ޕީއެންސީގެ އައު ލީޑާޝިޕާއި މަގާމުތަކަށް އައްޔަންކުރެއްވި ބޭފުޅުން ހުވާކުރައްވައިފި
ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ މަތިން ޕާޓީގެ ކުރިއަށް އޮތް ދައުރަށް ހޮވާފައިވާ އިސް މަގާމުތަކާއި ލީޑާޝިޕްގެ ބޭފުޅުން ސޯޝަލް ސެންޓަރުގައި ބޭއްވި ހާއްސަ ރަސްމިއްޔާތެއްގައި މަގާމުގެ ހުވާކުރައްވައިފި އެވެ.
މި ރަސްމިއްޔާތުގައި ޕީއެންސީގެ ނައިބު ރައީސުންނާއި، ޕާޓީގެ މަތީ މަޖިލީހަށް އިންތިހާބުވި މެމްބަރުންގެ އިތުރުން ޕާޓީގެ ރައީސްގެ ބާރުގެ ދަށުން އައްޔަންކުރެއްވި އިސް ބޭފުޅުންނަށް އިގުރާރު ލައިދެއްވީ ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިނެވެ.
މި ޖަލްސާ ޝަރަފުވެރިކޮށްދެއްވީ ޕާޓީގެ ރައީސް ޑރ. މުހައްމަދު މުއިއްޒު ކަމަށްވާއިރު، ޕާޓީގެ ނައިބު ރައީސްކަމަށް ހަ ބޭފުޅަކު ވަނީ ހުވާކުރައްވާފަ އެވެ. އޭގެ ތެރޭގައި ސްޕޯޓްސް މިނިސްޓަރު އަބްދުﷲ ރާފިއުއާއި، ފިޝަރީޒް މިނިސްޓަރު އަހުމަދު ޝިޔާމާއި، އިކޮނޮމިކް މިނިސްޓަރު މުހައްމަދު ސައީދުގެ އިތުރުން ރައީސް އޮފީހުގެ ޗީފް ސްޕޯކްސްޕާސަން މުހައްމަދު ހުސައިން ޝަރީފާއި، ނިލަންދޫ ދާއިރާގެ މެމްބަރު ފާތިމަތު ސައުދާ އަދި ބާރަށު ދާއިރާގެ މެމްބަރު އިބްރާހިމް ޝުޖާއު ހިމެނިވަޑައިގަންނަވަ އެވެ. މީގެއަށްފަހު، މިނިސްޓަރުންނާއި މިނިސްޓަރު ފެންވަރުގެ މަގާމުތަކުގައި ތއްބެވި ބޭފުޅުންނާއި، ސަފީރުންނާއި ބައެއް ކުންފުނިތަކުގެ އެމްޑީންގެ މަގާމުތަކަށް ޕާޓީގެ ރައީސް އައްޔަންކުރެއްވި އިސް ބޭފުޅުން ވެސް ވަނީ މި ރަސްމިއްޔާތުގައި މަގާމުގެ ހުވާކުރައްވާފަ އެވެ.
Ads by BMLމި ރަސްމިއްޔާތާ ގުޅޭގޮތުން މީޑިއާ ރިޕޯޓްތައް ބުނާގޮތުން، މި އަހަރުގެ ކޮންގްރެސްގެ ތެރެއިން ޕީއެންސީން ވަނީ ކުރިއަށް އޮތް ރިޔާސީ އިންތިހާބުގެ ޓިކެޓު ވެސް ރައީސް ޑރ. މުހައްމަދު މުއިއްޒަށް ދިނުމަށް ފާސްކޮށްފަ އެވެ. ވެރިކަން ކުރާ މައި ޕާޓީގެ ހައިސިއްޔަތުން ޕީއެންސީގެ އެތެރޭގެ އިންތިހާބުތަކާއި ކޮންގްރެސްގެ ކަންކަން ވަރަށް ފުރިހަމައަށް ކުރިއަށްދާ ކަމަށާއި، މި ބަދަލުތަކާއެކު ސަރުކާރުގެ ސިޔާސަތުތައް ތަންފީޒުކުރުމަށް ޕާޓީގެ ތެރެއިން އިތުރު ސްޕީޑެއް ލިބިގެންދާނެ ކަމަށް ސިޔާސީ ފަރާތްތަކުން ފާހަގަކުރެ އެވެ. އަދި އާ ލީޑާޝިޕާއެކު ރައްޔިތުންނާ ގާތުން މަސައްކަތްކުރުމަށް ގިނަ އަންހެނުންނާއި ޒުވާނުން ވެސް ޕާޓީގެ މަތީ މަޖިލީހާއި އެކި ގޮފިތަކުގެ މަގާމުތަކަށް އިންތިހާބުކޮށްފައިވެ އެވެ.
Ads by MACL
