މ. ބާޑްލައިންގެ އެޕާޓްމަންޓެއްގައި އަލިފާން ރޯވެ، ދުމުގެ އަސަރުކުރި މީހަކަށް ފަރުވާދީފި
މާލޭގެ މައްޗަންގޮޅީގައި ހުންނަ ގެއެއްގެ އެޕާޓްމަންޓެއްގެ ކަރަންޓު ބޯޑުގައި ރޯވެ ހިނގި އަލިފާނުގެ ހާދިސާއަކާ ގުޅިގެން ދުމުގެ އަސަރުކުރި މީހަކަށް ހޮސްޕިޓަލުގައި ފަރުވާދޭން ފަށައިފިއެވެ.
މޯލްޑިވްސް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކުރި ގޮތުގައި، މި ހާދިސާ ހިނގާފައިވަނީ މ. ބާޑްލައިން ގޭގެ 8 ވަނަ ފަންގިފިލާގައި ހުންނަ އެޕާޓްމަންޓް ބީގެ ކަރަންޓު ޑީ-ބޯޑެއްގައި ރޯވުމުގެ ސަބަބުންނެވެ.
ބުރާސްފަތި ދުވަހުގެ ރޭ 8:14 ހާއިރު މި ހާދިސާގެ މައުލޫމާތު ލިބުމާއެކު، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ވަގުތުން އެ ސަރަހައްދަށް ގޮސް އަލިފާންގަނޑު ވަނީ އިތުރަށް ފެތުރުނަ ނުދީ ކޮންޓްރޯލްކޮށް އެއްކޮށް ނިއްވާލާފައެވެ.
Ads by BMLއަލިފާނުގެ ސަބަބުން އެ އެޕާޓްމަންޓުން ކަރަންޓުގެ ހިދުމަތް މެދުކެނޑިފައިވީ ނަމަވެސް، ގޭތެރޭގައި ހުރި އެހެނިހެން މުދަލަކަށް މާބޮޑު ގެއްލުމެއް ލިބިފައި ނުވާ ކަމަށް އޮފިޝަލުން މައުލޫމާތު ދެއެވެ.
ކަރަންޓުގެ ހިދުމަތް ކެނޑުމާ ގުޅިގެން އެ އެޕާޓްމަންޓުގައި ދިރިއުޅެމުންދިޔަ އާއިލާއަށް އެންޑީއެމްއޭ މެދުވެރިކޮށް ތިން ދުވަހުގެ މުއްދަތަށް ވަގުތީ ބޯހިޔާވަހިކަމާއި، ކެއިންބުއިމުގެ އެހީތެރިކަން މިހާރު ވަނީ ފޯރުކޮށްދީފައެވެ.
https://twitter.com/NDMAmv/status/2090482018186584378
ފަހަކަށް އައިސް މާލެ ސަރަހައްދުގައި ކަރަންޓު ޝޯޓްވެގެންނާއި އެކި ސަބަބުތަކާ ހުރެ އުސް އިމާރާތްތަކުގައި އަލިފާނުގެ ހާދިސާތައް ހިނގުން އިތުރުވަމުންދާތީ، ގޭބިސީތަކުގެ ކަރަންޓު ވައިރިންގ އަދި ޑީ-ބޯޑުތަކުގެ ރައްކާތެރިކަން ކަށަވަރުކުރުމަށް ކަމާބެހޭ އިދާރާތަކުން އަބަދުވެސް އިލްތިމާސްކުރެއެވެ. އެގޮތުން ދާދިފަހުން ވެސް މާލޭގެ ހ. ފަހިވައި ގޭގައި ހިނގި އަލިފާނުގެ ހާދިސާއަކާ ގުޅިގެން ހާލުގައި ޖެހުނު އާއިލާތަކަށް އެންޑީއެމްއޭއިން ވަނީ ވަގުތީ ބޯހިޔާވަހިކަން ހަމަޖައްސައިދީފައެވެ.
Ads by MACL
