ރައީސް މުޢިއްޒު ޕާކިސްތާނަށް ކުރައްވާ ދަތުރުފުޅަށް ބައިނަލްއަޤްވާމީ މީޑިއާތަކުގެ ބޮޑު ސަމާލުކަމެއް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޕާކިސްތާނަށް ކުރައްވަމުންދާ ފުރަމާނަ ދަތުރުފުޅުގެ ޚަބަރުތަކުން ބައިނަލްއަޤްވާމީ ބޮޑެތި މީޑިއާތަކުގެ ސުރުޚީތައް ފުރާލައި، މި ދަތުރުފުޅަށް ދުނިޔޭގެ ސަމާލުކަން ވަނީ ވަރަށް ބޮޑަށް ހުއްޓިފައެވެ.
އޮކްޓޯބަރު 20 އިން 22 އަށް ކުރިއަށްދާ 3 ދުވަހުގެ މި ރަސްމީ ފުރަމާނަ ދަތުރުފުޅަކީ ވޭތުވެދިޔަ 10 އަހަރަށްވުރެ ގިނަ ދުވަހުގެ ތެރޭގައި ދިވެހިރާއްޖޭގެ ރައީސަކު ޕާކިސްތާނަށް ކުރައްވާ ފުރަތަމަ ދަތުރުފުޅަށް ވުމާއެކު، ބޭރުގެ ޚަބަރު ފަތުރާ ވަސީލަތްތަކުން، ޚާއްޞަކޮށް ސަރަޙައްދީ ބޮޑެތި ނޫސްތަކުން އަންނަނީ މި ދަތުރުފުޅުގެ ކޮންމެ ހަރަކާތެއް ވަރަށް ގާތުން ބަލަމުންނެވެ.
ޕާކިސްތާނުގެ މަޝްހޫރު ނޫސްތައް ކަމަށްވާ ޑޯން (Dawn)، ބިޒްނަސް ރެކޯޑަރ (Business Recorder) އަދި ދަ އެކްސްޕްރެސް ޓްރިބިއުން (The Express Tribune) އިން ރިޕޯޓްކޮށްފައިވާ ގޮތުގައި، ރައީސް މުޢިއްޒު އިސްލާމްއާބާދަށް ވަޑައިގެންފައިވަނީ ބޮޑުވަޒީރު ޝެހެބާޒް ޝަރީފްގެ ދައުވަތަކަށެވެ.
Ads by BMLދެ ޤައުމުގެ ދެމެދުގައި ސިޔާސީ ގުޅުން ޤާއިމްކުރިތާ 60 އަހަރު ފުރުމާ ދިމާކޮށް ކުރައްވާ މި ދަތުރުފުޅުގައި ވިޔަފާރި، ދިފާޢީ ދާއިރާ، ސިއްޙަތު، އަދި ތަޢުލީމީ ދާއިރާ މުހިންމު ދާއިރާތައް ހިމެނޭހެން 12 އެއްބަސްވުމެއްގައި ސޮއިކުރާނެ ކަމަށް އެ ނޫސްތަކުން ބުނެފައިވެއެވެ.
އިންޑިއާގެ ދަ ޓައިމްސް އޮފް އިންޑިއާ (The Times of India)، ޓެލެގްރާފް އިންޑިއާ (Telegraph India) އަދި ދަ ނިއު އިންޑިއަން އެކްސްޕްރެސް (The New Indian Express) އިންވެސް މި ޚަބަރު ފުޅާދާއިރާއެއްގައި ގެނެސްދީފައިވެއެވެ. އެ ނޫސްތަކުން ބޮޑަށް އަލިއަޅުވާލާފައިވަނީ ރައީސް މުޢިއްޒުގެ "މޯލްޑިވްސް ފަސްޓް" ސިޔާސަތަށާއި، ދެ ޤައުމުގެ ދިފާޢީ އަދި ކަނޑުގެ ސަލާމަތާ ގުޅޭގޮތުން ކުރެވޭ މަޝްވަރާތަކަށެވެ.
އޭގެ އިތުރުން، ސާކް (SAARC) ޖަމްޢިއްޔާ އަލުން ދިރުވުމަށް ރައީސް މުޢިއްޒު ކުރައްވާ މަސައްކަތްޕުޅުތަކަށްވެސް އިންޑިއާގެ މީޑިއާތަކުން އަލިއަޅުވާލާފައިވެއެވެ.
ސަރަޙައްދީ ގުޅުންތައް ބަދަހިކުރުމަށާއި އިޤްތިޞާދީ އަދި ދިފާޢީ އެއްބާރުލުން އިތުރުކުރުމަށް އަމާޒުކޮށްގެން ކުރިއަށްދާ މި ދަތުރުފުޅަކީ ސަރަޙައްދީ ސިޔާސީ މަޝްރަޙުގައި މުހިންމު ދަތުރުފުޅެއްގެ ގޮތުގައި ބައިނަލްއަޤްވާމީ ފަރާތްތަކުން ސިފަކުރެއެވެ.
Ads by MACL
