މާ ލަސްތަކެއްނުވެ މުޅި ރާއްޖެއަށް ވެމްކޯގެ ޚިދުމަތް ފުޅާކުރުމަކީ ސަރުކާރުގެ އަމާޒެއް: މިނިސްޓަރ ޢަލީ ޝަރީފް
ވޭސްޓް މެނޭޖްމަންޓް ކޯޕަރޭޝަން ގެ ޚިދުމަތް މިހާރު ނުލިބޭ ދިވެހިރާއްޖޭގެ ހުރިހާ ރަށްތަކަކަށް، ވަރަށް އަވަސް މުއްދަތެއްގެ ތެރޭގައި އެ ޚިދުމަތް ފޯރުކޮށްދިނުމަކީ ސަރުކާރުގެ މުހިންމު އަމާޒެއް ކަމަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަމަންޓް އެންޑް އެނަރޖީ ޢަލީ ޝަރީފް ވިދާޅުވެއްޖެއެވެ.
މިނިސްޓަރ ޢަލީ ޝަރީފް މިހެން ވިދާޅުވީ، ރާއްޖޭގެ ރަށްތަކުގައި ކުނި މެނޭޖްކުރުމަށް ހުރި ގޮންޖެހުންތަކަށް ދާއިމީ ޙައްލެއް ހޯދުމަށާއި، ރާއްޖޭގެ ތިމާވެށި ޙިމާޔަތްކުރުމަށް ސަރުކާރުން ކުރިއަށްގެންދާ ސިޔާސަތުތަކާ ގުޅޭގޮތުން ވާހަކަފުޅު ދައްކަވަމުންނެވެ.
ޚިދުމަތް ފުޅާކުރުމުގެ މަސައްކަތްތައް
Ads by BMLމިނިސްޓަރު ފާހަގަކުރެއްވި ގޮތުގައި، ދެމެހެއްޓެނިވި ގޮތެއްގައި ކުނި ނައްތާލުމުގެ ނިޒާމު މުޅި ރާއްޖެއަށް ފުޅާކުރުމަށްޓަކައި ވެމްކޯގެ ސީނިއާ މެނޭޖްމަންޓާ އެކު ޚާއްޞަ މަޝްވަރާތަކެއް ވަނީ ބާއްވާފައެވެ. މި މަޝްވަރާތަކުގެ މައިގަނޑު ބޭނުމަކީ ޚިދުމަތުގެ ފެންވަރު އިތުރަށް ހަރުދަނާކޮށް، މިހާރު ޚިދުމަތް ނުލިބި ހުރި ރަށްތަކަށް ފަސޭހަކަމާއެކު ޚިދުމަތް ދެވޭނެ އިންތިޒާމުތައް ރޭވުމެވެ.
މި ސިޔާސަތުގެ ދަށުން، އަތޮޅުތެރޭގެ އެކި ރަށްތަކަށް ވެމްކޯގެ ޚިދުމަތް ތަޢާރަފުކުރުމުގެ އަމަލީ މަސައްކަތްތައް ދަނީ ބާރުދުވެލީގައި ކުރިއަށެވެ. ޚާއްޞަކޮށް، ރަށްރަށުގެ ކައުންސިލްތަކާ ގުޅިގެން، ރަށްރަށުގައި އުފެދޭ ކުނި ރައްކާތެރި ގޮތުގައި މެނޭޖްކުރެވޭނެ ވަސީލަތްތައް ޤާއިމުކުރުމަށް އިސްކަންދެމުންދާކަން މިނިސްޓްރީން ފާހަގަކުރެއެވެ.
ތިމާވެށި ޙިމާޔަތްކުރުމުގެ ޤައުމީ މަޝްރޫޢުތައް
މުޅި ރާއްޖެއަށް ވެމްކޯގެ ޚިދުމަތް ފުޅާކުރުމުގެ އިތުރުން، ތިލަފުށީގައި ރާއްޖޭގެ ފުރަތަމަ ޕްލާސްޓިކް ރިސައިކްލިންގ ފެސިލިޓީ (އެމް.އޯ.ޕީ.އޭ ސައިކަލް ޕެޓް ފްލޭކިންގ އެންޑް ވޮޝިންގ ލައިން) ޤާއިމުކުރުމުގެ އަމަލީ މަސައްކަތް ވެސް ސަރުކާރުން ވަނީ ފަށާފައެވެ. މިއީ ރާއްޖޭގައި އުފެދޭ ކުނި މަދުކޮށް، "ސާކިއުލާ އިކޮނޮމީ" އެއް ނުވަތަ ކުނިން ނަފާ ހޯދޭނެ ނިޒާމެއް ޤާއިމުކުރުމަށް އެޅުނު މުހިންމު ފިޔަވަޅެކެވެ.
މިނިސްޓަރ ޢަލީ ޝަރީފް ވިދާޅުވީ، ރައްޔިތުންނަށް ފޯރުކޮށްދޭ އަސާސީ ޚިދުމަތްތައް ލުއިފަސޭހަ އަދި އިތުބާރު ހުރި ގޮތެއްގައި ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ ބޮޑު އިސްކަމެއް ދޭ އެއް ކަންތައް ކަމަށެވެ.
Ads by MACL
