގަ ދިނުމާއި، މެޗެއްގައި ކުޅެން ލިބޭ ވަގުތު ކަނޑައަޅާނީ އޭނާގެ މަޝްހޫރުކަމަށް ބަލާފައެއް ނޫނެވެ. އޭގެ ބަދަލުގައި ބަލާނީ ދަނޑުމަތީގައި ދައްކާ ކުޅުމަށެވެ.
2026 ވަނަ އަހަރުގެ ފީފާ ވޯލްޑް ކަޕަށްފަހު ރޮބާޓޯ މާޓިނޭޒްގެ ބަދަލުގައި މަގާމާ ހަވާލުވި ޖީސަސް މިހެން ބުނީ، ވޯލްޑް ކަޕްގެ ހުރިހާ މެޗެއްގައި ކަހަލަ ގޮތަކަށް ރޮނާލްޑޯ 90 މިނެޓު ކުޅެފައިވާތީ، ކުރިއަށް އޮތް ތަނުގައިވެސް އެގޮތަށް އަމަލުކުރާނެތޯ ނޫސްވެރިން ސުވާލުކުރުމުންނެވެ. ޖީސަސް ފާހަގަކުރި ގޮތުގައި ކޮންމެ ކުޅުންތެރިއަކާ މެދުވެސް އަމަލުކުރާނީ އެއް ހަމައަކުންނެވެ.
"ކްރިސްޓިއާނޯ ކޮންމެ މެޗެއްގައި ކަހަލަ ގޮތަކަށް 90 މިނެޓު ކުޅެފައިވޭ. އަހަރެން އަބަދުވެސް ބުނާނީ އެއީ މެޗަށް ބިނާވާ ކަމެއް ކަމަށް. ކުރިއާލާ އަހަންނަށް ޖަވާބެއް ނުދެވޭނެ. ކޯޗުންގެ ހައިސިއްޔަތުން އަހަރެމެންނަށް މުހިންމީ ކުޅުންތެރިޔާގެ ކުޅުން. ކުޅުންތެރިޔާގެ ނަމަކަށް ބެލުމެއް ނެތި، އެދެވޭ ފެންވަރެއްގެ ކުޅުމެއް ނުދެއްކޭ ނަމަ ބަދަލުކުރަން ޖެހޭނެ،" ޖީސަސް ބުންޏެވެ.
އާ ކޯޗުގެ ކުޅުމަށް އިސްކަންދޭ ފަލްސަފާއެއް
އުމުރުން 71 އަހަރުގެ ކޯޗު ބުނި ގޮތުގައި މެޗުތަކުގައި ކުޅުންތެރިން ބަދަލުކުރުމުގައި ބަލާނީ ޓެކްޓިކަލް ބޭނުންތަކަށާއި، ކުޅުންތެރިޔާގެ ފިޓްނަސް އަދި މެޗުގައި ދައްކާ ކުޅުމަށެވެ. ރޮނާލްޑޯއަކީ ޕޯޗުގަލްގެ ފުޓްބޯޅައިގެ ލެޖެންޑެއް ކަމަށް ގަބޫލުކުރި ނަމަވެސް، އެއްވެސް ކުޅުންތެރިއަކަށް މެޗެއް އެއްކޮށް ކުޅެވޭނެ ކަމުގެ ޔަގީންކަން އޮޓޮމެޓިކުން ނޯންނާނެ ކަމަށް އޭނާ އިޝާރާތްކުރިއެވެ.
ޖީސަސް އާއި ރޮނާލްޑޯއަކީ މީގެ ކުރިން އަލް ނަސްރުގައި އެކުގައި މަސައްކަތްކޮށް، ގާތް ގުޅުމެއް އޮންނަ ދެމީހުންނެވެ. ޖީސަސް ވަނީ ރޮނާލްޑޯގެ ޕްރޮފެޝަނަލްކަމާއި ގައުމީ ޓީމަށް އޭނާގެ މުހިންމުކަން ފާހަގަކޮށްފައެވެ. ނަމަވެސް، އޭނާ ބުނީ ފުޓްބޯޅައިގެ ނިންމުންތައް އަބަދުވެސް ނިންމާނީ ޓީމަށް އެންމެ ރަނގަޅު ގޮތަށް ބަލައިގެން ކަމަށެވެ.
ޕޯޗުގަލްގެ އާ ފެށުން
ޕޯޗުގަލްގެ ފުޓްބޯޅަ ފެޑެރޭޝަނުން ޖީސަސްއާ ޓީމު ހަވާލުކުރީ ޔޫއެފާ ނޭޝަންސް ލީގާއި، ޔޫރޯ 2028 އަދި 2030 ވަނަ އަހަރުގެ ވޯލްޑް ކަޕަށް ޓީމު ތައްޔާރުކުރުމަށެވެ. ރޮނާލްޑޯ 2026 ގެ ވޯލްޑް ކަޕަށްފަހު ބައިނަލްއަގުވާމީ ފުޓްބޯޅައިން ރިޓަޔާކުރާނެ ކަމަށް ބެލެވުނު ނަމަވެސް، އޭނާ އަދި އެކަން ރަސްމީކޮށް އިއުލާނެއް ނުކުރެއެވެ. ޖީސަސްގެ މި މެސެޖަކީ ޒުވާން ކުޅުންތެރިންނަށާއި ތަޖުރިބާކާރު ކުޅުންތެރިންނަށްވެސް ދިން ސާފު މެސެޖެކެވެ. އެއީ ޓީމުގެ ކާމިޔާބީ އޮތީ ވަކިވަކި ކުޅުންތެރިންގެ ނަމަށްވުރެ ބޮޑަށް، ދަނޑުމަތީގައި ދައްކާ ކުޅުމުގެ މައްޗަށް ކަމެވެ.
Ads by BML
Ads by MACL
