ބުދަ، 18 ނޮވެމްބަރު 2026
ޚަބަރު

"މޯލްޑިވްސް ޕްރިމިއާ ބޭންކް" ރައީސް އިފްތިތާޙުކޮށްދެއްވައިފި

"މޯލްޑިވްސް ޕްރިމިއާ ބޭންކް" ރައީސް އިފްތިތާޙުކޮށްދެއްވައިފި

ދިވެހިރާއްޖޭގެ އިޤްތިޞާދާއި މާލީ ދާއިރާ އިތުރަށް ފުޅާކޮށް ހަރުދަނާކުރުމުގެ އަމާޒާއެކު، ރާއްޖޭގައި ވިޔަފާރީގެ އުޞޫލުން ހިންގާ ނުވަވަނަ ބޭންކުގެ ގޮތުގައި "މޯލްޑިވްސް ޕްރިމިއާ ބޭންކް" (އެމް.ޕީ.ބީ) ރަސްމީކޮށް މިރޭ ރައީސް އިފްތިތާޙުކޮށްދެއްވައިފިއެވެ.

ބާސެލޯ ނަސަންދުރާގައި މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައި، މި އާ ބޭންކު އިފްތިތާޙުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.

ރަސްމީކޮށް ބޭންކު ހުޅުވުމާއެކު، އާންމުންނަށް ޚިދުމަތް ދިނުމަށްޓަކައި އެ ބޭންކުގެ ފުރަތަމަ ބްރާންޗުވެސް މިއަދު ވަނީ ހުޅުވާފައެވެ. މީގެ އިތުރުން ޒަމާނީ ޓެކްނޮލޮޖީއާއެކު ކަސްޓަމަރުންނަށް ފަސޭހައިން ޚިދުމަތް ހޯދޭނެ މަގު ތަނަވަސްކޮށްދިނުމުގެ ގޮތުން، ބޭންކުގެ މޯބައިލް އެޕްލިކޭޝަނާއި އިންޓަނެޓް ބޭންކިންގ ޕޯޓަލް ވެސް މިރޭގެ ރަސްމިއްޔާތުގައި ވަނީ ތަޢާރަފުކޮށްފައެވެ. މި ބޭންކުގެ މައި އިދާރާ ޤާއިމުކޮށްފައިވަނީ މާލޭގެ ހ. ސަންލީޓުގެ ފުރަތަމަ އަދި ފަސްވަނަ ފަންގިފިލާގައެވެ.

މި ރަސްމިއްޔާތުގައި ވާހަކަފުޅުދައްކަވަމުން މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) ގެ ގަވަރުނަރު އަޙްމަދު މުނައްވަރު ވަނީ، ރާއްޖޭގެ މާލީ ދާއިރާއަށް އަންނަމުންދާ ކުރިއެރުންތަކުގެ މައްޗަށް އަލިއަޅުއްވާލައްވާފައެވެ. ގަވަރުނަރު ވިދާޅުވި ގޮތުގައި، މިހާރު ރާއްޖޭގެ އިޤްތިޞާދުގެ 6 އިންސައްތަ ހިއްސާކުރާ މާލީ ދާއިރާގެ ނިސްބަތް، ކުރިއަށް އޮތް ތަނުގައި ދެގުނައަށް އިތުރުކުރުމަކީ މަރުކަޒީ ބޭންކުގެ ވަރަށް ބޮޑު އަމާޒެކެވެ. އަދި ބޭންކިންގ ދާއިރާއަކީ ދައުލަތަށް ބޮޑު އާމްދަނީއެއް ވައްދައިދޭ ދާއިރާއެއްކަން ފާހަގަކުރައްވައި، ފާއިތުވި އަހަރު ދައުލަތަށް ލިބުނު އިންކަމް ޓެކްސްގެ 14 އިންސައްތައަކީ ބޭންކުތަކުން ދައްކާފައިވާ ފައިސާކަން އޭނާ ހާމަކުރެއްވިއެވެ.

