ބުދަ، 18 ނޮވެމްބަރު 2026
ޚަބަރު

އައްޑޫ މީދޫގެ ފާހަގަކޮށްލެވޭ ދަނޑުވެރިންނަށާއި ކާބޯތަކެތީގެ މަޢުރަޒުން ވަނަވަނައަށް ހޮވުނު ފަރާތްތަކަށް އެވޯޑު ޙަވާލުކޮށްފި

 ފިޝަރީޒް އެންޑް އެގްރިކަލްޗަރ މިނިސްޓަރ އަޙްމަދު ޝިޔާމް އިނާމު ޙަވާލުކޮށްދެއްވަނީ — ފޮޓޯ: ރައީސުލްޖުމްހޫރިއްޔާގެ އޮފީސް
ފިޝަރީޒް އެންޑް އެގްރިކަލްޗަރ މިނިސްޓަރ އަޙްމަދު ޝިޔާމް އިނާމު ޙަވާލުކޮށްދެއްވަނީ — ފޮޓޯ: ރައީސުލްޖުމްހޫރިއްޔާގެ އޮފީސް

މިއަހަރުގެ ޤައުމީ ދަނޑުވެރިންގެ ދުވަހާއި ދުނިޔޭގެ ކާބޯތަކެތީގެ ދުވަސް ރަސްމީގޮތުން ފާހަގަކުރުމަށް އައްޑޫ ސިޓީ މީދޫގައި ބޭއްވި ޚާއްޞަ ރަސްމިއްޔާތުގައި، ދަނޑުވެރިކަމުގެ ދާއިރާއިން ފާހަގަކޮށްލެވޭ ކާމިޔާބީތައް ހޯދި ފަރާތްތަކަށާއި، ކާބޯތަކެތީގެ މަޢުރަޒުން ވަނަވަނައަށް ހޮވުނު ފަރާތްތަކަށް އެވޯޑު ޙަވާލުކޮށްފިއެވެ.

މި ރަސްމިއްޔާތު ޝަރަފުވެރިކޮށްދެއްވީ ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް މިނިސްޓަރ އަޙްމަދު ޝިޔާމް އެވެ. މީގެ އިތުރުން މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ އިސް ވެރިންނާއި، އައްޑޫ ސިޓީގެ މޭޔަރު ޢަލީ ނިޒާރު އާއި، މީދޫ ކައުންސިލްގެ ރައީސް އަޙްމަދު ޝާތިރު ގެ އިތުރުން ކައުންސިލް މެންބަރުން ބައިވެރިވެވަޑައިގަތެވެ.

އަދި މި ޙަރަކާތްތަކުގެ މެއިން ސްޕޮންސަރެއްގެ ގޮތުގައި ބައިވެރިވި އުރީދޫ މޯލްޑިވްސް ގެ އިސް ވެރިންނާއި، އެ ކުންފުނީގެ ބްރޭންޑް އެމްބެސެޑަރު "ޒުވާން ދަނޑުވެރިޔާ" ވެސް މި ރަސްމިއްޔާތުގައި ބައިވެރިވިއެވެ.

މި ރަސްމިއްޔާތުގައި މީދޫގެ ދަނޑުވެރިކަމުގެ ސިނާޢަތް ކުރިއެރުވުމަށް ބުރަ މަސައްކަތްތަކެއް ކޮށްދެއްވާފައިވާ ހީވާގި ދަނޑުވެރިންގެ އަގުވަޒަންކޮށް ޚާއްޞަ އެވޯޑުތަކެއް ވަނީ އަރުވާފައެވެ. މީގެ އިތުރުން، ރަށުގެ އުފެއްދުންތެރިކަމާއި ކާބޯތަކެތީގެ ރައްކާތެރިކަން އިތުރުކުރުމަށް ހިތްވަރުދިނުމުގެ ގޮތުން ކުރިއަށްގެންދިޔަ ކާބޯތަކެތީގެ މަޢުރަޒުން އެންމެ މޮޅު އުފެއްދުންތައް ހުށަހަޅައިގެން ވަނަތަކަށް ހޮވުނު ފަރާތްތަކަށް ވެސް ވަނީ ޓްރޮފީއާއި އިނާމުތައް ބަހާފައެވެ.

ރަސްމިއްޔާތުގައި ވާހަކަދައްކަވަމުން މިނިސްޓަރ ޝިޔާމް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ ބޮޑު އިސްކަމެއް ދެއްވާ އެއް ކަމަކީ ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމާއި ދަނޑުވެރިކަމުގެ ސިނާޢަތް ޒަމާނީ ފެންވަރަށް ތަރައްޤީކުރުން ކަމަށެވެ. އަދި މިފަދަ އެވޯޑުތަކުގެ ސަބަބުން ދާއިރާއަށް އިތުރު ޒުވާނުން ނުކުތުމަށް މަގުފަހިވެގެންދާނެ ކަމަށް ވެސް ވިދާޅުވިއެވެ.

މި ދުވަހުގެ ޙަރަކާތްތަކުގެ ތެރެއިން، އުރީދޫ މޯލްޑިވްސްގެ އެހީތެރިކަމާއެކު ދަނޑުވެރިކަމުގެ ނާސަރީ ސަރަޙައްދުގައި ބިނާކުރި "ފާމާސް ޕްރޭޔަރ ހައުސް" (ދަނޑުވެރިން ނަމާދުކުރާ ކޮޓަރި) ހުޅުވުމާއި، ރަށުގެ ތިމާވެށި ޙިމާޔަތްކޮށް ދެމެހެއްޓެނިވި ދަނޑުވެރިކަމެއް ކުރިއެރުވުމަށް ގަސް އިންދުމުގެ ޚާއްޞަ ޙަރަކާތްތަކެއް ވެސް ވަނީ ކުރިއަށް ގެންގޮސްފައެވެ.

ރަށުގެ ގިނަ އަދަދެއްގެ ރައްޔިތުންނާއި ދަނޑުވެރިން ބައިވެރިވި މި ރަސްމިއްޔާތު ނިމިގެންދިޔައީ، ލިބުނު ކާމިޔާބީއާ އެކު ދަނޑުވެރިންނަށް ލިބުނު އިތުރު ހިތްވަރާއި އުފާވެރިކަމާ އެކުގައެވެ.