އަތޮޅުތެރެއިން: އާރްޑީސީ ހުއްޓާނުލާ، 4 ރަށެއްގެ މަޝްރޫއުތަކަށް ބޭނުންވާ ވެހިކަލްތައް ފޮނުވައިފި!
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ މަސައްކަތްތައް އެއްވެސް މެދުކެނޑުމެއްނެތި ކުރިއަށްދާކަން ހާމަކޮށް، ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން އއ. ތޮއްޑޫ، އއ. ހިމަންދޫ، އއ. މާޅޮސް އަދި އއ. ރަސްދޫގައި ހިންގުމަށް ހަމަޖެހިފައިވާ ތަރައްގީގެ މަޝްރޫއުތަކަށް ބޭނުންވާ ވެހިކަލްތަކާއި ބަރު އާލަތްތައް އެ ރަށްރަށަށް ފޮނުވުމުގެ މަސައްކަތް ހަލުވިކަމާއެކު ކުރިއަށްގެންގޮސްފިއެވެ.
މި ރަށްރަށުގައި ސަރުކާރުން އަމާޒުކޮށްފައިވާ އުމްރާނީ ތަރައްގީގެ މަޝްރޫއުތައް ވީއེންމެ އަވަހަކަށް ފަށައި ނިންމުމަށްޓަކައި، ސައިޓްތަކަށް ބޭނުންވާ އުޅަނދުފަހަރު ފޮނުވުމަކީ މަޝްރޫއުތައް ހުއްޓުމެއްނެތި ކުރިއަށް ގެންދިއުމަށް އެޅުނު މުހިންމު ފިޔަވަޅެކެވެ. މަގުހެދުމާއި އަދި އެހެނިހެން ބިނާވެށީގެ ތަރައްގީއަށް ބޭނުންވާ މި ވަސީލަތްތައް ފޯރުކޮށްދިނުމުގެ ސަބަބުން، މަސައްކަތްތަކުގެ ދުވެލި ބާރުވެގެންދާނެ ކަމަށް ބެލެވެއެވެ.
އއ. އަތޮޅުގެ މި ހަތަރު ރަށުގައި ކުރިއަށްދާ އަދި ފަށަން ތައްޔާރުވަމުންދާ މި މަޝްރޫއުތަކުގެ ސަބަބުން، ކުރިއަށް އޮތް ތަނުގައި އެ ރަށްރަށުގެ ރައްޔިތުންނަށް ދަތުރުފަތުރުކުރުމާއި ދިރިއުޅުމުގެ ފެންވަރު ރަނގަޅުވެ، ބޮޑެތި ލުއިފަސޭހަތަކެއް ލިބިގެންދާނެ ކަމަށް އިންތިޒާމުކުރާ ފަރާތްތަކުން ފާހަގަކުރެއެވެ.
Ads by MACL
