ބުދަ، 18 ނޮވެމްބަރު 2026
ޚަބަރު

ޢަރަބިއްޔާ ސްކޫލްގެ އައު އިމާރާތުގެ 77 އިންސައްތަ މަސައްކަތް ނިމި، ފިނިޝިންއަށް ތައްޔާރުވެއްޖެ

ޢަރަބިއްޔާ ސްކޫލްގެ އައު އިމާރާތުގެ މަސައްކަތް ބާރަށް ކުރިއަށްދަނީ / ފޮޓޯ: ޕީއެސްއެމް ނިއުސް
ޢަރަބިއްޔާ ސްކޫލްގެ އައު އިމާރާތުގެ މަސައްކަތް ބާރަށް ކުރިއަށްދަނީ / ފޮޓޯ: ޕީއެސްއެމް ނިއުސް

އަލް މަދްރަސަތުލް އަރަބިއްޔަތުލް އިސްލާމިއްޔާ (ޢަރަބިއްޔާ ސްކޫލް) ގެ އައު އިމާރާތުގެ 77 އިންސައްތަ މަސައްކަތް ނިމި، އިމާރާތުގެ ފިނިޝިން މަސައްކަތްތައް ފެށުމަށް ބާރަށް ތައްޔާރުވަމުން އަންނަކަމަށް ރަޝީދު ކާޕެންޓްރީ އެންޑް ކޮންސްޓްރަކްޝަން  އިން ހާމަކޮށްފިއެވެ. މި މަޝްރޫޢުގެ ދަށުން އިމާރާތުގެ ކޮންކްރީޓްގެ 95 އިންސައްތަ މަސައްކަތް މިހާރު ވަނީ މުޅިން ނިންމާލާފައެވެ.

އާރްސީސީން ހާމަކޮށްފައިވާ ގޮތުގައި، އިމާރާތުގެ މައިގަނޑު ކޮންސްޓްރަކްޝަންގެ ތެރެއިން ރާނާ ސިމެންތި ޖެހުމާއި، ވޯޓާޕްރޫފިން، ކުލަލުން އަދި މެކޭނިކަލް، އިލެކްޓްރިކަލް އެންޑް ޕްލަމްބިން ގެ މަސައްކަތްތައް އެކި މަރުހަލާތަކުގައި ދަނީ ކުރިއަށެވެ. ދެން އެންމެ އަވަހަށް ފެށުމަށް ހަމަޖެހިފައިވަނީ މުށި ޖެހުމާއި، ދޮރާއި ކުޑަދޮރުތައް ހަރުކުރުމުގެ އިތުރުން ސޯލާ ޕެނަލް، ލިފްޓު އަދި އަލިފާން ނިއްވާ ނިޒާމް ޤާއިމްކުރުމުގެ މަސައްކަތްތަކެވެ.

ތަޢުލީމީ ވުޒާރާގެ އަމާޒަކީ އަންނަ ޑިސެމްބަރު މަހަށް އިމާރާތުގެ ހުރިހާ މަސައްކަތްތަކެއް ނިންމައި، އަންނަ ދިރާސީ އަހަރުގެ ކިޔެވުން އައު އިމާރާތުގައި ފެށުމެވެ. 10 ފަންގިފިލާއަށް ބިނާކުރާ މި އައު އިމާރާތަކީ 42 ކްލާސްރޫމާއި، މަލްޓިޕާޕަސް ހޯލެއްގެ އިތުރުން ޒަމާނީ ހުރިހާ ވަސީލަތްތަކެއް ހިމެނޭހެން މާލޭ ސަރަޙައްދުގައި ބިނާކުރާ އެންމެ ބޮޑު ސްކޫލެވެ. މީގެ އިތުރުން، މިއީ ރާއްޖޭގައި އަންޑަގްރައުންޑް ޕާކިންއަކާއެކު ތަރައްޤީކުރާ ފުރަތަމަ ސްކޫލްވެސް މެއެވެ. މިހާރު ޕާކިންގެ ބައި މުޅިން ނިމިފައިވާއިރު، އެތަނުގައި 200 އަށްވުރެ ގިނަ ސައިކަލު ޕާކު ކުރެވޭނެއެވެ.

