ބުދަ، 18 ނޮވެމްބަރު 2026
ޚަބަރު

އުއްފުވެސް ނުބުނާށެވެ! މުސްކުޅިވުމުން އެ އަމާން ހިޔާވަހިކަން ފަޅުކޮށްލަނީހެއްޔެވެ؟

މައިންބަފައިންގެ އޯގާތެރި ބާރުގެ ތެރޭގައި ދަރިފުޅަށް ލިބިފައިވާ ހިނިތުންވުން / ފޮޓޯ: ރަމްޒީ ތަސްވީރެއް
މައިންބަފައިންގެ އޯގާތެރި ބާރުގެ ތެރޭގައި ދަރިފުޅަށް ލިބިފައިވާ ހިނިތުންވުން / ފޮޓޯ: ރަމްޒީ ތަސްވީރެއް

ކޮންމެ އިންސާނެއްގެވެސް ދިރިއުޅުމުގެ ސަފަރު ފެށެނީ ހަލަބޮލި، ކަނޑުގަދަ ވިލާގަނޑެއްގެ ތެރެއިންނެވެ. ނާމާންކަމާއި ބިރުވެރިކަމުން ފުރިގެންވާ މި ދުނިޔޭގެ އޮއިވަރުގައި، ހިތަށް ހަމަޖެހުމާއި ރައްކާތެރިކަން ގެނެސްދޭނެ ބަނދަރެއް ހޯދުމަކީ ކޮންމެ ނަފްސެއްގެވެސް އެންމެ ބޮޑު އެދުމެވެ. ނަމަވެސް، ވިސްނާލައިފި ނަމަ، އެއްވެސް އަގަކާ ނުލައި، އެންމެ ފުރިހަމަ ރައްކާތެރިކަމާއި އަމާންކަން ލިބިގެންދާ ހަމައެކަނި މަންޒިލަކީ މައިންބަފައިންގެ އޯގާތެރި ބާރަށެވެ. އެއީ ހަގީގަތުގައިވެސް މި ބިންމަތީގައިވާ އެންމެ އަމާން، އެންމެ އުފާވެރި އައްސޭރިއެވެ.

މަންމައަކީ ކުލުނާއި އޯގާތެރިކަމުގެ ނިލަމެކެވެ. ދިރިއުޅުމުގެ ގަދަ ހޫނުން ފިއްސައިގެންދާ ކޮންމެ ހިނދެއްގައި، މަންމަގެ ފިރުމުންތަކަކީ ހިތްތަކަށް ފިނިކަން ގެނެސްދޭ ފިނިފެންމަލުގެ ވާރެއެކެވެ. ޅަފަތުގެ ބަލިބަލިކަމާއި، ޒުވާންދުވަހުގެ ނުތަނަވަސްކަމުގައިވެސް، އެއްވެސް ޝަކުވާއެއް ނެތި އަހަރެމެންގެ ބޯދަށަށް ދިއްކޮށްލި އަތަކީ އެއީއެވެ. ރޭގަނޑުގެ ނިދި ނަގާލައި، އަމިއްލަ އަރާމަށްވުރެ ދަރިފުޅުގެ ހިނިތުންވުން އިސްކުރި ހިތަކީ މަންމަގެ ލޯބިފުރިގެންވާ ހިތެވެ. ހަމައެއާއެކު، ބައްޕައަކީ ލޮލަށް ނުފެންނަ ނަމަވެސް ދިރިއުޅުމުގެ ބިންގާ ވަރުގަދަކޮށްދޭ ހަރުދަނާ ތަނބެވެ. އަހަރެމެންގެ ހަޔާތުގެ ނާ ބެހިގެން ނުދިއުމަށްޓަކައި، ދިރިއުޅުމުގެ ގަދަ ވިލާގަނޑާއި ހޫނު އަވީގައި ޖިހާދުކުރާ ބަތަލަކީ ބައްޕައެވެ. ބައްޕަގެ ހިޔާވަހިކަމަކީ ކިތަންމެ ބޮޑު ތޫފާނެއް އައި ނަމަވެސް ލޮޅުމެއް ނާރާނެ ވަރުގަދަ ކިއްލާއެކެވެ.

