ސާކް އަލުން ހަރަކާތްތެރިކުރުވަން ރާއްޖެއިން އިސްނަގަން ތައްޔާރު: ރައީސް
ދެކުނު އޭޝިއާގެ ގައުމުތަކުގެ މެދުގައި އިތުބާރު ބޮޑުކޮށް އެކުވެރިކަން ބަދަހިކުރުމަށްޓަކައި، ސާކް ޖަމިއްޔާގެ މަސައްކަތްތައް އަލުން ދިރުވައި ފެށުމަށް ދިވެހިރާއްޖެއިން ފުރިހަމައަށް ތައްޔާރަށް އޮތްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕާކިސްތާނުގެ ބޮޑުވަޒީރު ޝަހެބާޒް ޝަރީފްގެ ދައުވަތަކަށް އެ ގައުމަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން ދެއްވި ބަޔާނެއްގައި ރައީސް މުއިއްޒު ވިދާޅުވީ، ސަރަހައްދީ ގޮންޖެހުންތަކުން އަރައިގަނެވޭނީ ސާކްގެ ހުރިހާ ގައުމުތަކެއް ގުޅިގެން މަސައްކަތް ކޮށްގެން ކަމަށާއި، އެ ޖަމާއަތުގެ އަގު ރާއްޖެއިން އަބަދުވެސް ވަޒަންކުރާ ކަމަށެވެ.
އަދި ސަރަހައްދުގެ ގައުމުތަކުގެ މެދުގައި މައުނަވީ މަޝްވަރާތައް ބޭއްވުމާއި އިތުބާރު އުފެއްދުމަކީ ކޮންމެހެން މުހިންމު ކަމެއްކަން ފާހަގަކުރައްވަމުން، ސާކްގެ މަސައްކަތްތައް އަލުން ފެށުމަށްޓަކައި ހަރުދަނާ އަދި އޮއްޓަރު ހުރި މަސައްކަތްތަކެއް ކުރަން ރާއްޖެއިން ތައްޔާރަށް އޮތްކަން ރައީސް ފާހަގަކުރެއްވިއެވެ.
Ads by BMLއެ މަނިކުފާނު އިތުރަށް ވިދާޅުވީ، ސާކްގެ ހުރިހާ ގައުމަކާ އެކުވެސް ރާއްޖެއިން ގާތުން މަސައްކަތްކުރާނެ ކަމަށާއި، ވީ އެންމެ އަވަހަކަށް ސާކް ސަމިޓެއް ބޭއްވުމަށްޓަކައި އެއްބާރުލުން ދޭން ރާއްޖެއިން އޮތީ ތައްޔާރަށް ކަމަށެވެ.
އެންމެ ފަހުން ސާކް ސަމިޓެއް ބޭއްވުނީ 2014 ވަނަ އަހަރު ނޭޕާލްގައެވެ. އޭގެ ފަހުން 2016 ވަނަ އަހަރު ޕާކިސްތާނުގައި 19 ވަނަ ސާކް ސަމިޓް ބާއްވަން ނިންމި ނަމަވެސް، އިންޑިއާ އާއި ޕާކިސްތާނާ ދެމެދު އޮތް ނުތަނަވަސްކަމުގެ ސަބަބުން ބައެއް ގައުމުތަކުން ސަމިޓް ބޮއިކޮޓްކުރުމާ ގުޅިގެން އެ ޖަމާއަތުގެ ބައްދަލުވުންތައް ވަނީ މެދުކެނޑިފައެވެ.
Ads by MACL
