ބުދަ، 18 ނޮވެމްބަރު 2026
ޚަބަރު

ޗެރިޓީ މެޗު ކާމިޔާބުކޮށް މާޒިޔާއިން 7 ވަނަ ފަހަރަށް ޝީލްޑް އުފުލާލައިފި

މާޒިޔާއިން ޝީލްޑް އުފުލާލަނީ/ ފޮޓޯ: ޖީލު
މާޒިޔާއިން ޝީލްޑް އުފުލާލަނީ/ ފޮޓޯ: ޖީލު

ފުޓުބޯޅަ ސީޒަން ފެށުމަށް ކުޅުނު ޗެރިޓީ ޝީލްޑް މެޗުގައި ޕެނަލްޓީގައި ނިއުރޭޑިއަންޓް ބަލިކޮށް މާޒިޔާއިން ހަތްވަނަ ފަހަރަށް ޗެރިޓީ ޝީލްޑް އުފުލާލައިފިއެވެ.

އެންމެ ފަހުން ނިއުރޭޑިއަންޓުން ޗެރިޓީ ޝީލްޑް ކާމިޔާބުކުރީ 2014 ވަނަ އަހަރުގައެވެ. އަނެއްކޮޅުން މާޒިޔާ އަކީ ޗެރިޓީ ޝީލްޑް މެޗުގައި އެންމެ ކާމިޔާބު ޓީމެވެ. މާޒިޔާއިން ވަނީ ފަސް ފަހަރެއްގެ މަތިން ޗެރިޓީ ޝީލްޑް ކާމިޔާބުކޮށްފައެވެ.

ރާއްޖޭގެ ފުޓުބޯޅަ ސީޒަން ފަށަން ކުޅޭ ޗެރިޓީ ޝީލްޑް މެޗުގެ އެންމެ ކާމިޔާބު ޓީމަކީ މާޒިޔާއެވެ. މާޒިޔާ އިން ވަނީ މިދިޔަ ސީޒަން ހުޅުވަން ބޭއްވި ޗެރިޓީ ޝީލްޑް މެޗު ވެސް ކާމިޔާބުކޮށްފައެވެ. އެ ފަހަރުގެ ޗެރިޓީ ޝީލްޑް މެޗުގައި މާޒިޔާ އިން ނުކުތީ ކުލަބް އީގަލްސްއާ ދެކޮޅަށެވެ. އެ މެޗު މާޒިޔާ އިން ކާމިޔާބުކުރީ 2-0 ގެ ނަތީޖާ އަކުންނެވެ.

މާޒިޔާއިން ވަނީ 2015، 2016، 2017، 2021، 2023 އަދި 2025 ވަނަ އަހަރު ޗެރިޓީ ޝީލްޑް ކާމިޔާބުކޮށްފައެވެ،

ނިއުއަކީ ކުރިއަށް އޮތް ސީޒަނަށް އެންމެ ކުރިން ފަރިތަކުރުންތައް ފެށީ ޓީމެވެ. އެގޮތުން ނިއުއިން ވަނީ އަންނަ ސީޒަނަށް ތައްޔާރުވުމުގެ ގޮތުން އެ ޓީމުގެ ސްކޮޑަށް ބޮޑެތި ބަދަލުތަކެއް ގެނަސް ގިނަ ކުޅުންތެރިންތަކެއްގެ ސޮއި ވެސް ހޯދައިފައެވެ.

ނިއުއިން ވެސް ވަނީ ޗެރިޓީ ޝީލްޑް ދެ ފަހަރެއްގެ މަތިން ކާމިޔާބުކޮށްފައެވެ. އެއީ 2013 އަދި 2014 ވަނަ އަހަރުގައެވެ.

އެފްއޭއެމް މީޑިއާ ކަލަންޑަރު މިހާތަނަށް ހާމަކޮށްފައިނުވި ނަމަވެސް އަންނަ މަހު ކަޕް ވިނާސް ކަޕް ކުޅެން ނިންމާފައިވެއެވެ. އަދި ދިވެހި ޕްރިމިއާ ލީގު ސެޕްޓެމްބަރު މަހު ފަށާނެ ކަމަށް ބެލެވެއެވެ.

ފާހަގަކޮށްލަން ޖެހޭ ގޮތުގައި މިފަހަރުގެ ފުޓުބޯޅަ ސީޒަނުގައި ބޮޑު ބަދަލެއްގެ ގޮތުގައި، ދިވެހި ލީގުގެ ފޯމެޓަށް ގެނައި ބަދަލާއެކު ޓީމުތައް އިތުރުވުން ފެނިގެންދާނެއެވެ. އެގޮތުން މިދިޔަ ސީޒަނުގައި އަށް ޓީމު ދިވެހި ލީގުގައި ވާދަކުރި ނަމަވެސް މިފަހަރުގެ ލީގުގައި 10 ޓީމު ވާދަކުރާނެއެވެ.

އެފްއޭއެމް އިން މަސައްކަތް ކުރަމުންދަނީ ހޯމް އެންޑް އަވޭ އުސޫލުން މެޗުތައް ކުޅުމަށެވެ. އެއީ މިފަހަރުގެ ލީގުގައި، މާލެއަށް ނިސްބަތްނުވާ ދެ ޓީމެއް ކުޅޭތީއެވެ. އެގޮތުން ލީގުގައި މިފަހަރު ކުޅޭ އަތޮޅުތެރޭގެ ދެ ޓީމަކީ ދެކުނުގެ ޗެމްޕިއަން ގދ. ގައްދޫއާއި އުތުރުގެ ޗެމްޕިއަން ހއ. ދިއްދޫއެވެ.