އިނގިރޭސިވިލާތަށް ދަތުރުކުރާ ދިވެހިން އީޓީއޭ ނަގަންޖެހޭތޯ ބެލުމަށް އިލްތިމާސްކޮށްފި
އިނގިރޭސިވިލާތަށް ދަތުރުކުރާ ދިވެހިންނާއި އެ ގައުމު މެދުވެރިކޮށް އެހެން ގައުމުތަކަށް ޓްރާންސިޓްކުރާ ދިވެހިރާއްޖޭގެ ރައްޔިތުން، އިލެކްޓްރޯނިކް ޓްރެވަލް އޮތަރައިޒޭޝަން (އީޓީއޭ) ނަގަންޖެހޭތޯ ދަތުރުގެ ކުރިން ކަށަވަރުކުރުމަށް އިނގިރޭސިވިލާތުގައި ހުންނަ ދިވެހި ހައިކޮމިޝަނުން އިލްތިމާސްކޮށްފިއެވެ.
އެ ހައިކޮމިޝަނުން 'އެކްސް' ގައި އާންމުކުރި މެސެޖެއްގައި ބުނެފައިވަނީ، ޔޫކޭއަށް އެތެރެވުމާއި އެ ގައުމު މެދުވެރިކޮށް ދަތުރުކުރުމުގެ ގަވާއިދުތަކަށް ގެންނަމުންދާ ބަދަލުތަކަށް ދަތުރުވެރިން ސަމާލުވާންޖެހޭ ކަމަށެވެ. އަދި ދަތުރު ފެށުމުގެ ކުރިން އެންމެ ފަހުގެ އުސޫލުތައް ބަލައި، އީޓީއޭ ބޭނުންވާ ހާލަތްތައް ސާފުކުރުމަށް ވަނީ ހަނދާންކޮށްދީފައެވެ.
އާ އުސޫލުގެ ދަށުން އީޓީއޭއަކަށް އެދުމުގެ ފީއަކީ 20 ޕައުންޑެވެ. އިނގިރޭސިވިލާތުގެ އެއާޕޯޓެއް މެދުވެރިކޮށް އެހެން ރަށަކަށް ދަތުރުކުރާއިރު ބޯޑަރު ކޮންޓްރޯލް ހުރަސްކުރަންޖެހޭ ނަމަ، ޓްރާންސިޓް މަންޒިލެއްގެ ގޮތުގައި އެ ގައުމު ބޭނުންކުރި ނަމަވެސް އީޓީއޭ ނަގަން މަޖުބޫރުވާނެއެވެ.
Ads by BMLނަމަވެސް، އިނގިރޭސިވިލާތުގެ ޕާސްޕޯޓު އޮންނަ ފަރާތްތަކުގެ އިތުރުން، އެ ގައުމުގައި ރެސިޑެންޓް ވިސާ ނުވަތަ ކިޔެވުމުގެ ހުއްދަ އޮންނަ ދިވެހިން އީޓީއޭ ނަގާކަށް ނުޖެހޭނެއެވެ.
ޔޫކޭއަކީ ގިނަ އަދަދެއްގެ ދިވެހި ދަރިވަރުން މަތީ ތައުލީމު ހާސިލުކުރަމުންދާ ގައުމަކަށް ވެފައި، އެ ގައުމުގައި ގިނަ ދިވެހިންތަކެއް ދިރިއުޅެމުންދާތީ، ދަތުރުފަތުރުގެ ގަވާއިދުތަކަށް އަހުލުވެރިވުމަކީ ދަތުރުމަތީގައި ދިމާވެދާނެ ދަތިތަކުން ރައްކާތެރިވުމަށް މުހިންމު ކަމެކެވެ.
Ads by MACL