މައިންބަފައިންގެ މި މިންނެތް ޤުރުބާނީއާއި މަތިވެރި މަޤާމަކީ ހަމައެކަނި ދުނިޔަވީ ލޮލަކުން ފެންނަން އޮތް ޙަޤީޤަތެއް ނޫނެވެ. އެއީ މާތްﷲ އިސްލާމްދީނުގައި އެންމެ މަތިވެރި ދަރަޖައެއް ދެއްވާފައިވާ މުޤައްދަސް ގުޅުމެކެވެ. ކީރިތި ޤުރުއާނުގައި ﷲ ގެ އެއްކައުވަންތަކަމަށް އިޤްރާރުވުމަށް އެންގެވުމަށްފަހު، ދެން އެންމެ ގާތްކޮށް ގުޅުވާލައްވާފައިވަނީ މައިންބަފައިންނަށް ހެޔޮކޮށް ހިތުމުގެ އަމުރުފުޅެވެ. އެކަލާނގެ ވަޙީކުރައްވާފައިވަނީ އެ ދެމީހުން ކުރެ އެކަކު ނުވަތަ އެދެމީހުންމެ މުސްކުޅިކަމުގެ އުމުރަށް ފޯރާ ހިނދު، އެމީހުންނަށް "އުއްފު" ވެސް ނުބުނުމަށެވެ. އަދި ބާލިޣުވެ ބޮޑުވެގެން އަންނަ ކޮންމެ ހިނދެއްގައި "އަޅުގަނޑު ކުޑަކުއްޖަކު ކަމުގައިވީ ދުވަހު، އެދެމީހުން އަޅުގަނޑު ބަލައިބޮޑުކުރި ފަދައިން، އެދެމީހުންނަށް ރަޙުމްކުރައްވާންދޭވެ" މިފަދައިން ދުޢާކުރުމަށް އަންގަވާފައިވެއެވެ.

މިއީ މައިންބަފައިންގެ ދުޢާއަކީ ދަރިފުޅުގެ ހަޔާތުގެ އަނދިރި މަގުތައް އަލިކޮށްދޭ ދިއްލިފައިވާ ދިފާޢީ އައްޑަނައަކަށް ވާތީއެވެ.
ނަމަވެސް، ޒަމާނުގެ ފުރޮޅުމާއެކު ދުވަސްތައް މާޒީވަމުންދާއިރު، އެ އަމާން އައްސޭރީގެ ބާނީންނަށްވެސް ބަދަލުތައް އާދެއެވެ. އަހަރެމެން ހެދިބޮޑުވެ ، އަމިއްލަ ފައިމައްޗަށް ތެދުވަމުންދާއިރު، އެމީހުންގެ ކަޅު އިސްތަށިތައް ހުދުވެ، ގައިގެ ބާރުތައް ދެރަވަމުންދެއެވެ.

މޫނުމަތިން މުސްކުޅިކަމުގެ ރާތިބުތައް ފާޅުވެ، ހަނދާންތައް ބަލިކަށިވާން ފަށައެވެ. ކުޑައިރު އަހަރެމެން އެއް ވާހަކައެއް ސަތޭކަ ފަހަރު ދެއްކުމުންވެސް ފޫހިކަމެއް ނެތި އަޑުއެހި މައިންބަފައިން، މުސްކުޅިވުމުން އެއް ވާހަކައެއް ތަކުރާރުކޮށްލާ ހިނދު، އަހަރެމެންގެ ހިތްތަކަށް ކެތްތެރިކަން ލިބެނީ ކިހާވަރަކަށް ހެއްޔެވެ؟

އެމީހުން އަހަރެމެންނަށްޓަކައި މުޅި ޒުވާންކަން ޤުރުބާންކޮށްލީ، އެމީހުންގެ ބަލިކަށި ދުވަހު އަހަރެމެން އެމީހުންގެ އަމާން އައްސޭރިއަކަށް ވުމަށް އެދިއެވެ.
މިއަދުގެ ހިތްދަތި ޙަޤީޤަތަކީ، ދިރިއުޅުމުގެ ދުވުމާއި މާއްދީ ދުނިޔޭގެ ބުރަކަމުގެ ތެރެއަށް ގެނބި، ގިނަ ދަރިންނަށް މައިންބަފައިން މަތިން ހަނދާން ނެތުމެވެ.

