ޓޯކުރާ އުޅަނދުތައް ރައްކާތެރިކަމާއެކު ނައްތާލުމާ ގުޅޭގޮތުން ވެމްކޯއާއި ފުލުހުން މަޝްވަރާކޮށްފި
މާލެ ސަރަޙައްދުގެ މަގުތަކުން ގަވާއިދާ ޚިލާފަށް ޕާކުކޮށްގެންނާއި ގިނަ ދުވަސްވެގެން ޓޯކޮށްފައިވާ އުޅަނދުތައް ރައްކާތެރިގޮތެއްގައި ނައްތާލުމާ ގުޅޭގޮތުން ވެސްޓް މެނޭޖްމަންޓް ކޯޕަރޭޝަން (ވެމްކޯ) ގެ ސީނިއަރ މެނޭޖްމަންޓާއި ދިވެހި ފުލުހުންގެ ޚިދުމަތާ ދެމެދު ޚާއްޞަ ބައްދަލުވުމެއް ބާއްވައި މަޝްވަރާކޮށްފިއެވެ.
މި ބައްދަލުވުމުގައި ފުލުހުންގެ ޓޯޔާޑުގައި ގިނަ ދުވަސްވެ، ވެރިން ހަވާލުނުވެ ހުރި އުޅަނދުތަކާއި، ގާނޫނީ އިޖުރާއަތްތައް ފުރިހަމަކުރުމަށްފަހު ނައްތާލަންޖެހޭ އުޅަނދުތައް ތިމާވެއްޓާއި ރައްކާތެރިކަމުގެ މިންގަނޑުތަކާ އެއްގޮތަށް ނައްތާލެވޭނެ އެންމެ ފުރިހަމަ އިންތިޒާމުތަކާ ގުޅޭގޮތުން ދެ މުއައްސަސާގެ ދެމެދުގައި ވަނީ ފުޅާ ދާއިރާއެއްގައި މަޝްވަރާކުރެވިފައެވެ.
މަގުތަކުގެ ތޮއްޖެހުން ކުޑަކުރުމަށާއި އާންމު ރައްކާތެރިކަން ކަށަވަރުކުރުމަށް ފުލުހުން ކުރިއަށްގެންދާ ހަރަކާތްތަކުގެ ތެރެއިން ޓޯކުރެވޭ އުޅަނދުތައް، ވެމްކޯގެ ކުނި މެނޭޖްކުރުމުގެ ނިޒާމުގެ ތެރެއިން ތިލަފުށްޓަށް ގެންގޮސް ނައްތާލުމުގެ މަސައްކަތް ކުރިއަށްގެންދާނެ ގޮތުގެ އުސޫލުތަކަށް މި ބައްދަލުވުމުގައި އަލިއަޅުވާލާފައިވެއެވެ.
Ads by BMLމިފަދަ އުޅަނދުތައް ނައްތާލުމުގައި ތިމާވެއްޓަށް ލިބިދާނެ ގެއްލުންތައް ކުޑަކުރުމަށާއި، އުޅަނދުތަކުގައި ހުންނަ ނުރައްކާތެރި މާއްދާތަކާއި ތެލާއި ބެޓެރި ފަދަ ތަކެތި ރައްކާތެރިކަމާއެކު އެކަހެރިކޮށް ނައްތާލުމުގެ މުހިންމުކަން ދެ މުއައްސަސާއިންވެސް ވަނީ ފާހަގަކޮށްފައެވެ.
ފުލުހުންނާއި ވެމްކޯ ގުޅިގެން ކުރިއަށްގެންދާ މި މަސައްކަތުގެ ސަބަބުން، މާލެއާއި ހުޅުމާލޭގެ މަގުތަކުގައި ގުޅުމެއްނެތި ދޫކޮށްލާފައިވާ އުޅަނދުތަކާއި ޓޯޔާޑުތަކުގައި ތޮއްޖެހިފައިވާ އުޅަނދުތަކުގެ މައްސަލައަށް އެދެވޭ ހައްލެއް ލިބިގެންދާނެ ކަމަށް ދެ މުއައްސަސާއިންވެސް އުންމީދުކުރެއެވެ.
Ads by MACL
