އިނގުރައިދުއަށް އާ ޖެންސެޓެއް ފެނަކައިން ގެންގޮސްފި
ރ. އިނގުރައިދޫގައި ދެމުންދާ ކަރަންޓުގެ ޚިދުމަތުގެ ފެންވަރު މަތިކޮށް ކެޕޭސިޓީ އިތުރުކުރުމުގެ ގޮތުން އަށްސަތޭކަ ކިލޯވޮޓްގެ އައު ޖެންސެޓެއް އެ ރަށަށް ގެންގޮސް އިންސްޓޯލްކުރުމުގެ މަސައްކަތް ފެނަކަ ކޯޕަރޭޝަނުން ފަށައިފިއެވެ.
ފެނަކައިން މަޢުލޫމާތު ދެއްވާ ގޮތުގައި އެ ރަށަށް ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށްޓަކައި ކުރަމުންދާ މަސައްކަތްތަކުގެ ތެރެއިން، މި ޖެންސެޓް އިންސްޓޯލްކުރުމުގެ ޢަމަލީ މަސައްކަތް މިހާރު ދަނީ ކުރިއަށެވެ. އަދި އަންނަ ހަފުތާގެ ނިޔަލަށް މަސައްކަތް އެއްކޮށް ނިންމައި، އެ ޖެންސެޓުން ރައްޔިތުންނަށް ޚިދުމަތް ދޭން ފެށޭނެ ކަމަށް އެ ކުންފުނިން ބުންޏެވެ.
މި އައު ޖެންސެޓާއެކު އިނގުރައިދޫ އިންޖީނުގެއިން ކަރަންޓު ފޯރުކޮށްދިނުމަށް ޖުމްލަ ހަތަރު ޖެންސެޓެއް ބޭނުންކުރަމުން ދާނެއެވެ. އޭގެ ތެރޭގައި ހިމެނެނީ އަލަށް ގެންދިޔަ އަށްސަތޭކަ ކިލޯވޮޓްގެ ޖެންސެޓްގެ އިތުރުން، ހަސަތޭކަ ކިލޯވޮޓްގެ ޖެންސެޓަކާއި ހަތަރުސަތޭކަ ކިލޯވޮޓްގެ ދެ ޖެންސެޓެވެ. މި ބަދަލާއެކު، މީގެ ކުރިން އެ ރަށުގައި ބޭނުންކުރަމުން އައި ދެސަތޭކަ ފަންސާސް ކިލޯވޮޓްގެ ޖެންސެޓް ބޭނުންކުރުން ހުއްޓާލުމަށް ވަނީ ހަމަޖެހިފާއެވެ.
Ads by BMLއައު ޖެންސެޓް ގެނައުމުގެ ކުރިން އިނގުރައިދޫ އިންޖީނުގޭގެ ޖުމްލަ ކެޕޭސިޓީއަކީ އެއްހާސް ދެސަތޭކަ ކިލޯވޮޓެވެ. ނަމަވެސް، މި ގެނެވުނު ބަދަލާއެކު އެ ރަށުގެ ކަރަންޓު އުފެއްދުމުގެ ޖުމްލަ ޤާބިލުކަން މިހާރު ވަނީ ދެހާސް ދެސަތޭކަ ކިލޯވޮޓަށް މަތިކުރެވިފާއެވެ.
މި މަޝްރޫޢު ފުރިހަމަވެގެން ދިއުމުން، އިނގުރައިދޫގެ ރައްޔިތުންނަށް މެދުކެނޑުމެއްނެތި، އިތުބާރު ހުރި އަދި ފެންވަރު ރަނގަޅު ކަރަންޓުގެ ޚިދުމަތެއް ޔަޤީންވެގެންދާނެ ކަމަށް ފެނަކައިން ބުންޏެވެ.
Ads by MACL