ފޯނުގެ ކޯލަކުން ނުވަތަ ފޮނުވާލާ މެސެޖަކުން މައިންބަފައިންގެ ވާޖިބު އަދާކުރެވުނީ ކަމަށް ހީކުރެވެއެވެ. ނަމަވެސް، އެމީހުން ބޭނުންވަނީ ފައިސާއެއް ނޫނެވެ. އެމީހުން އެދިއެދި ތިބެނީ ދަރިފުޅުގެ ހިނިތުންވުމާއި، ގާތުގައި އިށީނދެލައިގެން އިނދެ ވާހަކަ ދައްކާލާނެ މަދު މިނެޓުކޮޅަކަށެވެ. ދަރިންގެ އިހުމާލުގެ ސަބަބުން، އަމިއްލަ ގޭގެ ކޮޓަރިއެއްގައި ނުވަތަ އެކަނިވެރި ހަތަރު ފާރުގެ ތެރޭގައި ކަރުނަ އަޅަން ތިބޭންޖެހޭ މައިންބަފައިން މި މުޖުތަމަޢުގައި މަދެއް ނޫނެވެ. މިއީ ހިތްތައް ރޮއްވާލާ ފަދަ ހިތްދަތި އިހުމާލެކެވެ.

މައިންބަފައިންގެ ހިޔާވަހިކަމަކީ ދާއިމީ ހިޔަލެއް ނޫނެވެ. ކޮންމެ ނަފްސެއްމެ މަރުގެ ރަހަ ލިބިގަންނާނެއެވެ. އެ ދެމީހުންގެ ލޯ މެރި، ދުނިޔެ ދޫކޮށްދާ ދުވަހު ހަޔާތަށް އަންނާނެ ފަޅުކަމާއި ފުން ހިތާމަޔާ ކުރިމަތިލާން ތައްޔާރު ހެއްޔެވެ؟ އެމީހުން ވަކިވެދިއުމަށްފަހު ކުރާ ހިތާމައާއި އޮއްސާ ކަރުނައިގެ އެއްވެސް އަގެއް ނެތެވެ. އެންމެ ފަހުގެ ނޭވާ ދޫކޮށްލުމުގެ ކުރިން އެމީހުންގެ ހިތް ހަމަޖައްސައިދީ، އެމީހުންގެ ރުހުން ހޯދުމަކީ ދުނިޔެއާއި އާޚިރަތުގެ ބާއްޖަވެރިކަން ލިބޭނެ ހަމައެކަނި މަގެވެ.

މަންމައާއި ބައްޕަގެ ހިޔާވަހިކަމަކީ ދުނިޔެއިން ލިބޭނެ އެންމެ އަގުބޮޑު ނިޢުމަތެވެ. އެއީ އެއްވެސް ޝަރުޠެއް ނެތް ސާފު ލޯބީގެ މަންޒިލެކެވެ. ދުނިޔޭގެ ކޮންމެ ދިމާލަކުން ކާމިޔާބީ ހޯދި ނަމަވެސް، މައިންބަފައިންގެ ރުހުމާއި ލޯބި ނުލިބޭ ނަމަ އެއީ ބާޠިލު ކާމިޔާބީއެކެވެ. އެހެންކަމުން، އެ ދެމީހުން ދުނިޔޭގައި ތިބި ދުވަހަކު އެ އަމާން އައްސޭރީގެ އަގު ވަޒަންކޮށް، އޯގާތެރިކަމާއި ކިޔަމަންތެރިކަމާއެކު އެމީހުންގެ ހިތްތަކަށް ފިނިކަން ގެނެސްދިނުމަކީ ކޮންމެ ދަރިއެއްގެ މައްޗަށް އޮތް އެންމެ ބޮޑު ވާޖިބެވެ.