ބުދަ، 18 ނޮވެމްބަރު 2026
ޚަބަރު

ތަހުގީގީ ދާއިރާގެ ދެ ތަމްރީނެއް 54 ފުލުހަކު ފުރިހަމަކޮށްފި

ތަހުގީގީ ދާއިރާގެ ދެ ތަމްރީނެއް 54 ފުލުހަކު ފުރިހަމަކޮށްފި

ފުލުހުންގެ ތަހުގީގީ ޤާބިލުކަން އިތުރަށް ހަރުދަނާކޮށް ހުނަރުވެރި އޮފިސަރުން ބިނާކުރުމަށް ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ކުރިއަށް ގެންދިޔަ ހާއްސަ ދެ ތަމްރީނު ޕްރޮގްރާމެއް، 54 ފުލުހަކު ކާމިޔާބުކަމާއެކު ނިންމާލައިފިއެވެ. މި ދެ ކޯސް ނިންމުމުގެ ގޮތުން ސެޕްޓެމްބަރު 9 ވަނަ ދުވަހު ބޭއްވި ހާއްސަ ރަސްމިއްޔާތުގައި ބައިވެރިންނަށް ވަނީ ސެޓްފިކެޓް ހަވާލުކޮށްފައެވެ.

އައްޑޫ ސިޓީ ހިތަދޫގައި ގާއިމުކޮށްފައިވާ ޕޮލިސް ކޮލެޖުގައި ނިންމާލި މި ދެ ތަމްރީނަކީ "ފެމިލީ އެންޑް ޗައިލްޑް ސެންޓަރޑް އިންވެސްޓިގޭޝަން ކޯސް-18" އަދި "ސީން އޮފް ކްރައިމް އޮފިސަރސް ބޭސިކް ކޯސް-7" އެވެ. މި ރަސްމިއްޔާތު ޝަރަފުވެރިކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް އާސިމް ޢަބްދުﷲއެވެ. މީގެއިތުރުން ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ ޓްރެއިނިންގ އެންޑް އެޑިއުކޭޝަން ޑައިރެކްޓަރ، ސުޕްރިންޓެންޑެންޓް އޮފް ޕޮލިސް އަހުމާ ސަޢީދު ވެސް މި ޖަލްސާގައި ބައިވެރިވެވަޑައިގެންނެވިއެވެ.

ފެމިލީ އެންޑް ޗައިލްޑް ސެންޓަރޑް އިންވެސްޓިގޭޝަން ކޯހަކީ ގެވެށި އަނިޔާއާއި ޖިންސީ ގޯނާގެ ޝިކާރައަކަށްވާ ފަރާތްތަކާ ގުޅުންހުރި މައްސަލަތައް ބަލާ އޮފިސަރުންގެ ފަންނީ ގާބިލުކަން އިތުރުކުރުމަށާއި، ހާއްސަކޮށް ތަހުގީގުތަކުގައި ކުޑަކުދިންނާ ސުވާލުކުރުމުގެ ނާޒުކު ހުނަރުތައް ދަސްކޮށްދިނުމަށް ފަރުމާކޮށްފައިވާ ޕްރޮގްރާމެކެވެ. ޖުލައި 26 އިން އޮގަސްޓު 11 އަށް ހިންގި މި ކޯސް 25 އޮފިސަރަކު ފުރިހަމަކުރިއިރު، އެންމެ މޮޅު ދަރިވަރަކަށް ހޮވުނީ ޗީފް އިންސްޕެކްޓަރ އޮފް ޕޮލިސް ޑރ. ރިޝްވީނާ އަޙްމަދުއެވެ.

އޮގަސްޓް 2 އިން ސެޕްޓެމްބަރު 3 އަށް ކުރިއަށް ގެންދިޔަ ސީން އޮފް ކްރައިމް އޮފިސަރސް ބޭސިކް ކޯހަކީ ކުށުގެ ވެށި ތަހުލީލުކުރުމާއި، މައްސަލަތަކުގެ ހެކި ހޯދުމުގެ އަމަލީ ހުނަރު ފޯރުކޮށްދިނުމަށް ހިންގި ކޯހެކެވެ. ޖުމްލަ 29 މުވައްޒަފުން ފުރިހަމަކުރި މި ކޯހުން އެއްވަނަ ހޯދާފައިވަނީ ފޮރެންސިކް އެނަލިސްޓް އަސިޔަތު މަންހަތު މުޙައްމަދުއެވެ.

މި ކޯހުގައި ކުށުގެ ވެށީގައި ހަރަކާތްތެރިވާ ފޮރެންސިކް އޮފިސަރެއްގެ ގާނޫނީ ޒިންމާތަކާއި ފޮރެންސިކް ސައިންސްގެ މައިގަނޑު އަސާސްތައް ވަނީ އުނގަންނައިދީފައެވެ. އޭގެ ތެރޭގައި ޑީއެންއޭ، އިނގިލީގެ ނިޝާން، މާއްދީ ހެކި އަދި ޑިޖިޓަލް ހެކި ރައްކާތެރިކަމާއެކު ނަގައި ބަންދުކުރުމުގެ އުކުޅުތަކާއި، ޑޮކިއުމެންޓް އެގްޒަމިނޭޝަން ހަދާނެ ގޮތްތައް ހިމެނެއެވެ. އަދި އޮފިސަރުން ތަހުގީގީ ރިޕޯޓު އެކުލަވައިލުމާއި، ޝަރީއަތުގެ މަޖިލީހުގައި އެ ރިޕޯޓުތަކަށް ބިނާކޮށް ހެކިބަސްދޭނެ ގޮތްތައް ވެސް އަމަލީ ގޮތުން ދަސްކޮށްދީފައިވެއެވެ.

އައްޑޫ ސިޓީގައި 2022 ވަނަ އަހަރު ރަސްމީކޮށް ހުޅުވި ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓަކީ ދިވެހި ފުލުހުންގެ އިތުރުން ރާއްޖޭގެ ތަންފީޒީ އިދާރާތަކަށް ބޭނުންވާ ފަންނީ ތަމްރީނުތައް ބައިނަލްއަގުވާމީ ފެންވަރަށް ފޯރުކޮށްދިނުމަށް ގާއިމުކޮށްފައިވާ މައި މަރުކަޒެކެވެ. އެގޮތުން ޖިނާއީ އަދުލުގެ ނިޒާމު ހަރުދަނާކުރުމަށްޓަކައި ޒަމާނީ ވަސީލަތްތަކާއެކު ފޮރެންސިކް އަދި އިންވެސްޓިގޭޝަން ދާއިރާއިން އޮފިސަރުން ތަމްރީނުކުރުމަށް އެ ކޮލެޖުން ދަނީ ސިލްސިލާ ގޮތެއްގައި ގިނަ ޕްރޮގްރާމްތަކެއް ހިންގަމުންނެވެ.