އދ. އޮމަދޫ ބަނދަރު މަޝްރޫޢު: ބޭރު ތޮށީގެ ކޮންކްރީޓް މަސައްކަތްތައް ހަލުވިކަމާއެކު ކުރިއަށް!
އދ. އޮމަދޫ ބަނދަރު މަތީ ފެންވަރަށް ތަރައްޤީކުރުމަށް ސަރުކާރުން ކުރިއަށްގެންދާ ބޮޑު މަޝްރޫޢުގެ ދަށުން، ބޭރު ތޮށީގެ ކޭވޯލް ޝަޓަރިންގް އަދި ކޮންކްރީޓް ކުރުމުގެ މުހިންމު މަސައްކަތްތައް މިހާރު ހަލުވިކަމާއެކު ކުރިއަށްދާކަމަށް މި މަޝްރޫޢުގެ ކޮންޓްރެކްޓަރު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ އިން ހާމަކޮށްފިއެވެ.
އޮމަދޫ ރައްޔިތުންނަށް ދިމާވެފައިވާ ލަފާފުރުމުގެ ދަތިތަކަށް ދާއިމީ ހައްލެއް ހޯދައިދިނުމަށް ފަރުމާކުރެވިފައިވާ މި މަޝްރޫޢަކީ ޖުމްލަ 66.96 މިލިއަން ރުފިޔާ ޚަރަދުކޮށްގެން ހިންގާ ބިޔަ މަޝްރޫޢެކެވެ. މިއީ ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް ލިބިގެންދާނެ ބޮޑު ކުރިއެރުމެކެވެ.
މި މަޝްރޫޢުގެ ދަށުން ރަށުގެ ބަނދަރު ފުންކުރުމާއި، ތޮށިލުމުގެ އިތުރުން ޒަމާނީ ފެންވަރުގެ ގިނަ ވަސީލަތްތަކެއް ޤާއިމުކުރުމަށް ވަނީ ހަމަޖެހިފައެވެ. އޭގެ ތެރޭގައި ހިމެނެނީ:
• ފުންކުރުމުގެ މަސައްކަތް: ބަނދަރު ސަރަޙައްދުން 49,765 ކިއުބިކް މީޓަރު އަދި ނެރު ފުންކުރުމުގެ ދަށުން 12,105 ކިއުބިކް މީޓަރުގެ ސަރަޙައްދެއް ފުންކުރުން.
• ތޮށިލުމުގެ މަސައްކަތް: 346 މީޓަރުގެ ބޮޑު ކޭވޯލްއެއް ޖެހުމާއި، 398 މީޓަރުގެ ބޭރުތޮށި ލުމުގެ އިތުރުން 208 މީޓަރުގެ ސަރަޙައްދެއްގައި ރިވެޓްމަންޓް ޖެހުން.• އިތުރު ވަސީލަތްތައް: ބަނދަރު ވަށައިގެން ޕޭވްމަންޓް ހެދުމާއި، އޮޑިދޯނިފަހަރަށް ލަފާފުރުން ފަސޭހަކުރުމަށް ކޮންކްރީޓް ޖެޓީއެއް އެޅުމުގެ އިތުރުން ބަނދަރު ބައްތި ހަރުކުރުން.
އެމްޓީސީސީން ބުނެފައިވާގޮތުގައި، ރަށުގެ ބަނދަރުގެ މަސައްކަތްތައް ތާވަލާ އެއްގޮތަށް ނިންމުމަށްޓަކައި ސައިޓުގައި މިހާރު ދަނީ މެދުކެނޑުމެއްނެތި މަސައްކަތް ކުރަމުންނެވެ. މި މަޝްރޫޢު އެއްކޮށް ނިމުމުން، އޮމަދޫގެ ކަނޑުދަތުރުފަތުރަށާއި ލޯކަލް ޓޫރިޒަމްގެ ސިނާޢަތަށް ބޮޑު ލުޔެއް ލިބިގެންދާނެއެވެ.
Ads by BML
Ads by MACL