މި މަޝްރޫޢުގެ ސަބަބުން ލިބޭނެ މުހިންމު ފައިދާތައް:

ދަރިވަރުންނަށް ރައްކާތެރި އަދި ދާއިމީ މާހައުލެއް ލިބުން
ކުރީގެ އިމާރާތުގައި ރެނދުލައި، ކިޔަވައިދޭން ނުކުޅެދޭ ހާލަތަށް ދިއުމާ ގުޅިގެން ޢަރަބިއްޔާގެ ދަރިވަރުންނަށް ވަނީ އެކި ދުވަސްވަރު މާހައުލު ބަދަލުކުރަން ޖެހި، ނުތަނަވަސްކަމާ ކުރިމަތިލާންޖެހިފައެވެ. މި އައު އިމާރާތް ނިމުމުން، ކުދިންނަށް އެއްވެސް ބިރުވެރިކަމެއް ނެތް، ރައްކާތެރި އަދި ހިތްފަސޭހަ ދާއިމީ ތަޢުލީމީ ބިނާއެއް ލިބިގެންދާނެއެވެ.

ތަޢުލީމީ ވަސީލަތްތައް ޒަމާނީވެ، ފެންވަރު މަތިވުން
10 ފަންގިފިލާގެ މި ޒަމާނީ އިމާރާތުގައި 42 ކްލާސްރޫމާއި މަލްޓިޕާޕަސް ހޯލެއް ހުރުމުން، ދަރިވަރުންގެ އިތުރު ހަރަކާތްތަކަށާއި ކިޔެވުމަށް ބޭނުންވާ ޖާގަ ފުރިހަމައަށް ލިބޭނެއެވެ. މިއީ މާލޭގެ އެންމެ ބޮޑު ސްކޫލަށް ވެގެންދާއިރު، ސޯލާ ޕެނަލް ފަދަ އިއާދަކުރަނިވި ހަކަތައިގެ ނިޒާމުތައް ހުރުމުން ސްކޫލަކީ ތިމާވެއްޓާ ރައްޓެހި ތަނަކަށް ވެސް ވެގެންދާނެއެވެ.

އެއް ދަންފަޅިއަށް ކިޔަވައިދިނުމުގެ ފުރުޞަތު ފަހިވުން
ސްކޫލްގެ ޖާގަ ބޮޑުވުމުގެ ސަބަބުން، މިހާރު ދެ ދަންފަޅިއަށް ހިންގަމުންދާ ކިޔެވުން އެއް ދަންފަޅިއަށް ބަދަލުކުރުމުގެ ފުރުޞަތު ސަރުކާރަށް ލިބޭނެއެވެ. މީގެ ސަބަބުން ދަރިވަރުންނާއި މުދައްރިސުންނަށް އިތުރު ހަރަކާތްތަކަށް ވަގުތު ލިބި، ތަޢުލީމީ ހިންގުން ހަރުދަނާވެ، ބެލެނިވެރިންނަށްވެސް ބޮޑު ލުޔެއް ލިބިގެންދާނެއެވެ.

މާލޭގެ ޓްރެފިކް މައްސަލައަށް ހައްލެއް ލިބުން
ރާއްޖޭގައި ފުރަތަމަ ފަހަރަށް ސްކޫލެއްގައި 200 އަށްވުރެ ގިނަ ސައިކަލު ޕާކުކުރެވޭނެ އަންޑަގްރައުންޑް ޕާކިންއެއް ހެދުމަކީ މަގުމަތީގެ ބާރުބޮޑުވުން ކުޑަކުރާނެ ކަމެކެވެ. ސްކޫލް ހުންނަ ސަރަޙައްދުގެ މަގުތަކުގައި ސައިކަލު ޕާކުކުރުން ހުއްޓި، ކުދިން ބަލާ އަންނަ ބެލެނިވެރިންނަށް ފަސޭހަކަމާއެކު ޕާކުކޮށްލާނެ ޖާގަ ލިބިގެންދާނެއެވެ.

ދައުލަތުގެ ބަޖެޓަށް ބޮޑު ސަލާމަތެއް ލިބުން
ކުރިން މި މަސައްކަތް ހަވާލުކުރި ކޮންޓްރެކްޓަރަށްވުރެ 83 މިލިއަން ރުފިޔާ ހެޔޮ އަގެއްގައި އާރްސީސީއާ މި މަޝްރޫޢު ހަވާލުކޮށްފައިވުމަކީ، ދައުލަތުގެ ބަޖެޓުން ބޮޑު ޚަރަދެއް ސަލާމަތް ކުރެވުނު ކަމެކެވެ. މީގެ ސަބަބުން ކުޑަ ޚަރަދަކުން މާ ފުރިހަމަ ޒަމާނީ ވަސީލަތްތަކެއް ރައްޔިތުންނަށް ފޯރުކޮށްދެވޭނެއެވެ.