ދީނާއި ޢިލްމު އެކުގައި ކުރިއަށްދާންޖެހޭ، ރާއްޖެ އަބަދުވެސް އޮންނާނީ ޕާކިސްތާނާއެކު: ރައީސް ޑރ. މުޢިއްޒު
ކޮންމެ ޤައުމެއްގެވެސް ކުރިއެރުމާއި، ތަރައްޤީއާއި، ހަމަޖެހުމަށްޓަކައި ސާބިތު އީމާންތެރިކަމާއި ޒަމާނީ ޢިލްމު އެކުގައި ކުރިއަށް ދިއުމަކީ ކޮންމެހެން ބޭނުންތެރި ކަމެއް ކަމަށް ދިވެހިރާއްޖޭގެ ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ޕާކިސްތާނުގެ ބޮޑުވަޒީރު މުޙައްމަދު ޝަހްބާޒް ޝަރީފްގެ ޚާއްޞަ ދައުވަތަކަށް އެ ޤައުމަށް މިހާރު ކުރައްވަމުންދާ ތިން ދުވަހުގެ ތާރީޚީ ރަސްމީ ދަތުރުފުޅުގެ ތެރެއިން، ޕާކިސްތާނުގެ ޔުނިވަރސިޓީތަކުގެ އިސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ. މި ބައްދަލުކުރެއްވުމުގައި ރައީސް ވަނީ ޕާކިސްތާނުގެ ޔުނިވަރސިޓީތަކުގެ ލީޑަރޝިޕުން ބަހައްޓަވާ ގާތްކަމަށާއި، ދެ ޤައުމުގެ ތަޢުލީމީ ކުރިއެރުމަށް ކުރައްވާ މަސައްކަތްޕުޅުތަކަށް ޝުކުރު އަދާކުރައްވާފައެވެ.
މިނިވަންކަމަށް އިޙްތިރާމްކުރުމާއި ޒަމާންވީ އަޚުވަންތަކަން
Ads by BMLބައިނަލްއަޤްވާމީ މައިދާނުގައި ކޮންމެ ޤައުމަކީވެސް އެ ޤައުމެއްގެ މިނިވަންކަމާއި މުސްތަޤިއްލުކަމަށް ފުރިހަމައަށް އިޙްތިރާމް ލިބެންޖެހޭނެ ޤައުމެއްކަން ފާހަގަކުރައްވަމުން ރައީސް ޑރ. މުޢިއްޒު ވިދާޅުވީ، ރާއްޖެއާއި ޕާކިސްތާނާ ދެމެދު އޮތް ޒަމާންވީ އަޚުވަންތަ ގުޅުމާއި، ދެ ޤައުމުން ޙިއްޞާކުރާ އިސްލާމީ ސަގާފީ އަގުތައް ދެމެހެއްޓުމުގައި ދިވެހި ސަރުކާރުން އަބަދުވެސް ސާބިތުކަމާއެކު ދެމިއޮންނާނެ ކަމަށެވެ.
މޫސުމީ ބަދަލުތަކާއި "ގްރީން ޕާކިސްތާން" މަޝްރޫޢު
މި ބައްދަލުވުމުގައި ރައީސުލްޖުމްހޫރިއްޔާ ވަނީ ދުނިޔެއަށް ކުރިމަތިވަމުންދާ މޫސުމީ ބަދަލުތަކާ ދެކޮޅަށް ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް ބައްލަވާލައްވާފައެވެ. އެގޮތުން ޕާކިސްތާނުން ކުރިއަށްގެންދާ ތިމާވެށި ފެހިކުރުމުގެ މަޝްރޫޢުތަކުގައި ދެ ޤައުމުން ގުޅިގެން މަސައްކަތް ކުރުމަކީ ދެމެހެއްޓެނިވި ތަރައްޤީއަށް ލިބޭނެ ބޮޑު ބާރެއްކަން އެމަނިކުފާނު ފާހަގަކުރެއްވިއެވެ.
ދިވެހިރާއްޖެއާއި ޕާކިސްތާނާ ދެމެދު ސިޔާސީ ގުޅުން ޤާއިމުކުރިތާ ފަޚުރުވެރި 60 އަހަރު ފުރުން ފާހަގަކުރާ މި ދަނޑިވަޅަކީ، ފާއިތުވި 11 އަހަރުގެ ތެރޭގައި ދިވެހިރާއްޖޭގެ ޒައީމަކު ޕާކިސްތާނަށް ކުރައްވާ ފުރަތަމަ ރަސްމީ ދަތުރުފުޅެވެ. މި ދަތުރުފުޅުގެ ސަބަބުން ދެ ޤައުމުގެ ދެމެދުގައި އޮތް ތަޢުލީމީ، އިޤްތިޞާދީ އަދި ސިޔާސީ ގުޅުންތައް އިތުރު ހަރުފަތަކަށް ބަދަހިވެ، އައު ބާބެއް ފެށިގެންދާނެ ކަމަށް ސިޔާސީ މާހިރުން ލަފާކުރެއެވެ.
Ads by MACL
