މަތިވެރި ސްކޫލުގެ ޖާގައިގެ ދަތިކަމަށް ދާއިމީ ހައްލެއް: 12 ކްލާސްރޫމުގެ އައު އިމާރާތާއެކު އެއް ދަންފަޅިއަށް!
އަރިއަތޮޅު އުތުރުބުރީ މަތިވެރި ސްކޫލަށް ދިމާވެފައިވާ ޖާގައިގެ ދަތިކަމުގެ ބޮޑު މައްސަލައަށް ދާއިމީ ހައްލެއް ހޯދައިދިނުމަށްޓަކައި، ސަރުކާރުން އެރަށުގައި އިމާރާތްކުރަން ފަށާފައިވާ 12 ކްލާސްރޫމުގެ އައު އިމާރާތް ނިމުމާއެކު، އެ ސްކޫލުގެ ކިޔެވުން އަލުން އެއް ދަންފަޅީގެ ނިޒާމަށް ބަދަލުކުރުމަށް ސަރުކާރުން އަމާޒު ހިފައިފިއެވެ.
މަތިވެރި ސްކޫލަކީ ފައުންޑޭޝަން ސްޓޭޖުން ފެށިގެން ގްރޭޑް 10 އާ ހަމައަށް ޖުމުލަ 195 ދަރިވަރުން ތައުލީމު ހާސިލުކުރަމުންދާ ސްކޫލެކެވެ. ނަމަވެސް، ޓީޗަރުންނާއި އެޑްމިން މުވައްޒަފުން ހިމެނޭހެން 46 މުވައްޒަފުން މަސައްކަތްކުރާ މި ސްކޫލުގައި މިހާރު ބޭނުންކުރަމުންދަނީ ލައިބްރަރީ ވެސް ހިމެނޭހެން އެންމެ 6 ކްލާސްރޫމެވެ.
ޖާގަ ނެތުމުގެ ސަބަބުން މިހާރު ކިޔެވުން ކުރިއަށް ގެންދަން ޖެހެނީ ހެނދުނު 6:00 އިން ރޭގަނޑު 6:00 އަށް ދެ ދަންފަޅިއަށް ބަހާލައިގެންނެވެ. މީގެ ސަބަބުން ދަރިވަރުންނަށާއި، ޓީޗަރުންނަށް އަދި ބެލެނިވެރިންނަށް ވެސް ބޮޑެތި ގޮންޖެހުންތަކަކާ ވަނީ ކުރިމަތިލާން ޖެހިފައެވެ.
Ads by BMLމަތިވެރި ސްކޫލުގެ ޕްރިންސިޕަލް ޙަސަން ހަމީދު އިބްރާހީމް ވިދާޅުވީ، ވޭތުވެދިޔަ 6 އަހަރު ދުވަހުގެ ތެރޭގައި އެ ސްކޫލަށް ކުރިމަތިވި އެންމެ ބޮޑު ގޮންޖެހުމަކީ ޖާގައިގެ ދަތިކަމުގެ ސަބަބުން ދެ ދަންފަޅިއަށް ކިޔެވުން ބަދަލުކުރަން ޖެހުން ކަމަށެވެ.
އަދި ދެ ދަންފަޅިއަށް ކިޔަވައިދޭން ޖެހުމުން، އިތުރު ހަރަކާތްތަކާއި ރޭގަނޑު ގަޑީގެ ކިޔެވުންތައް ރޭވުމުގައި ވަރަށް ބޮޑެތި ދަތިތަކެއް ކުރިމަތިވަމުންދާކަން އޭނާ ފާހަގަކުރެއްވިއެވެ.
މި މައްސަލައަށް ހައްލެއް ހޯދުމަށް ސަރުކާރުން ކުރިއަށްގެންދާ މަޝްރޫއާ ގުޅޭގޮތުން މަތިވެރި ކައުންސިލްގެ ރައީސް އިސްމާއިލް އާތިފް ވިދާޅުވީ، ސަރުކާރުގެ ބޮޑު ޓާގެޓަކީ އަންނަ ދިރާސީ އަހަރުގެ ކިޔެވުން ފެށެންވާއިރަށް މި އައު އިމާރާތް ބޭނުންކުރަން ފެށުން ކަމަށެވެ.
މި އިމާރާތުގައި 12 ކްލާސްރޫމުގެ އިތުރުން ފާޚާނާއާއި ދަރިވަރުންނަށް ބޭނުންވާނެ ހުރިހާ ޒަމާނީ ވަސީލަތްތަކެއް ހިމެނޭނެއެވެ. މީގެ އިތުރުން، މި އޮކްޓޫބަރު މަހުގެ ތެރޭގައި އެ ސްކޫލުގެ މަލްޓިޕާޕޯސް ހޯލުގެ މަސައްކަތް ފަށައި، 6 މަސް ދުވަހުގެ ތެރޭގައި ނިންމުމަށް ވެސް ވަނީ އަމާޒު ހިފާފައެވެ.
މަތިވެރި ސްކޫލަކީ 2006 ވަނަ އަހަރުން ފެށިގެން އެއްދަންފަޅިއަކަށް ކިޔަވައިދެމުން އައި ސްކޫލެކެވެ. ސަރުކާރުން ބިނާކުރާ އައު އިމާރާތާއެކު ސްކޫލުގެ ގޯތިތެރެ ތަނަވަސްވެ، އަލުން އެއް ދަންފަޅީގެ ނިޒާމަށް ބަދަލުވުމުން ކިޔަވައިދިނުމުގެ ވަގުތު އިތުރުވެގެންދާނެއެވެ.
މީގެ ސަބަބުން އެކަޑަމިކް ކަންކަމާއި، ކުޅިވަރާއި އިތުރު ހަރަކާތްތައް ފުރިހަމައަށް ރާވައިގެން ކުރިއަށް ގެންދިއުމަށް ޓީޗަރުންނާއި ބެލެނިވެރިންނަށް ބޮޑު ލުޔެއް ލިބި، ދަރިވަރުންގެ ތައުލީމީ ފެންވަރު މަތިކުރުމަށް ބޮޑު ފުރުސަތެއް ފަހިވެގެންދާނެއެވެ.
މިއީ ރާއްޖޭގެ އެކި ކަންކޮޅުތަކުގައި ޖާގައިގެ ދަތިކަން ހުރި ސްކޫލުތަކުގެ ކިޔެވުމުގެ މާހައުލު ރަނގަޅުކޮށް، ތައުލީމީ ފެންވަރު މަތިކުރުމަށް ސަރުކާރުން ކުރިއަށްގެންދާ ފާހަގަކޮށްލެވޭ މަޝްރޫއުތަކުގެ ތެރެއިން ހިންގޭ މުހިންމު މަޝްރޫއެކެވެ.
Ads by MACL
