ބުދަ، 18 ނޮވެމްބަރު 2026
ޚަބަރު

އެންޑީއޭގެ މަސައްކަތްތަކުގައި އޭއައި ބޭނުންކުރަން ފަށަނީ

އެންޑީއޭގެ މަސައްކަތްތަކުގައި އޭއައި ބޭނުންކުރަން ފަށަނީ

ނަފްސާނީ ދުޅަހެޔޮކަމުގެ ޚިދުމަތްތަކާއި ފަރުވާ އިތުރަށް ފުރިހަމަކުރުމަށްޓަކައި، އާޓިފިޝަލް އިންޓެލިޖެންސް (އޭއައި) އަދި ޑޭޓާ ސައިންސް ބޭނުންކުރުމަށް ޗައިނާގެ ޔުނާން ޔުނިވަރސިޓީ އާއި ނޭޝަނަލް ޑްރަގް އެޖެންސީ (އެންޑީއޭ) އާ ދެމެދު ފަހުމުނާމާއެއްގައި ސޮއިކޮށްފިއެވެ.

މި އެއްބަސްވުމުގައި އެންޑީއޭގެ ފަރާތުން ސޮއިކުރެއްވީ އެ އެޖެންސީގެ ޗެއާޕާސަން އަލްއުސްތާޛު އަޙްމަދު ޞިއްދީޤެވެ. މިއީ މަސްތުވާތަކެތީގެ ވަބާއިން މީހުން ސަލާމަތްކުރުމަށް މިހާރު ދެމުންދާ ފަރުވާ އާއި ނަފްސާނީ ދުޅަހެޔޮކަމުގެ ޚިދުމަތްތައް އިތުރަށް ތަރައްގީކުރުމަށް އޭއައި އަދި ޑޭޓާ ސައިންސްގެ ވަސީލަތްތައް ބޭނުންކޮށްގެން ދެ މުއައްސަސާ ގުޅިގެން މަސައްކަތްކުރުމަށް ވެވުނު އެއްބަސްވުމެކެވެ.

މި ފަހުމުނާމާގެ ދަށުން އޭއައި ބޭނުންކޮށްގެން އެކަށީގެންވާ ހައްލުތައް ހޯދުމާއި، އިލްމީ ދިރާސާތައް ކުރުމާއި، ފަންނީ އެހީތެރިކަން ފޯރުކޮށްދިނުމުގެ އިތުރުން މުވައްޒަފުންގެ ގާބިލުކަން އިތުރުކުރުމަށް ތަމްރީނު ދިނުމުގެ ހަރަކާތްތައް ކުރިއަށްދާނެއެވެ. މި މަޝްރޫއުގެ މައިގަނޑު عملی މަސައްކަތްތައް ކުރިއަށްގެންދިއުމަށް ހަމަޖެހިފައިވަނީ އެންޑީއޭގައެވެ.

އެންޑީއޭގެ ޑެޕިއުޓީ ޑައިރެކްޓަރ ޖެނެރަލް އަބްދުﷲ ފަސީޙް ވިދާޅުވި ގޮތުގައި އޭއައި ވަސީލަތްތައް ބޭނުންކުރަން ފެށުމުން އެންޑީއޭއިން ފޯރުކޮށްދޭ ޚިދުމަތްތައް އަވަސްވެ، އެކަމަށް ބޮޑެތި ފަސޭހަތަކެއް ލިބިގެންދާނެއެވެ. މިހާރު ފަރުވާ ހޯދާ މީހުންގެ ސައިކޮލޮޖިކަލް އެސެސްމެންޓް ހެދުމަށް ގިނަ ދުވަސްތަކެއް ހޭދަވި ނަމަވެސް، އޭއައިގެ ސަބަބުން އެސެސްމެންޓް ނަތީޖާއަށް ދިގު އިންތިޒާރެއް ކުރަންނުޖެހި ފަރުވާގެ ކަންކަން އަވަހަށް ފެށޭނެއެވެ.

ނަފްސާނީ ފަރުވާގެ ޚިދުމަތްތައް ސައްވީސް ގަޑިއިރު ފޯރުކޮށްދިނުމުގައި މިހާރު ގޮންޖެހުންތަކެއް ހުރިކަން ފާހަގަކުރައްވައި، އޭއައިގެ ވަސީލަތްތަކާއެކު ކޮންމެ ވަގުތަކު އަދި ކޮންމެ ތަނެއްގައި ހުރެގެންވެސް ޚިދުމަތް ހޯދުމުގެ މަގުފަހިވެގެންދާނެ ކަމަށް ފަސީޙް ވިދާޅުވިއެވެ.

މި މަޝްރޫއު ކުރިއަށްދާނީ ޔުނާން ޔުނިވަރސިޓީގެ ސްކޫލް އޮފް ސޮފްޓްވެއާ އެންޑް އާޓިފިޝަލް އިންޓެލިޖެންސް އާއި އެންޑީއޭ ގުޅިގެންނެވެ. އެ ސްކޫލުން އުފައްދާފައިވާ އޭއައި އެޕްލިކޭޝަނަކީ ނަފްސާނީ ސިއްޚަތުގެ ފަރުވާއަށް ބޭނުންތެރި އެއްޗެއް ނަމަވެސް، އެއީ ޗައިނާގެ މާހައުލަށް ބައްޓަންކޮށްފައިވާ އެޕްލިކޭޝަނަކަށްވާތީ، އެންމެ ފުރަތަމަ ކުރެވޭނެ މަސައްކަތަކީ އެ އެޕްލިކޭޝަން ރާއްޖޭގެ މާހައުލަށް ފެއްތުމެވެ. މީގެއިތުރުން، މި ކަމާ ގުޅޭގޮތުން ފުރިހަމަކުރަންޖެހޭ ޤާނޫނީ ކަންކަން ބަންޑާރަނައިބުގެ އޮފީހާ ގުޅިގެން ކުރިއަށްދާނެއެވެ.

އެއްބަސްވުމުގައި ސޮއިކުރުމުގެ އިތުރުން، ޗައިނާގެ މުއައްސަސާއިން ވަނީ އެ ބޭފުޅުންގެ މަސައްކަތްތައް ހުށަހަޅައިދީ، ކުރިއަށް އޮތް ތަނުގައި މަސައްކަތް ކުރިއަށްގެންދާނެ ގޮތްތަކާ މެދު މަޝްވަރާކޮށްފައެވެ. އަދި އެންޑީއޭގެ މުވައްޒަފުން ތަމްރީނުކުރުމުގެ ހަރަކާތްތައްވެސް ކުރިއަށްދާނެއެވެ.

މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާންގެ އިތުރުން އެންޑީއޭގެ އިސް މަސްއޫލުވެރިންނާއި ޗައިނާގެ ވަފުދުގެ ބޭފުޅުން ބައިވެރިވެވަޑައިގެންނެވިއެވެ.