ބުދަ، 18 ނޮވެމްބަރު 2026
ޚަބަރު

މޫސުމީ ވިއްސާރައާއެކު މަދިރި އާލާވާތީ، ޑެންގީން ރައްކާތެރިވުމަށް އެޗްޕީއޭއިން އިލްތިމާސްކޮށްފި

ޑެންގީ މަދިރި / ފޮޓޯ: އެޗްޕީއޭ
ޑެންގީ މަދިރި / ފޮޓޯ: އެޗްޕީއޭ

ރާއްޖެއަށް ކުރަމުންދާ ވިއްސާރައާ ގުޅިގެން މަދިރި އާލާވުމަށް ފަހި މާހައުލެއް އުފެދެމުންދާތީ، ޑެންގީ ހުމުން ރައްކާތެރިވުމަށް ދުރާލައި ފިޔަވަޅުތައް އެޅުމަށް ކަމާބެހޭ އިދާރާތަކުން އާންމުންނަށް އިލްތިމާސްކޮށްފިއެވެ.

ހެލްތު ޕްރޮޓެކްޝަން އެޖެންސީ އިން ފާހަގަކުރި ގޮތުގައި، ވާރޭވެހުމާއި ފެންބޮޑުވެފައި ހުންނަ ތަންތަނުގެ ސަބަބުން މަދިރި އާލާވުން އިތުރުވެއެވެ. އެގޮތުން ފެން ހަރުލާފައި ހުންނަ އެކި ބާވަތުގެ ފުޅި، ދަޅު، މާބަނޑު، ޢިމާރާތްކުރުމަށް ބޭނުންކުރާ ސާމާނު، އުކާލާފައިވާ ފުރޮޅުލީ ފޮރުޅު (ޓަޔަރު) ފަދަ ތަކެތީގައި މަދިރި ގިނައިން އާލާވާކަމަށް އެޗްޕީއޭއިން ބުނެއެވެ. އެހެންކަމުން، ގޭގޭގެ ގޯތިތެރެއާއި، ބަގީޗާތަކާއި، އާންމު ސަރަހައްދުތަކުގައި ފެން ހަރުލާފައި ހުންނަ ތަންތަން ނައްތާލުމަށް އާންމުންނަށާއި ރަށްރަށުގެ ކައުންސިލްތަކަށް އެ އެޖެންސީން ވަނީ ބާރުއަޅާފައެވެ.

މަދިރި ކޮންޓްރޯލްކުރުމަށްޓަކައި މާލެ ސަރަހައްދު ހިމެނޭހެން މުޅި ރާއްޖޭގައި ޚާއްޞަ އޮޕަރޭޝަންތަކެއް މިހާރު ދަނީ ހިންގަމުންނެވެ. މިގޮތުން، ހައުސިންގ ޑިވެލޮޕްމަންޓް ކޯޕަރޭޝަން' ފަހި ދިރިއުޅުން ކޯޕަރޭޝަން' ދިވެހި ފުލުހުންގެ ޚިދުމަތް، ވެސްޓް މެނޭޖްމަންޓް ކޯޕަރޭޝަން (ވެމްކޯ) އަދި މާލޭ ސިޓީ ކައުންސިލް ގުޅިގެން ކުނި އެއްކުރުމާއި، މަދިރި އާލާވާ ތަންތަން ނައްތާލުމުގެ އިތުރުން ފޮގް ކުރުމުގެ މަސައްކަތްތައް ދަނީ ކުރަމުންނެވެ.

ޑެންގީ ފެތުރުން މަދުކުރުމަށް ސަރުކާރުގެ އެކި އިދާރާތަކުން ގުޅިގެން މަސައްކަތް ކުރަމުންދާއިރު، ވަކިވަކި ފަރުދުންގެ ފެންވަރުގައި ކުރާ މަސައްކަތްތަކަކީވެސް މުހިންމު ކަމެކެވެ. އެގޮތުން، ހަށިގަނޑު ރަނގަޅަށް ނިވާވާ ފަދަ ހެދުން އެޅުމަށާއި، މަދިރިން ރައްކާތެރިވުމަށް ބޭނުންކުރާ ލޯޝަން ނުވަތަ ސްޕްރޭ ބޭނުންކުރުމަށް އާންމުންނަށް ލަފާދެއެވެ. ޑެންގީ ފަތުރާ އޭޑީސް މަދިރިއަކީ އާންމުކޮށް ދުވާލު ދިއްލޭ ވަގުތުތަކުގައި ހަށިގަނޑުގައި ހަފާ މަދިރިއަކަށް ވުމުން، ހެނދުނާއި ހަވީރުގެ ވަގުތުތަކުގައި ގޭގޭގެ ދޮރުތަކާއި ކުޑަދޮރުތައް ލައްޕާފައި ބެހެއްޓުމަކީ މަދިރި ދަތްއެޅުމުން ސަލާމަތްވުމަށް އެހީތެރިވެދޭނެ ކަމެކެވެ.

އެޗްޕީއޭގެ ތަފާސްހިސާބުތަކަށް ބަލާއިރު، މިއަހަރުގެ ޖޫން މަހު އެކަނިވެސް 673 ޑެންގީ ކޭސް ރިޕޯޓުކޮށްފައިވެއެވެ. މިހާރު ކޭސްތަކުގެ އަދަދު އެ މުއްދަތާ އަޅާބަލާއިރު ދަށްވެފައިވީ ނަމަވެސް، ބަލި ފެތުރުން މުޅިން ހުއްޓުވުމަށްޓަކައި އިތުރު މަސައްކަތްތަކެއް ކުރަންޖެހޭކަމަށް ކަމާބެހޭ ފަރާތްތަކުން ބާރުއަޅައެވެ.

ސިއްހީ މާހިރުން ލަފާދެއްވާ ގޮތުގައި، ޑެންގީ ހުން ޖެހިއްޖެނަމަ ގޭގައި އަރާމުކުރުމާއި، ގިނައިން ދިޔާތަކެތި ބުއިމުގެ އިތުރުން، ގައިގައި ރިއްސުމާއި ހުން މަޑުކުރުމަށް ޕެރެސެޓަމޯލް ބޭނުންކުރަންޖެހެއެވެ. ޑޮކްޓަރެއްގެ އިރުޝާދެއް ނެތި އެހެން އެއްވެސް ކަހަލަ ތަދުކަނޑުވާ ބޭހެއް ބޭނުންކޮށްގެން ނުވާނެއެވެ. އަދި ބަލިމީހާގެ ހާލަތު ގޯސްވާނަމަ، ލަސްނުކޮށް ސިއްހީ އެހީތެރިކަން ހޯދަންޖެހެއެވެ.