ބުދަ، 18 ނޮވެމްބަރު 2026
ޚަބަރު

ދުނިޔޭގެ ހައުސްކީޕިންގ ހަފްތާ ފާހަގަކުރުމަށް އެމްއެޗްއޭ އިން އޮމަދޫގައި ހާއްސަ ހަރަކާތްތަކެއް ފަށައިފި

ދުނިޔޭގެ ހައުސްކީޕިންގ ހަފްތާ ފާހަގަކުރުމަށް އެމްއެޗްއޭ އިން އޮމަދޫގައި ހާއްސަ ހަރަކާތްތަކެއް ފަށައިފި

ދިވެހިރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ހައުސްކީޕިންގ ދާއިރާގެ ފަންނީ ބޭފުޅުން ތަމްސީލުކުރާ، ގައުމީ ފެންވަރުގައި ބަލައިގަންނަ ޖަމްއިއްޔާ މާލްދީވްސް ހައުސްކީޕާސް އެސޯސިއޭޝަން (އެމްއެޗްއޭ) އިން ދުނިޔޭގެ ހައުސްކީޕިންގ ހަފްތާ ފާހަގަކުރުމުގެ ގޮތުން އދ. އޮމަދޫގައި ހާއްސަ ހަރަކާތްތަކެއް ކުރިއަށް ގެންދަން ފަށައިފިއެވެ.  

އެމްއެޗްއޭ އިން އޮމަދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އާ ގުޅިގެން "ސެލެބްރޭޓިންގ އެކްސެލެންސް އިން އޮމަދޫ" ގެ ނަމުގައި ކުރިއަށްގެންދާ މި ހަރަކާތްތައް ތާވަލުކުރެވިފައިވަނީ 17 ސެޕްޓެމްބަރު 2026 އިން 20 ސެޕްޓެމްބަރު 2026 ގެ ނިޔަލަށެވެ.  

މި ހަރަކާތުގެ ތެރެއިން 18 ސެޕްޓެމްބަރު 2026 ވިލޭރޭ ވަނީ އޮމަދޫ ޕްރީސްކޫލުގައި ސާފުކުރުމުގެ އަސާސްތަކާ ބެހޭ ތަމްރީނު ސެޝަނެއް ގެންގޮސްފައެވެ. އަދި 19 ސެޕްޓެމްބަރު 2026 ވީ ދުވަހު އިރުވައި ތުނޑީގައި ހާއްސަ ހަރަކާތްތަކެއް ކުރިއަށްދާނެއެވެ. އޭގެ ތެރޭގައި:

  • ތައުލީމީ އަދި މަސައްކަތުގެ މައިދާން ގުޅުވާލުން: "ބްރިޖް ދަ ގެޕް ބިޓްވީން ދަ ކްލާސްރޫމް އެންޑް ދަ ވަރކިންގ ވޯލްޑް" ގެ ނަމުގައި ކުރިއަށްގެންދާ ހާއްސަ ސެޝަން.  
  •  އެނދު ޒީނަތްތެރިކުރުމުގެ މުބާރާތް: އޮމަދޫއަށް ޒިޔާރަތްކުރާ ރިސޯޓުތަކާއި ގެސްޓްހައުސްތަކުގެ މުވައްޒަފުން މެދުގައި ބޭއްވޭ ވާދަވެރި މުބާރާތް.  
  •  އިޖުތިމާއީ އަދި ކުޅިވަރު ހަރަކާތްތައް: އެންމެން ގުޅިގެން ބާއްވާ ބޮޑު މެންދުރުގެ ކެއުމާއި، "ފަންގޭމްސް" އަދި ނިންމުމުގެ ރަސްމިއްޔާތު.  

އެމްއެޗްއޭ އަކީ ހައުސްކީޕިންގ ދާއިރާގައި މަސައްކަތްކުރާ ފަރާތްތަކުގެ ހުނަރާއި ގާބިލުކަން އިތުރުކުރުމަށްޓަކައި ގަވާއިދުން ތަމްރީނު ޕްރޮގްރާމްތަކާއި، ވަރކްޝޮޕްތަކުގެ އިތުރުން ބައިނަލްއަގުވާމީ ފެންވަރުގެ ކުރިއެރުންތައް ހޯދައިދިނުމަށް ގިނަ މަސައްކަތްތަކެއް ކުރަމުންދާ ޖަމްއިއްޔާއެކެވެ.  

މި ހަރަކާތުގައި އީކޯލެބް އާއި ގްރީންޕާތު ފަދަ ބައިވެރިންގެ އެހީތެރިކަން ލިބިގެންދާއިރު، މިއީ އޮމަދޫގެ އިޖުތިމާއީ ރޫހު އާލާކޮށް ފަތުރުވެރިކަމުގެ ދާއިރާގެ ފަންނީ މުވައްޒަފުންގެ އަގުވަޒަންކުރުމަށް ހުޅުވިގެންދިޔަ މުހިންމު ފުރުސަތެކެވެ.