ކުޅިވަރުގެ ތެރެއިން މުޖުތަމައުގެ ގުޅުންތައް ބަދަހިކުރުމަށް ޚާއްސަ އިސްކަމެއް ދެވޭ: މިނިސްޓަރު ރާފިއު
ކުޅިވަރަކީ ހަމައެކަނި ދުޅަހެޔޮ ސިއްހަތަކަށް މުހިންމު ކަމެއް ނޫން ކަމަށާއި، އެއީ މުޖުތަމައުތަކުގެ މެދުގައި އޮންނަ އިޖުތިމާއީ ގުޅުންތައް ބަދަހިކޮށް، އެއްބައިވަންތަކަން އާލާކުރުމަށް އެޅޭ ވަރަށް މުހިންމު ބިންގަލެއް ކަމަށް ކުޅިވަރާއި ފިޓްނަސް އަދި މުނިފޫހިފިލުވުމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.
ޗައިނާގެ ޔުނާން ޕްރޮވިންސުން ރާއްޖެއަށް ކުޅިވަރު ސާމާނު ހަދިޔާކުރުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން މިނިސްޓަރު ރާފިއު ފާހަގަކުރެއްވި ގޮތުގައި، މި އެހީތެރިކަމަކީ ހަމައެކަނި ތަކެތި ހަދިޔާކުރުމަށްވުރެ މާ ފުޅާ ދާއިރާއެއްގައި ދެ ގައުމުގެ ދެމެދުގައި އޮތް ރަހުމަތްތެރިކަމުގެ ގުޅުން ރަމްޒުކޮށްދޭ ކަމެކެވެ. ކުޅިވަރުގެ ތެރެއިން ޒުވާނުންނަށް ފުރުސަތުތައް ފަހިކޮށްދީ، މުސްތަގުބަލުގެ ޖީލުތަކަށް ހިތްވަރުދިނުމުގައި މިފަދަ އެހީތައް ވަރަށް ބޮޑު ދައުރެއް އަދާކުރާ ކަމަށް އެމަނިކުފާނު ވިދާޅުވިއެވެ.
ރާއްޖޭގެ ކުޅިވަރުގެ ދާއިރާ ކުރިއެރުވުމަށް ޗައިނާއިން ދެމުން އަންނަ އެހީތެރިކަން ފާހަގަކުރައްވައި މިނިސްޓަރު ވިދާޅުވީ، ކުޅިވަރު ސާމާނުގެ އިތުރުން އެތުލީޓުންނާއި ކޯޗުން ތަމްރީނުކުރުމަށް ކުރިއަށްގެންދާ ޕްރޮގްރާމްތަކުގެ ސަބަބުން ރާއްޖޭގެ ކުޅުންތެރިންނަށް ބޮޑެތި ކުރިއެރުންތަކެއް ލިބިފައިވާ ކަމަށެވެ. ވޭތުވެދިޔަ އެއް އަހަރު ދުވަހުގެ ތެރޭގައި ޗައިނާއިން މިފަދައިން ރާއްޖެއަށް ކުޅިވަރު ސާމާނު ހަދިޔާކުރި މިއީ ތިންވަނަ ފަހަރުކަން ފާހަގަކުރައްވައި، އެގައުމުގެ ސަރުކާރަށާއި ޔުނާން ޕްރޮވިންސަށް މިނިސްޓަރު ވަނީ ޝުކުރު އަދާކުރައްވާފައެވެ.
މިފަހަރު ލިބުނު ކުޅިވަރު ސާމާނުގެ ތެރޭގައި ފުޓްބޯޅަ، ބާސްކެޓްބޯޅަ އަދި ބެޑްމިންޓަން ފަދަ ދިވެހި ޒުވާނުންގެ މެދުގައި އެންމެ މަގުބޫލު ކުޅިވަރުތަކަށް ބޭނުންވާ ސާމާނު ހިމެނޭއިރު، މިއީ ރާއްޖޭގެ ކުޅިވަރުތައް އަސާސީ ފެންވަރެއްގައި ފުޅާކުރުމަށް ލިބުނު ވަރަށް ބޮޑު އެހީތެރިކަމެއް ކަމަށް ވެސް މިނިސްޓަރު ވިދާޅުވިއެވެ.
Ads by MACL
