ރާއްޖެއަށް ޕޯސްޓުން ފޮނުވި 3.2 ކިލޯގެ ކެނަބިސް ކަސްޓަމްސްގެ ބެލުމުގެ ދަށަށް
ގަވާއިދާ ޚިލާފަށް ރާއްޖެއަށް އެތެރެކުރަން އުޅުނު ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ. ޕޯސްޓުގެ ޒަރީއާއިން ރާއްޖެ ގެނެސްފައިވާ ޕެކޭޖަކުން ފެނިފައިވަނީ 3.2 ކިލޯއަށްވުރެ ގިނަ ކެނަބިސްކަމަށް އެ އިދާރާއިން ވަނީ ހާމަކޮށްފައެވެ.
މިދިޔަ ހޮނިހިރު ދުވަހު މި ތަކެތި އަތުލައިގަނެވިފައިވަނީ ޕޯސްޓް މެދުވެރިކޮށް ގެނެސްފައިވާ ޕެކޭޖުތައް ކަސްޓަމްސްގެ އޮފިސަރުން ބަލައި ފާސްކުރުމުގެ ތެރޭގައެވެ. އާންމު އުސޫލުން ޕެކޭޖެއް ޗެކްކުރަމުން ދަނިކޮށް، އޭގެ ތެރޭގައި މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން އިތުރަށް ބަލައި ފާސްކުރުމުން އެ ޕެކޭޖުގެ ތެރެއިން ވަނީ ކެނަބިސް ފެނިފައެވެ.
ރާއްޖެއަށް އެތެރެކުރާ މަސްތުވާތަކެތި ހުއްޓުވުމަށް ކަސްޓަމްސްއިން ހަރުކަށި ފިޔަވަޅުތަކެއް އަޅަމުންދާއިރު، ފަހަކަށް އައިސް މިފަދަ ގިނަ މައްސަލަތަކެއް ދަނީ ފެންމަތިވަމުންނެވެ. އެގޮތުން، މި ހިނގާ އޮގަސްޓު މަހުގެ ފަސްވަނަ ދުވަހުވެސް އިންޑިއާއިން ރާއްޖެ އައި ފަސިންޖަރެއްގެ ލަގެޖުގައި ފޮރުވައިގެން ގެނައި ބައި ކިލޯގެ ކެނަބިސް ކަސްޓަމްސްއިން ވަނީ އަތުލައިގަނެފައެވެ.
Ads by BMLމީގެ އިތުރުން، ފާއިތުވި ޖުލައި މަހުގެ 29 ވަނަ ދުވަހު ކަނޑުމަގުން ރާއްޖެ އެތެރެކުރަން މަސައްކަތްކުރި ގިނަ އަދަދެއްގެ މަސްތުވާތަކެތިވެސް ކަމާބެހޭ ފަރާތްތަކުން ވަނީ ހޯދާފައެވެ. މިފަދަ އޮޕަރޭޝަންތައް ކާމިޔާބުކަމާއެކު ހިންގަމުންދަނީ މަސްތުވާތަކެތީގެ ވަބާއިން މުޖުތަމައު ސަލާމަތްކުރުމަށްޓަކައި ރާއްޖޭގެ ބޯޑަރުތަކުގައި ފާރަވެރިވުން އިތުރުކޮށްފައިވާ ދަނޑިވަޅެއްގައެވެ.
Ads by MACL
