އަތޮޅުތަކުން: ތ. މަޑިފުށީ އައުޓްޑޯ ޖިމް ސާމާނު ހަރުކުރުމުގެ އަމަލީ މަސައްކަތް އެމްޓީސީސީން ނިންމާލައިފި
ތ. މަޑިފުށީގައި އައުޓްޑޯ ޖިމް ސާމާނު ފޯރުކޮށްދީ ހަރުކުރުމުގެ މަޝްރޫއުގެ އަމަލީ ހުރިހާ މަސައްކަތްތަކެއް އެއްކޮށް ނިންމާލައިފި ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
މި މަޝްރޫއުގެ ދަށުން މަޑިފުށީގެ ރައްޔިތުން ދުޅަހެޔޮ ސިއްހަތެއްގައި ތިބުމަށް ބާރުއެޅުމުގެ ގޮތުން، ކަސްރަތު ކުރުމަށް ބޭނުންވާ ޒަމާނީ އައުޓްޑޯ ޖިމް އިކުއިޕްމަންޓްތައް އެ ރަށަށް ގެންގޮސް، ކަނޑައެޅިފައިވާ ސަރަހައްދުގައި އެ ތަކެތި އިންސްޓޯލްކުރުމުގެ މަސައްކަތް ވަނީ ކާމިޔާބުކަމާއެކު ނިންމާލާފައެވެ.
އެމްޓީސީސީން ބުނީ ރައްޔިތުންގެ ކުންފުނީގެ ގޮތުގައި ގައުމު ބިނާކުރުމަށް ކުރިއަށްގެންދާ ތަރައްގީގެ މިފަދަ މުހިންމު މަޝްރޫއުތަކުގެ އެންމެ ފަހުގެ މައުލޫމާތާއި އަދާހަމަތައް އެ ކުންފުނީގެ ޕްރޮޖެކްޓްސް ވެބްސައިޓް މެދުވެރިކޮށް އާންމުންނަށް ބަލައިލެވޭނެ އިންތިޒާމު ހަމަޖައްސާފައިވާ ކަމަށެވެ.
Ads by BMLރާއްޖޭގެ އެކި ކަންކޮޅުތަކުގައި ކުޅިވަރާއި ދުޅަހެޔޮ ދިރިއުޅުމަކަށް ބޭނުންވާ ވަސީލަތްތައް ގާއިމުކުރުމަށް ސަރުކާރުން ކުރިއަށްގެންދާ ސިޔާސަތުގެ ދަށުން، މި ޖިމްގެ ޚިދުމަތް ރަސްމީކޮށް ލިބެން ފެށުމުން މަޑިފުށީގެ ހުރިހާ އުމުރުފުރައެއްގެ ރައްޔިތުންނަށް، ޚާއްސަކޮށް ޒުވާނުންނަށް ފަސޭހަކަމާއެކު ހިލޭ ކަސްރަތު ކުރުމުގެ ފުރުސަތު ފަހިވެގެންދާނެއެވެ.
Ads by MACL
