ރަސްމާލެއިން ތަނެއް ގަތަސް އޮޓަމެޓިކުން ވިސާއެއް ނުލިބޭނެ، ބިމުގެ މިލްކުވެރިކަން އޮންނާނީ ދައުލަތަށް: މުއްޠަލިބު
ރަސްމާލެ މަޝްރޫޢުގެ ދަށުން ތަރައްޤީކުރާ ޕްރޮޕަޓީތައް ގަންނަ ފަރާތްތަކަށް އޮޓަމެޓިކުން ވިސާ ލިބޭނެ ކަމަށް ބުނެ ދެކެވޭ ވާހަކަތައް ދޮގުކުރައްވައި، އެ ބިންތަކުގެ މިލްކުވެރިކަން އަބަދުވެސް އޮންނާނީ ދިވެހި ދައުލަތުގެ ހައްޤެއްގެ ގޮތުގައި ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވަޒީރު މުއްޠަލިބު ސާފުކޮށްދެއްވި ގޮތުގައި، ރަސްމާލޭން ޕްރޮޕަޓީއެއް ބައްލަވައިގަންނަ ފަރާތްތަކަށް މިލްކުވާނީ ހަމައެކަނި އެ ގަންނަ ޢިމާރާތް ނުވަތަ ޔުނިޓެވެ. އެ އުޞޫލުގެ ދަށުން އެ ބިމެއްގެ އަޞްލު މިލްކުވެރިކަން ދައުލަތުގެ އަތުން ބަދަލުވެގެން ނުދާނެ ކަމަށާއި، ބޭރުގެ ފަރާތްތަކުން ހިންގާ ރިސޯޓުތަކާއި އިންވެސްޓްމަންޓްތަކެކޭ އެއްފަދައިން ބިން އޮންނާނީ ދައުލަތުގެ ބެލުމުގެ ދަށުގައި ކަމަށް އޭނާ ފާހަގަކުރެއްވިއެވެ.
އޭގެ އިތުރުން، ރަސްމާލެއިން ގަންނަ ޕްރޮޕަޓީއެއް އެހެން ފަރާތަކަށް ވިއްކާލުން ނުވަތަ ވާރުތަވުމުގެ ކަންކަން ވެސް ކުރިއަށްދާނީ އޮޓަމެޓިކުން ނޫން ކަމަށް މިނިސްޓަރު ވިދާޅުވިއެވެ. އެފަދަ ބަދަލެއް ގެނެވޭނީ ސަރުކާރުން ބަލަންޖެހޭ ޤާނޫނީ އަދި އިދާރީ ކަންކަން ބެލުމަށްފަހު، ކަނޑައެޅިފައިވާ ޚާއްޞަ ފީއެއް ނަގައިގެން، ސަރުކާރުގެ ހުއްދައާއެކު ކަމަށް މުއްޠަލިބު ވިދާޅުވިއެވެ.
Ads by BMLވިސާ ދޫކުރުމުގެ އުޞޫލުތަކަށް އަލިއަޅުއްވާލައްވަމުން ވަޒީރު ވިދާޅުވީ، ރަސްމާލެއިން ޕްރޮޕަޓީއެއް ގަތުމަކީ އެމީހަކަށް ނުވަތަ އެމީހެއްގެ ޢާއިލާއަށް ރެސިޑެންސް ވިސާ އޮޓަމެޓިކުން ލިބޭނެ ހުއްޖަތެއް ނޫން ކަމަށެވެ. ރާއްޖޭގައި އިޤާމަތްޤާއިމުކުރުމުގެ ވިސާ ދޫކުރުމާއި، އޭގެ މުއްދަތު އިތުރުކުރުން ނުވަތަ ބާޠިލުކުރުމުގެ އެންމެހައި ބާރުތައް އޮންނާނީ ދިވެހި އިމިގްރޭޝަންގެ ޤާނޫނުގެ ދަށުން އެ އިދާރާއަށް ކަމަށް އޭނާ ބަޔާންކުރެއްވިއެވެ.
މިނިސްޓަރު މުއްޠަލިބު މިފަދަ ތަފްޞީލެއް ދެއްވީ ރަސްމާލެ މަޝްރޫޢުގެ ދަށުން ބޭރުގެ އިންވެސްޓަރުންނަށް ބިން ދޭ ގޮތާމެދު އިޖުތިމާޢީ މީޑިއާގައި ދެކެވޭ ބައެއް ވާހަކަތަކަށް ރައްދު ދެއްވަމުންނެވެ.
ދިވެހިރާއްޖޭގެ މިނިވަންކަމާއި އިސްތިއުލާލު ހިމާޔަތްކުރެވޭނީ އިޤްތިޞާދީ ގޮތުން ދައުލަތް ތަނަވަސްވެގެން ކަމަށާއި، މިފަދަ ވަސީލަތްތައް މެދުވެރިކޮށް ދިގު މުއްދަތުގެ ފައިދާ ޤައުމަށް ހޯދައިދިނުމަކީ ޤައުމީ މަޞްލަޙަތު ނެގެހެއްޓުމަށް އެޅޭ މުހިންމު ފިޔަވަޅެއް ކަމަށްވެސް ވަޒީރު ވިދާޅުވިއެވެ.
Ads by MACL
