ހުޅުމާލޭގައި ކާރެއް ހޮޅިދަނޑިއެއްގައި ޖެހި ނުރައްކާތެރި އެކްސިޑެންޓެއް ހިނގައިފި
ހުޅުމާލޭގައި ކޮންޓްރޯލުން ނެއްޓިގެން ދިޔަ ކާރެއް މަގުމަތީގައި ހުރި ހޮޅިދަނޑިއެއްގައި ޖެހި ނުރައްކާތެރި އެކްސިޑެންޓެއް މިއަދު ފަތިހު ހިނގައިފިއެވެ. މި ހާދިސާއާ ގުޅިގެން ފުލުހުން ވަނީ އެ ކާރު ދުއްވަން އިން ޑްރައިވަރުގެ ލައިސަންސް ވަގުތީ ގޮތުން ހިފަހައްޓާފައެވެ.
ފުލުހުންގެ މީޑިއާ އޮފިޝަލް މައުލޫމާތު ދެއްވި ގޮތުގައި، މި އެކްސިޑެންޓް ހިނގާފައިވަނީ ހުޅުމާލޭގެ ބަގީޗާ ހިނގުމުގައެވެ. ބަގީޗާ ހިނގުމުން ދަތުރުކުރި ކާރެއް ކޮންޓްރޯލުން ނެއްޓި، ޕޭވްމަންޓް މަތީގައި ހުރި ހޮޅިދަނޑިއެއްގައި ޖެހި އެކްސިޑެންޓްވެފައިވާ ކަމުގެ ރިޕޯޓް ފުލުހުންނަށް ލިބިފައިވަނީ މިއަދު ފަތިހު 04:33 އެހައިކަންހާއިރު ކަމަށް ފުލުހުން ބުނެއެވެ.
މި ހާދިސާ ހިނގި ވަގުތު ކާރު ދުއްވަން އިނީ އުމުރުން 28 އަހަރުގެ ދިވެހި ފިރިހެނެކެވެ. މި އެކްސިޑެންޓާ ގުޅިގެން އޭނާއަށް އެކިވަރުގެ އަނިޔާތައް ލިބިފައިވީ ނަމަވެސް، ފުރާނައަށް ނުރައްކާވާ ފަދަ ސީރިއަސް އަނިޔާއެއް ލިބިފައި ނުވާ ކަމަށް ފުލުހުންގެ މައުލޫމާތުން އެނގެއެވެ. ނަމަވެސް، މި ބާރުގަދަ އެކްސިޑެންޓްގައި ކާރަށާއި މަގުމަތީގައި ހުރި ހޮޅިދަނޑިއަށް އެކިވަރުގެ ބޮޑެތި ގެއްލުންތައް ވަނީ ލިބިފައެވެ.
Ads by BMLމި މައްސަލައާ ގުޅިގެން ފުލުހުން ވަނީ، ކާރު ދުއްވި ޑްރައިވަރުގެ އެއްގަމު އުޅަނދު ދުއްވުމުގެ ލައިސަންސް ވަގުތީ ގޮތުން ހިފަހައްޓާފައެވެ. އަދި މި ހާދިސާ ހިނގަން މެދުވެރިވި ސަބަބު ދެނެގަތުމަށާއި، ބަލަންޖެހޭ އިތުރު ކަންކަން ސާފުކުރުމަށް ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
Ads by MACL