ރާއްޖޭގައި ހިންގާ ބޭންކުތަކުން ލިބޭ ފައިދާގެ ބޮޑު ބައެއް ރާއްޖެއިން ބޭރަށްދާ މައްސަލައަށް އިޝާރާތްކުރައްވައި މުނައްވަރު ވިދާޅުވީ، ފާއިތުވި ފަސް އަހަރުގެ ތެރޭގައި އެކަނިވެސް 200 މިލިއަން ޑޮލަރު ބޭންކުތަކުގެ ފައިދާގެ ގޮތުގައި ރާއްޖެއިން ބޭރުކޮށްފައިވާ ކަމަށެވެ. އެހެންކަމުން، ރަނގަޅު ފެންވަރެއްގައި ހިންގާ ދިވެހި ބޭންކުތައް އުފެދިގެން ދިއުމަކީ އިޤްތިޞާދަށް އޭގެ އެންމެ ހެޔޮ އަސަރުކުރާނެ ކަމެއްކަމަށް ވިދާޅުވިއެވެ. މީގެ އިތުރުން، ބޭންކުތަކުގެ އިސް މަގާމުތަކުގައި މިހާރު ތިބި ބިދޭސީންގެ ނިސްބަތް 40 އިންސައްތައިގައި އޮތްއިރު، ކުރިއަށް އޮތް ފަސް އަހަރުގެ ތެރޭގައި އެ ނިސްބަތް 20 އިންސައްތައަށް ދަށްކޮށް، މެނޭޖްމަންޓް ލެވެލްގައި ދިވެހިންގެ ހިއްސާ 80 އިންސައްތައަށް އިތުރުކުރުމަށް މަސައްކަތްކުރައްވާނެ ކަމުގެ ޔަޤީންކަން ގަވަރުނަރު ދެއްވިއެވެ. މީގެ ސަބަބުން ދިވެހި ޒުވާނުންނަށް މާލީ ދާއިރާއިން ކުރިއަށްދިއުމުގެ ފުރުޞަތުތައް ވަރަށް ބޮޑަށް ފަހިވެގެންދާނެއެވެ.

އަލަށް ހުޅުވި މޯލްޑިވްސް ޕްރިމިއާ ބޭންކަކީ ދިވެހި އިންވެސްޓަރުންގެ ބޮޑު ހިއްސާއެއް އޮވެގެން އުފައްދާފައިވާ ބޭންކެކެވެ. އިކޮނޮމިކް މިނިސްޓްރީގެ ރެކޯޑުތަކުން ދައްކާގޮތުގައި މި ބޭންކުގެ މައިގަނޑު ހިއްސާދާރުންނަކީ، އިމާރާތްކުރުމުގެ ސިނާޢަތުގައި ފާހަގަކޮށްލެވޭ ވިޔަފާރިވެރިޔާ އަދި ރައީސުލްޖުމްހޫރިއްޔާގެ އިކޮނޮމިކް އެންޑް ޓްރޭޑް އެޑްވައިޒަރު މުޙައްމަދު ޢަލީ ޖަނާޙު އާއި އޭނާގެ ހިއްސާ އޮންނަ "އެމް.ޑީ.ވީ ރީ އިންވެސްޓްމަންޓް އެލް.އެލް.ސީ" އެވެ. އަދި ބޭންކުގެ ޗެއަރޕާސަންގެ މަޤާމު ފުރުއްވަނީ ޖަނާޙުގެ ދަރިކަނބަލުން، އައިޝާ ނޫރައިން ޖަނާޙުއެވެ.

މިއީ ދިވެހިރާއްޖޭގެ ބޭންކިންގ ތާރީޚުގައި، ސީދާ ދިވެހި ވިޔަފާރިވެރިންގެ އިސްނެގުމާއެކު އުފެދިގެންދިޔަ މަދު ކޮމާޝަލް ބޭންކުތަކުގެ ތެރެއިން ބޭންކަކަށް ވާއިރު، މީގެ ސަބަބުން ވިޔަފާރިތަކަށާއި އާންމު ފަރުދުންނަށް ލޯނު ނެގުމާއި މާލީ އެހީތެރިކަން ހޯދުމުގައި އިތުރު ފަސޭހަތަކެއް ލިބި، ރާއްޖޭގެ ބޭންކިންގ ސިނާޢަތުގައި ވާދަވެރިކަން ބޮޑުވެގެންދާނެކަމަށް މާލީ ތަޖުރިބާކާރުން ދެކެވަޑައިގަންނަވައެވެ.

މިފަދަ ބޭންކުތައް އައުމަކީ ރާއްޖޭގައި މިހާރު ޑޮލަރުގެ ތާށިކަން ހުރި ދަނޑިވަޅެއްގައި ބޭރު ފައިސާގެ މުޢާމަލާތްތަކަށްވެސް އޭގެ ހެޔޮ ބަދަލުތަކެއް ގެނުވައިފާނެ ކަމެއްގެ ގޮތުގައި ބެލެވެއެވެ.