ބުދަ، 18 ނޮވެމްބަރު 2026
ޚަބަރު

މެލޭޝިއާގެ ބޮޑުވަޒީރު ފުރަމާނަ ދަތުރުފުޅެއްގައި ރާއްޖެވަޑައިގެންފި

 މެލޭޝިއާގެ ބޮޑުވަޒީރު އަންވަރު ރާއްޖެ ވަޑައިގަތުން --- ފޮޓޯ: ރައީސް އޮފީސް
މެލޭޝިއާގެ ބޮޑުވަޒީރު އަންވަރު ރާއްޖެ ވަޑައިގަތުން --- ފޮޓޯ: ރައީސް އޮފީސް

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަޢުވަތަކަށް މެލޭޝިއާގެ ބޮޑުވަޒީރު އަންވަރު އިބްރާހީމް ރާއްޖެއަށް ކުރައްވާ ފުރަމާނަ ދަތުރުފުޅެއްގައި މިރޭ ރާއްޖެ ވަޑައިގެންފިއެވެ. މިއީ 2022 ވަނަ އަހަރުގެ ނޮވެމްބަރު މަހު އެ ގައުމުގެ ބޮޑުވަޒީރުކަމާ ހަވާލުވެވަޑައިގަތް ފަހުން އަންވަރު ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅެވެ.

ވެލާނާ އިންޓަނޭޝަނަލް އެއާޕޯޓުން ބޮޑުވަޒީރު އަންވަރު އިބްރާހީމަށް މަރުހަބާ ދެންނެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އެމަނިކުފާނުގެ އަރިހުގައި ދިވެހި ސަރުކާރުގެ އިސް ވަޒީރުންނާއި، މެލޭޝިއާގައި ހުންނަވާ ދިވެހި ސަފީރު ބައިވެރިވެވަޑައިގެންނެވިއިރު، އެއާޕޯޓުން އެމަނިކުފާނަށް ވަނީ ރަތް ދޫލައިގެ ހޫނު މަރުހަބާއެއް ދަންނަވާފައެވެ. އަދި މި ދަތުރުފުޅާ ގުޅިގެން ވެރިރަށް މާލޭގެ މައި މަގުތައް ވެސް ވަނީ ދެ ގައުމުގެ ގައުމީ ދިދައިން ޒީނަތްތެރިކޮށްފައެވެ.

މި ދަތުރުފުޅުގެ ތެރެއިން ދެ ގައުމުގެ ދެމެދުގައި ރަސްމީ މަޝްވަރާތައް ބޭއްވުމަށް ހަމަޖެހިފައިވާއިރު، އެކި ދާއިރާތަކުން ގުޅުން ބަދަހިކުރުމުގެ މުހިންމު އެއްބަސްވުންތަކެއްގައި ސޮއިކުރުމަށް ވަނީ ނިންމާފައެވެ. މީގެއިތުރުން ރައީސުލްޖުމްހޫރިއްޔާގެ ނައިބާއި، ރައްޔިތުންގެ މަޖިލީހުގެ ރައީސްގެ އިތުރުން ޚާރިޖީ ވަޒީރު ވެސް ބޮޑުވަޒީރު އަންވަރުގެ އަރިހަށް ވަކިވަކިން އިހްތިރާމުގެ ޒިޔާރަތް ކުރައްވާނެއެވެ.

މެލޭޝިއާގެ ބޮޑުވަޒީރަކު އެންމެ ފަހުން ރާއްޖެއަށް ފުރަމާނަ ދަތުރުފުޅެއް ކުރެއްވީ 2017 ވަނަ އަހަރު، އޭރުގެ ބޮޑުވަޒީރު ނަޖީބް ރައްޒާގެ ދައުރުގައެވެ. ދިވެހިރާއްޖެއާއި މެލޭޝިއާއާ ދެމެދު ސިޔާސީ ގުޅުން 1968 ވަނަ އަހަރު ގާއިމުކުރި ފަހުން، މެލޭޝިއާއަކީ ދިވެހިން ތަޢުލީމާއި ޞިއްޙީ ފަރުވާއަށް އަދި ވިޔަފާރީގެ ބޭނުންތަކަށް އެންމެ ގިނައިން ދަތުރުކުރާ އަދި އެންމެ ބޮޑު ދިވެހި ޑަޔަސްޕޯރާއެއް ދިރިއުޅޭ އެއް ޤައުމެވެ.

އުމުރުން 79 އަހަރުގެ އަންވަރު އިބްރާހީމަކީ ސިޔާސީ ގޮތުން ގިނަ ގޮންޖެހުންތަކަކާއި ޖަލުގެ އަދަބުތައް ތަހައްމަލު ކުރެއްވުމަށްފަހު، އެތައް އަހަރެއްގެ އިސްލާހީ މަސައްކަތުން ވެރިކަމަށް ވަޑައިގެންނެވި ބޭފުޅެކެވެ. މީގެކުރިން އެ ގައުމުގެ ނައިބު ބޮޑުވަޒީރުކަމާއި މާލީ ވަޒީރުކަން ވެސް ކުރެއްވި އަންވަރު ވެރިކަމާ ހަވާލުވެވަޑައިގަތީ 2022 ގެ އާންމު އިންތިޚާބުގައި ލިބުނު ކާމިޔާބީއާ ގުޅިގެންނެވެ.