ރާއްޖެއާއި ޗައިނާގެ ގުޅުމުން ފުރުސަތުތަކާއި ފާގަތިކަމަށް މަގުފަހިވަމުންދޭ: ރައީސް މުއިއްޒު
ދިވެހިރާއްޖެއާއި ޗައިނާއާ ދެމެދު އޮތް ގުޅުމަކީ ފުރުސަތުތަކާއި ފާގަތިކަމަށް މަގުފަހިކޮށްދޭ ބަދަހި ގުޅުމެއް ކަމަށް ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ވިދޅުވެއްޖެއެވެ.
ޕީޕަލްސް ރިޕަބްލިކް އޮފް ޗައިނާގެ 77 ވަނަ އަހަރީ ދުވަހާއި މިޑް-އޯޓަމް ފެސްޓިވަލް ފާހަގަކުރުމަށް މިއަދު ބޭއްވި ރަސްމީ ހަފުލާގައި ވާހަކަފުޅު ދައްކަވަމުން، އެ މަނިކުފާނު ވިދާޅުވިގޮތުގައި، ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވަމުންދާ ކަމާއި، އެ ގުޅުމުގެ ސަބަބުން ދެ ގައުމުގެ ރައްޔިތުންނަށް ގިނަ ފުރުސަތުތަކެއް ފަހިވަމުންދާކަން ފާހަގަކުރެއްވިއެވެ. އަދި ދިވެހިރާއްޖެއާއި ޗައިނާއާ ދެމެދު އޮތް އިތުބާރާއި އެއްބާރުލުމުގެ މައްޗަށް ބިނާވެފައިވާ ގުޅުމަކީ ދެ ގައުމުގެ މުސްތަގުބަލަށް އޮތް މުހިންމު ބިންގަލެއް ކަމަށް ވިދާޅުވިއެވެ.
މި ރަސްމީ ހަފުލާ ބޭއްވުނީ ދެ ގައުމުގެ އިސް ވެރިންނާއި އިއްޒަތްތެރިންގެ ހާޒިރުގައެވެ. މި ހަފުލާގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު، ކެބިނެޓް ވަޒީރުން، ޗައިނާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ، އަދި ދެ ގައުމުގެ ސަރުކާރުގެ އިސް މަސްއޫލުވެރިން ބައިވެރިވެވަޑައިގެންނެވިއެވެ.
Ads by BMLރައީސުލްޖުމްހޫރިއްޔާ ވިދާޅުވީ ދިވެހިރާއްޖެއާއި ޗައިނާގެ ގުޅުން ބިނާވެގެންވަނީ އަގުކުރުމާއި، ސިޔާދަތީ ހަމަހަމަކަމާއި، ސުލްހަވެރިކަމާއެކު އެކުގައި އުޅުމާއި، އެކެއްގެ އުސޫލަށް ދިވެހިރާއްޖެއިން ކުރާ އިހުތިރާމުގެ މައްޗަށް ކަމަށެވެ. ދެހާސް ސައުވީސް ވަނަ އަހަރު އެ މަނިކުފާނު ޗައިނާއަށް ކުރެއްވި ކުރިއެރުންތެރި ދަތުރުފުޅަށްފަހު، ދެ ގައުމުގެ ގުޅުން އުސް މިސްރާބަކަށް ބަދަލުވެގެން ގޮސްފައިވާކަން އެ މަނިކުފާނު ފާހަގަކުރެއްވިއެވެ.
