ލ. ގަމުގައި އިމާރާތްކުރާ 100 ހައުސިން ޔުނިޓުގެ ބޮޑުބައި ނިމި، ހަވާލުކުރުމުގެ އެންމެ ފަހުގެ މަރުހަލާއަށް
ލ. ގަމުގައި ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުގެ ދަށުން ތަރައްގީކުރާ 100 ހައުސިން ޔުނިޓުގެ އަމަލީ މަސައްކަތުގެ ބޮޑުބައި ނިންމައި، މިހާރު ކުރިއަށްދަނީ ޔުނިޓުތައް ހަވާލުކުރުމަށް ވާންޖެހޭ އެންމެ ފަހުގެ ތައްޔާރީތަކެވެ.
އިމާރާތް ކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ހާމަކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މި މަޝްރޫއުގެ ޖުމްލަ މަސައްކަތުގެ 95.5 އިންސައްތަ މިހާރު ވަނީ އެއްކޮށް ފުރިހަމަކޮށްފައެވެ. އެހެންކަމުން މުޅި އިމާރާތްކުރުމުގެ މަރުހަލާ ގާތްގަނޑަކަށް ނިމި، މިހާރު ކުރިއަށްދަނީ ފިނިޝިންއާއި ކުދި މަރާމާތުތައް ފަދަ އެންމެ ފަހުގެ މަސައްކަތްތަކެވެ.
ދައުލަތުގެ ބަޖެޓުން 84.2 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫއުގެ ދަށުން އިމާރާތްކުރަނީ 1000 އަކަފޫޓުގެ ހައުސިން ޔުނިޓްތަކެކެވެ. ކޮންމެ ޔުނިޓެއްގައި ތިން ކޮޓަރިއާއި ތިން ފާހަނައިގެ އިތުރުން ސިޓިންރޫމާއި، ބަދިގެއާއި، ކާބައި އަދި ލޯންޑްރީއާއި ސްޓޯރޫމް ހިމެނޭ ގޮތަށް ޖާގައިގެ ގޮތުން ތަނަވަސްކޮށް ވަނީ ފަރުމާކޮށްފައެވެ.
Ads by BMLމި ސަރަހައްދުގައި ދިރިއުޅޭ އާއިލާތަކަށް ހިތްފަސޭހަ އަދި ރައްކާތެރި މާހައުލެއް ގާއިމުކޮށްދިނުމުގެ ގޮތުން މުޅި ސަރަހައްދު އަލިކުރުމާއި، ކުޑަކުދިންނަށް ޚާއްސަ ޕާކަކާއި އެކަށީގެންވާ ވެހިކަލް ޕާކިން ޒޯނެއް ތަރައްގީކުރުމުގެ މަސައްކަތްވެސް މި ޕްރޮޖެކްޓުގެ ތެރޭގައި ހިމެނެއެވެ.
އެއް އަހަރު ދުވަހުގެ ތެރޭގައި ނިންމުމަށް އެސްޖޭ ކޮންސްޓްރަކްޝަނާ ހަވާލުކުރި މި މަޝްރޫއަކީ، ގަމުގައި ދިމާވެފައިވާ ބޯހިޔާވަހިކަމުގެ ދަތިކަމަށް ދާއިމީ ހައްލެއް ހޯދައިދިނުމަށް ސަރުކާރުން އެކުލަވާލާފައިވާ ސިޔާސަތުގެ ދަށުން ފެށި މުހިންމު ބިންގަލެކެވެ. ރާއްޖޭގެ އެންމެ ބޮޑު އެއް އެއްގަމު ބިން އޮންނަ ގަމަކީ ސަރަހައްދީ އިގްތިސާދީ މައި ހަބަކަށް ހެދުމަށް ރޭވިފައިވާ ރަށަކަށް ވުމާއެކު، އާބާދީ އިތުރުވަމުންދާ މިންވަރާ އެއްވަރަށް ބޯހިޔާވަހިކަމުގެ ޑިމާންޑް އަންނަނީ އަހަރަކަށް ވުރެ އަހަރެއް ބޮޑުވަމުންނެވެ.
މި 100 ހައުސިން ޔުނިޓުގެ މަސައްކަތް ނިމުމަކާ ގާތްވެފައިވާއިރު، އެ ރަށުގައި އިތުރު 100 ހައުސިން ޔުނިޓު އެޅުމަށް ބޭނުންވާ ސާމާނު މިހާރު ވަނީ ގަމަށް ގެންގޮސްފައެވެ. މި ދެވަނަ ފިޔަވަހީގެ މަސައްކަތް ކުރިއަށް ގެންދަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިންނެވެ.
މި މަޝްރޫއުތައް އެއްކޮށް ނިމި ރައްޔިތުންނާ ހަވާލުކުރެވުމުން، ގަމުގެ އެތައް އާއިލާއަކަށް ދިމާވެފައިވާ ގެދޮރުގެ ދަތިކަމަށް ލުޔެއް ލިބި، ސަރަހައްދީ ގޮތުން އެ އަތޮޅަށް އަންނަ ތަރައްގީއަށް އިތުރު ދިރުމެއް ލިބިގެންދާނެއެވެ.
Ads by MACL
