ބުދަ، 18 ނޮވެމްބަރު 2026
ޚަބަރު

މާލޭގެ ގެއެއްގައި ހިނގި އަލިފާނުގެ ހާދިސާއެއްގައި 3 މީހަކަށް އަނިޔާވެއްޖެ

މިއަދު ހިނގި އަލިފާނުގެ ހާދިސާގެ ތެރެއިން ---
މިއަދު ހިނގި އަލިފާނުގެ ހާދިސާގެ ތެރެއިން ---

މާލޭގެ މާވެޔޮމަގުގައި ހުންނަ ގެއެއްގައި މިއަދު ހެނދުނު އަލިފާން ރޯވެ، ލިބުނު އަނިޔާތަކާ ގުޅިގެން ތިން މީހަކަށް ހޮސްޕިޓަލުގައި ފަރުވާދޭން ފަށައިފިއެވެ.

މި ހާދިސާ ހިނގާފައިވަނީ މާވެޔޮމަގު އޭޑީކޭ ފާމަސީ ކުރިމައްޗަށް އޮންނަ ހަނި ގޯޅިގަނޑެއްގެ ތެރޭގައި ހުންނަ މ. ދޫގަސްވިލާގައެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފައިވާ ގޮތުގައި، ގޭގައި ރޯވި އަލިފާންގަނޑު ސިފައިންނާއި ކަމާބެހޭ ފަރާތްތަކުގެ މަސައްކަތުން މިހާރު ވަނީ އެއްކޮށް ކޮންޓްރޯލްކޮށްފައެވެ.

މި ހާދިސާގައި ދުމުގެ އަސަރުކޮށްގެންނާއި އެކިވަރުގެ އަނިޔާތައް ލިބިގެން ތިން މީހަކަށް ހޮސްޕިޓަލުގައި ފަރުވާ ދެމުން އަންނަ ނަމަވެސް، އެމީހުންގެ ހާލަތާ ގުޅޭ ތަފުސީލެއް އަދި ހާމައެއް ނުކުރެއެވެ.

މާލޭގެ ތޮއްޖެހިފައިވާ ހަނި ގޯޅިތަކުގައި ހުންނަ ޢިމާރާތްތަކަކީ އަލިފާނުގެ ހާދިސާތައް ހިނގުމުން އަލިފާން ނިއްވާ ލޮރީތަކާއި ޚިދުމަތްތެރިންނަށް ވަދެ އަވަސް ފިޔަވަޅު އެޅުމަށް ބޮޑެތި ގޮންޖެހުންތަކާ ކުރިމަތިވާ ސަރަހައްދުތަކެކެވެ.

މީގެ ކުރިންވެސް މާލޭގެ މިފަދަ ހަނި ގޯޅިތަކުގައި ހިނގާފައިވާ ނުރައްކާތެރި އަލިފާނުގެ ހާދިސާތަކުގައި ބޮޑެތި ގެއްލުންތަކެއް ލިބި، މީހުން ރައްކާތެރި ހިސާބުތަކަށް ބަދަލުކުރަން ޖެހިފައިވެއެވެ.