އިނގިރޭސިވިލާތުގެ ސަފީރުކަމަށް ޖަމީލާ އައްޔަންކުރަން މަޖިލީހަށް ހުށަހަޅައިފި
ދިވެހިރާއްޖެއިން އިނގިރޭސިވިލާތަށް ކަނޑައަޅާ އާ ސަފީރުގެ ގޮތުގައި، ސިވިލް ސާވިސް ކޮމިޝަން (ސީއެސްސީ) ގެ ކުރީގެ ނައިބު ރައީސް ޖަމީލާ އަލީ ޚާލިދު އައްޔަންކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް މިއަދު ނަންފުޅު ފޮނުއްވައިފިއެވެ.
ރައީސް ފޮނުއްވި މި މައްސަލަ މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި އިއްވުމަށްފަހު، މިހާރު ވަނީ އިތުރަށް ދިރާސާކުރުމަށްޓަކައި މަޖިލީހުގެ ޚާރިޖީ ގުޅުންތަކުގެ ކޮމިޓީއަށް ފޮނުވާފައެވެ. ކޮމިޓީން މައްސަލަ ދިރާސާކޮށް ނިންމާ ގޮތެއްގެ މައްޗަށް ބިނާކޮށް، އެކަމަނާ އެ މަގާމަށް އައްޔަންކުރުމާމެދު ގޮތެއް ނިންމުމަށް ދެން އޮންނާނީ މަޖިލީހުގެ ތަޅުމުގައި ވޯޓަށް އެހުމެވެ.
އިނގިރޭސިވިލާތުގައި ހުންނަވާ ދިވެހިރާއްޖޭގެ ސަފީރުގެ މަގާމު ހުސްވެފައިވަނީ، މީގެ ކުރިން އެ މަގާމުގައި ހުންނެވި ޑރ. އިރުތިޝާމް އާދަމް، މިނިސްޓަރ އޮފް ފޮރިން އެފެއާޒްގެ މަގާމަށް އައްޔަންކުރެއްވުމާ ގުޅިގެންނެވެ. އެހެންކަމުން އެ މަގާމަށް އަލަށް މި ހުށަހެޅުއްވީ ސ. ހިތަދޫ، ނޫރަންވިލާ، ޖަމީލާ އަލީއެވެ.
Ads by BMLމިއީ ސަރުކާރާއި ދައުލަތުގެ ގިނަ އިސް މަގާމުތަކެއް ފުރުއްވާފައިވާ ތަޖުރިބާކާރު ކަނބަލެކެވެ. އެގޮތުން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި، ދިވެހިރާއްޖެއިން ޖަރުމަނުވިލާތަށް ކަނޑައެޅުއްވި ސަފީރުގެ މަގާމުވެސް އެކަމަނާ ވަނީ ފުރުއްވާފައެވެ.
ސިޔާސީ އަދި ޚާރިޖީ ދާއިރާގެ އިތުރުން ޖަމީލާ ވަނީ ރާއްޖޭގެ ތަޢުލީމީ ދާއިރާގައިވެސް ގިނަ އަހަރުތަކެއް ވަންދެން ޚިދުމަތް ކުރައްވާފައެވެ. އޭގެ އިތުރުން، ދިވެހިރާއްޖޭގެ އަޑާއި ޓެލެވިޜަން މޯލްޑިވްސް މެދުވެރިކޮށް މީޑިއާގެ ދާއިރާއިންވެސް ފާހަގަކޮށްލެވޭ ފަދަ މުހިންމު ޚިދުމަތްތަކެއް އެކަމަނާ ވަނީ ޤައުމަށް ކޮށްދެއްވާފައެވެ.
Ads by MACL