ދިވެހިރާއްޖޭގެ ގައުމީ ތަރައްގީގައި ޗައިނާއިން ވެދެމުންދާ އެހީތެރިކަމަށް އަލިއަޅުވާލައްވަމުން، ޒަމާނީ އުމްރާނީ މަޝްރޫއުތަކާއި، ދެމެހެއްޓެނިވި ރަށް ތަރައްގީގެ ދާއިރާއާއި، ތައުލީމީ އަދި ފަންނީ ތަމްރީނުތަކުގެ ދާއިރާއިން ޗައިނާއިން ވެދީފައިވާ އެހީތެރިކަން ރައީސް ފާހަގަކުރެއްވިއެވެ. ސިނަމާލެ ބްރިޖާއި، ބޯހިޔާވަހިކަމުގެ މަޝްރޫއުތަކާއި، ދެ ގައުމުގެ ދެމެދުގައި އޮތް މިނިވަން ވިޔަފާރީގެ އެއްބަސްވުމުގެ ދަށުން އިގްތިސާދީ ގުޅުންތައް ފުޅާވަމުންދާ ކަންވެސް އެ މަނިކުފާނު ފާހަގަކުރެއްވިއެވެ.
ދުނިޔެއަށް ކުރިމަތިވެފައިވާ ގޮންޖެހުންތަކާ މެދު ވާހަކަފުޅު ދައްކަވަމުން، ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކާއި ނުހަމަކަމުގެ ސަބަބުން އިގްތިސާދަށާއި މާރުކޭޓުތަކަށް ނޭދެވޭ އަސަރުކުރާ ކަމަށް ރައީސް ވިދާޅުވިއެވެ. ކުދި ޖަޒީރާ ގައުމުތަކަށް މިފަދަ ބަދަލުތަކުގެ އަސަރު މާ ބޮޑަށް ފޯރާކަން އެ މަނިކުފާނު ފާހަގަކުރެއްވިއެވެ.
މައްސަލަތައް ހައްލުކުރުމުގައި މަޝްވަރާއާއި، އެއްބާރުލުމާއި، އިހުތިރާމާއި، އިތުބާރުގެ މުހިންމުކަން ރައީސް ފާހަގަކުރެއްވިއެވެ. ސުލްހަވެރިކަމަކީ ތަރައްގީއަށް މަގުފަހިކޮށްދޭ ކަމެއް ކަމަށާއި، ހަމަޖެހުމަކީ ފާގަތިކަމުގެ ބިންގާ ކަމަށާއި، ގުޅިގެން މަސައްކަތް ކުރުމަކީ ގޮންޖެހުންތަކުން އަރައިގަތުމަށް ގައުމުތަކަށް ލިބޭ ބާރެއް ކަމަށް އެ މަނިކުފާނު ވިދާޅުވިއެވެ.
ކުރިއަށް އޮތް ތަނުގައި ޗައިނާއާއެކު އޮތް ގުޅުން އިތުރަށް ފުޅާކުރުމަށް ދިވެހިރާއްޖެއިން އެދޭކަން ރައީސުލްޖުމްހޫރިއްޔާ ހާމަކުރެއްވިއެވެ. ޗައިނާގެ ބައިނަލްއަގުވާމީ އިސްނެގުންތަކުގައި ބައިވެރިވެ، ދިވެހިރާއްޖޭގެ ގައުމީ ތަރައްގީގެ އިސްކަންދޭ ދާއިރާތަކާ އެއްގޮތަށް މަސައްކަތްތައް ކުރިއަށްުގެންދިއުމުގެ ޝައުގުވެރިކަން އެ މަނިކުފާނު ފާޅުކުރެއްވިއެވެ.
ވާހަކަފުޅު ނިންމަވާލައްވަމުން، ރައީސުލްޖުމްހޫރިއްޔާ ވަނީ ޗައިނާގެ ރައީސް ޝީ ޖިންޕިންއަށާއި، ޗައިނާގެ ސަރުކާރަށާއި ރައްޔިތުންނަށް އުފާވެރި ތަހުނިޔާއާއި ހެޔޮއެދުންތައް ފޮނުއްވާފައެވެ. އަދި ޗައިނާއަށް އިތުރު ފާގަތިކަމާއި ކުރިއެރުން ލިބުމަށް އެ މަނިކުފާނު އެދިވަޑައިގެންނެވިއެވެ.
Ads by MACL
